ایہہ خط پَولُس رسُول ٦٠ ، ٦١ عیسوی دے درمیان اِفِسس دی کلیسیا کُوں لکھیا ہا۔ اُوں وقت اوہ شہر روم ءچ رومی حکومت دی قید ءچ ہَن۔ اِفِسس ہِک مشہور بندرگاہ ہئی جیہڑی ایشائے کوچک دے مغرب ءچ ہئی۔

اِفِسس دے مسیحی مختلف قوماں تے نسلاں نال تعلق رکھیندے ہَن۔ پَولُس اُنہاں کُوں اِیں خط دے ذریعے اتفاق تے میل ملاپ دی تعلیم ڈِتی۔

اِیں خط ءچ ہر زندگی دے ہر فرد مثلاً پائے، ذالاں، نوجواناں ، نوکراں تے مالکاں ساریاں کیتے کوئی نہ کوئی نصیحت موجود ہے۔ اِیندے علاوہ پَولُس اِنہاں گالھیں اُتے بہُوں زور ڈیندے ہِن۔

١۔ کلیسیا مسیح دا بدن ہے۔ اِیں بدن دا پاک تے بے عیب رَہوݨ تے ترقی کرݨ بہُوں ضرور ہے۔

٢۔ مسیح اُتے اِیمان گِھن آوݨ آلے خُدا دے فضل نال نجات گِھندے ہِن۔

٣۔ میل ملاپ دی رُوح مسیح اُتے اِیمان گِھن آوݨ نال مِلدی ہے ۔پَولُس کلیسیا کُوں ڈسیندے ہِن جو بُرائی دی طاقتاں نال جنگ کرݨ دا وقت آ گِیا ہے (پَولُس اِتھاں ایجھی جنگ دی گالھ کریندے ہِن جیہڑی اِبلیسی قوتاں دے نال خُدا دے کلام تے رُوحانی ہَتھیاراں نال لَڑی وَیندی ہے ۔ایہہ اَصلُوں دُنیا دی جنگ نئیں ) ۔اِیں واسطے کلیسیا کُوں تیار رَہونڑاں چاہیدا ہے (٦ : ١٢ ) تے اُنہاں کُوں تسلی ڈیندے ہوئے لکھدے ہِن جو اِیں جنگ ءچ فتح آخر کار اُنہاں کُوں تھیسی۔