‏2 ڈیکھو! میں پَولُس خود تُہاکُوں آہدھا ہاں جو جے تُساں ختنہ کرواؤ تاں مسیح کنُوں تُہاکُوں کوئی فائدہ نہ تھیسی۔ ‏3 بلکہ میں ہر اُوں آدمی کُوں جیہڑا ختنہ کرویندے وَل آہدھا ہاں جو اُونکُوں ساری شریعت اُتے عمل کرنڑا فرض ہے۔ ‏4 تُساں جیہڑے شریعت دےوسیلے نال راستباز بننڑ ا چاہندے ہِیوے، مسیح کنُوں اَنج تھی گئے ہِیوے تے فضل کنُوں ہَتھ دھو بیٹھے ہِیوے۔ ‏5 پَر اَساں رُوح القُدس دے وسیلے نال اِیمان کنُوں راستباز تھیوݨ دی اُمید دے منتظر ہئیں۔ ‏6 کیوں جو مسیح یسوع ءچ نہ تاں ختنہ کُجھ فائدہ آلی چیز ہے تے نہ ای نا مختونی پَر اِیمان مُحبت دے ذریعے اثر رکھیندا ہے۔

‏7 تُساں چنگی طرحاں بھجدے پئے ہَوے۔ کئیں تُہاکُوں حق اُتے عمل کرݨ کنُوں روک ڈِتا؟ ‏8 ایہہ ترغیب خُدا دی طرفوں نئیں جئیں تُہاکُوں سَڈیا ہے۔ ‏9 تھوڑا جِیہا خمیر سارے لوئے ہوئے اَٹے کُوں خمیرا کر ڈیندا ہے۔ ‏10 میکُوں خُداوند یسوع ءچ تُہاڈے متعلق بھروسہ ہے جو تُساں کوئی بئی سوچ نہ رکھیسو تے جیہڑا شخص تُہاڈے ءچ افراتفری پیدا کریندے خواہ جیہڑا وی ہووے، سزا وارتھیسی۔

‏11 اے بِھراؤ!جے میں ہُنڑ تئیں ختنہ دی تبلیغ کریندا ہاں تاں ہُنڑ تئیں کیوں سَتایا وَیندے ہاں؟ اِیں صورت ِ حال ءچ صلیب دا پیغام ٹھوکر دا باعث نہ ہوندا۔ ‏12 کاش جو تُہاکُوں اُلجھاوݨ آلے نہ فقط ختنہ کرویندے بلکہ آپنڑے آپ کُوں خوجے بنڑا گِھندے۔

‏13 بِھراؤ! تُساں آزاد رَہنڑ کیتے سَڈےگئے ہِیوے پَر اِیں آزادی کُوں آپنڑی نفسانی خواہشات کیتے استعمال نہ کرو بلکہ مُحبت نال ہِک ڈوجھے دی خدمت کریندے رَہو۔ ‏14 کیوں جو ساری شریعت اِیں ہِک گالھ ءچ ای پوری تھی وَیندی ہے جو ”تُوں آپنڑے ہمسائے نال آپنڑے وانگوں مُحبت رکھ ۔“ ‏15 جے تُساں ہِک ڈوجھے کُوں چِیر پھاڑ تے کھاندے ہِیوے تاں خبردار رَہوائے کِتھائیں ایہہ نہ تھیوے جو ہِک ڈوجھے کُوں ختم کر ڈیوو۔

‏16 میں تاں ایہہ آہدھا ہاں جو جے تُساں رُوح القُدس دے مطابق چلو تاں نفسانی خواہشاں کُوں ہر گِز پورا نہ کریسو۔ ‏17 کیوں جو نفس رُوح دے خلاف خواہش کریند اہے تےرُوح نفس دے خلاف۔ ایہہ ڈوہائیں ہِک ڈوجھے دے مخالف ہِن تاں جو جیہڑا کَم تُساں کرݨ چاہندے ہِیوے اوہ نہ کر سگو۔ ‏18 پَر جے تُساں پاک رُوح دی ہدایت نال چلدے ہِیوے تاں شریعت دے ماتحت نہ ریہے۔

‏19 ہُنڑ اِنسانی نفس دے کَم صاف ظاہر ہِن یعنی، حرامکاری، ناپاکی، شہوت پرستی، ‏20 بُت پرستی، جادوگری، نفرتاں، جھیڑے، حسد، کاوِڑ،تفرقے، جُدائیاں ،بِدعتاں، ‏21 بُغض، قتل، نشہ بازی، نچنڑ ٹپنڑ تے اِنہاں وانگوں بئے کَم۔ اِنہاں گالھیں دے بارے ءچ میں پہلے تُہاکُوں آکھیا ہا تےہُنڑ وَلا آہدھا ہاں، جو ایجھے کَم کرݨ آلے خُدا دی بادشاہی دے وارث نہ ہوسن۔

‏22 پَر رُوح القُدس دا پھل، مُحبت ، خوشی، اطمینان، صبر، مہربانی ،نیکی، اِیمان داری، ‏23 حلیمی تے پرہیزگاری ہے۔ ایجھے کَماں دی کوئی شریعت مخالفت نئیں کریندی۔ ‏24 تے جیہڑے مسیح یسوع دے ہِن اُنہاں آپنڑے جِسم کُوں اُوندی بُری خواہشاں تے جذبات سمیت مصلُوب کر ڈِیتا ہے۔ ‏25 جے اَساں رُوح القُدس دی وجہ کنُوں زندہ ہئیں تاں رُوح القُدس دی ہدایت دے مطابق زندگی گُزاروں۔ ‏26 اَساں غیر مناسب فخر، ہِک ڈوجھے کُوں بھڑکاوݨ تے ہِک ڈوجھے کنُوں حسدکرݨ چھوڑ ڈیؤں۔