‏6 کلام دی تعلیم پاوݨ آلا آپنڑی ساریاں چنگیاں چیزاں ءچ تعلیم ڈیوݨ آلے کُوں شریک کرے۔

‏7 دھوکا نہ کھاؤ، خُدا بےوقوف نئیں بنڑایا وَنج سگدا۔ آدمی جیہڑا کُجھ رَہیندے، اُوہو کپیسی۔ ‏8 جیہڑا کوئی آپنڑی بُری خواہشاں کیتے رَہیندے، اوہ ہلاکت دی فصل کپیسی تے جیہڑا کوئی رُوح القُدس دی مرضی کیتے رَہیندے، اوہ ہمیشاں دی زندگی دی فصل کپیسی۔ ‏9 اَساں نیکی کرݨ ءچ ہِمت نہ ہارُوں کیوں جو جے بے دِل نہ تھیسوں تاں پورے وقت اُتے فصل کپیسوں۔ ‏10 وَل جئیں تئیں موقع مِلے اَساں ساریاں دے نال نیکی کروں، خاص کر اہل ِ اِیمان دے نال۔

‏11 ڈیکھو! میں آپنڑے ہَتھ نال کیجھے موٹے موٹے حرفاں ءچ تُہاکُوں لکھیا ہے۔ ‏12 جیہڑے لوک جِسمانی نمودونمائش دی فِکر ءچ ہِن اوہ تُہاکُوں ختنہ کراوݨ تے مجبُور کریندے ہِن۔ پَراُنہاں دا مقصد صرف ایہہ ہے جو مسیح دی صلیبی موت دے پیغام دی وجہ کنُوں ستائے نہ وَنجنڑ۔ ‏13 کیوں جو ختنہ کراوݨ آلے خود وی شریعت اُتے عمل نئیں کریندے، پَر تُہاڈا ختنہ اِیں واسطے کراوݨ چاہندے ہِن تاں جو اوہ تُہاڈی جِسمانی حالت اُتے فخر کر سگنڑ۔ ‏14 پَر خُدا نہ کرے جو میں کہیں چیز اُتے فخر کراں سِوائے آپنڑے خُداوند یسوع مسیح دی صلیب اُتے جِیندے ذریعے دُنیا دی اہمیت میڈے کیتے مصلُوب تھی گئی ہے تے میڈی اہمیت دُنیا کیتے۔ ‏15 کیوں جو یسوع المسیح ءچ نہ تاں ختنہ کوئی چیز ہے تے نہ نامختُونی، پَر صرف نویں مخلوق بنڑ وَنجنڑاں۔ ‏16 تے جیہڑے اِیں اصول اُتے چلدے ہِن اُنہاں کُوں تے خُدا دے اِسرائیل کُوں اِطمینان تے رحم حاصل تھیندا رَہوے^b ۔

‏17 میڈے بدن اُتے زخماں دے داغ ایہہ ظاہر کریندے ہِن جو میں مسیح دی خِدمت کریندا ہاں اِیں واسطے کوئی میکُوں اَگوں تُوں تکلیف نہ ڈیوے۔

‏18 اے بِھراؤ! ساڈے خُداوند یسوع مسیح دا فضل تُہاڈی رُوح دے نال رَہوے۔ آمین۔