اِختتامی نصیحتاں تے سلام
13
1 ایہہ تَریجھی پھیری میں تُہاڈے کولھ آندا پِیا ہاں۔ جیہڑی گالھ دی ڈو یا تَرے گواہ آپنڑی زبان نال شہادت ڈیسن اوہ سچ ثابت تھی ویسی ۔ 2 میں تُہاکُوں پہلے وی ڈسایا ہا تے ہُنڑ وی ڈسیندا پِیا ہاں، جِیں وَیلے میں ڈوجھی دفعہ اُتھاں ہم تے ہُنڑ غیر حاضر ہووݨ دے باوجود اُنہاں لوکاں کُوں لکھدا ہاں جِنہاں نیں گُناہ کیتے ہِن تے بئیاں کُوں ڈسا ڈیندا ہاں جو جے وَلا آساں تاں نہ چھوڑیساں۔ 3 تُساں اِیں گالھ دا ثبوت مَنگدے ہِیوے جو مسیح میڈے ءچ کلام کریندا ہے۔ اوہ تُہاڈے واسطے کمزور نئیں بلکہ تُہاڈے ءچ زور آور ہے۔ 4 ہاں، اوہ کمزوری دی حالت ءچ مصلُوب کیتا گِیا پَر خُدا دی قُدرت دے سببّوں زندہ ہے، تےاَساں وی اُوندی طرحاں کمزور تاں ہئیں پَر اُوندے نال خُدا دی اُوں قُدرت دے سببّوں زندہ ہوسُوں جیہڑی تُہاڈے کیتے ہے۔5 تُساں آپنڑے آپ کُوں اَزماؤ جو اِیمان اُتے ہِیوے یا نئیں۔ آپنڑے آپ کُوں پرکھو۔ کیا تُساں آپنڑے بارے ءچ ایہہ نئیں جانڑدے جو یسوع مسیح تُہاڈے ءچ ہے؟ نہ تاں تُساں اِیمان دے امتحان ءچ ناکام ہِیوے۔ 6 پَر میکُوں اُمید ہے جو تُساں پتا کر گِھنسو جو اَساں ناکام نئیں۔ 7 اَساں خُدا تُوں دُعا کریندے ہئیں جو تُساں بدی نہ کرو، اِیں واسطے نئیں جو اَساں کامیاب نظر آؤں بلکہ اِیں واسطے جو تُساں نیکی کرو بھانویں جو اَساں ناکام ای نظر آؤں۔ 8 کیوں جو اَساں حق دے بَرخلاف کُجھ نئیں کر سگدے بلکہ صرف حق کیتے کر سگدے ہئیں۔ 9 کیوں جو اَساں خوش ہئیں جو تُساں زور آور ہِیوے بھانویں اَساں کمزور ہئیں تے اَساں تُہاڈے کامل تھی وَنجنڑ دی دُعا کریندے ہئیں۔ 10 اِیں واسطے میں آپنڑی غیر موجودگی ءچ ایہہ گالھیں لکھدا ہاں اِینویں نہ تھیوے جو آ تے میکُوں اُوں اِختیار دے مطابق سختی نہ کرنڑی پووے جیہڑا خُداوند نیں میکُوں تعمیر کیتے ڈِتے نہ جو ڈھاوݨ کیتے۔
11 غرض اے بِھراؤ! خوش رَہو، کامل بنڑو، تسلی رکھو، یک دِل رَہو، میل مِلاپ رکھو، تاں خُدا جیہڑا مُحبت تے سلامتی دا سرچشمہ ہے تُہاڈے نال رَہسی۔
12 پاک بوسہ دے نال ہِک ڈوجھے کُوں سلام کرو۔
13 سارے مُقدس لوک تُہاکُوں سلام آہدھے ہِن۔
14 خُداوند یسوع مسیح دا فضل، خُدا دی مُحبت تے رُوح القُدس دی شراکت تُہاڈے ساریاں دے نال رَہوے۔