پَولُس رسُول نیں ایہہ خط گلتِیہ دی کلیسیا کُوں غالباً٤٩ عیسوی دے درمیان لکھیا ہا۔ گلتِیہ دا صوبہ ایشیائے کوچک دے وسطی علاقے ءچ واقع ہا۔ اِتھاں بہُوں سارے اِسرائیلی رَہندے ہَن۔ تے اُنہاں ءچوں بہُوں سارے خُداوند یسوع اُتے اِیمان گِھن آئے ہَن ۔اِسرائیلی ہووݨ دی وجہ کنُوں اِنہاں لوکاں دے خیال شریعت اُتے اِیمان دے بارے ءچ ہُنڑ تئیں ٹھیک نہ ہَن ۔اِنہاں ءچوں کُجھ لوک غیر اِسرائیلی مسیحیاں کُوں ایہہ سکھاوݨ لگ پئے جونجات پاوݨ کیتے موسوی شریعت دی پیروی کرݨ ضروری ہے۔ کُجھ لوک اِیں تعلیم کنُوں گمراہ وی تھی گئے۔

پَولُس رسُول آپنڑے پہلے تے تَریجھے تبلیغی سفر دے دوران گلتِیہ تُوں تھی آیا ہئی۔ جِیں وَیلے اُنہاں کُوں گلتِیہ دی کلیسیاواں دے مسائل دا پتا چلیا تاں اُنہاں نیں خط دے ذریعے اُنہاں کُوں ڈسایا جو ایہہ تعلیم ٹھیک نئیں۔ حقیقی خوش خبری ایہہ ہے جو اِنسان فقط خُداوند یسوع مسیح اُتے اِیمان گِھن آوݨ دی وجہ تے خُدا دے فضل نال نجات پا سگدے۔ اِیندے علاوہ کہیں بئے قِسم دی تعلیم خُدا دی عالمگیر سچائی دے بَرخلاف ہے۔ خُداوند یسوع مسیح نیں ساکُوں شریعت دی غلامی کنُوں آزاد کر ڈِتے، اِیں واسطے ساکُوں ایہہ خیال نئیں کرنڑا چاہیدا جو اَساں آپنڑے اعمال نال یا آپنڑی کوششاں نال نجات پا سگدے ہئیں ۔ساکُوں اِنجیل دی اُوں تعلیم اُتے عمل کرنڑا چاہیدا ہے جیہڑی پاک رُوح دی اطاعت تے آپنڑے ہمسائے نال آپنڑے وانگوں مُحبت کرݨ سکھیندی ہے۔ (٥ : ١٤ )۔