اولاد تے ماں پِیُو
6
1 اے بالو! خُداوند ءچ آپنڑے ماں پِیُو دے فرمانبردار رَہو کیوں جو ایہہ واجب ہے۔ 2 ”آپنڑے ماں پِیُو دی عزت کر ۔“ ایہہ پہلا حُکم ہےجِیندے نال وعدہ وی ہے جو 3 ”تیڈا بھلا تھیوے تے تیڈی عُمر زمین اُتے دراز تھیسی ۔“4 تے اے اولاد آلیو! تُساں آپنڑے بالاں کُوں کاوڑ نہ ڈیواؤ a بلکہ خُداوند دی طرفوں تربیت تے نصیحت ڈے تے اُنہاں دی پرورش کرو۔
غُلام تے مالِک
5 اے نوکرو! آپنڑے دُنیاوی مالِکاں دی صاف دِلی نال ڈردے تے کَمبدے ہوئے فرمانبرداری کرو جِیویں مسیح دی کریندے ہِیوے۔ 6 آدمیاں کُوں خوش کرݨ آلیاں وانگوں محض ڈِکھاوے کیتے خدمت نہ کرو بلکہ مسیح دے خدمت گُزار ہوندے ہوئے دِل نال خُدا دی مرضی پُوری کرو۔ 7 تے اِیں خدمت کُوں آدمیاں دی نئیں بلکہ خُداوند دی سمجھ تے دِل نال کرو، 8 کیوں جو تُساں جانڑدے ہِیوے جو جیہڑا کوئی چنگا کَم کریسی، بھانویں اوہ غُلام ہووے یا آزاد خُداوند کنُوں اَجرپےسی۔
9 اے مالکو! تُساں وی دھمکیاں چھوڑ تے آپنڑے نوکراں نال ایجھا ای سلوک کر و کیوں جو تُساں جانڑدے ہِیوے جو اُنہاں دا تے تُہاڈا ڈوہائیں دا مالِک اَسمان اُتے ہے تے اوہ کہیں دا طرفدار نئیں۔
اِبلیس دے خلاف خُدا دے ڈِتے ہوئے ہتھیار تے لباس
10 آخری گالھ ایہہ ہے جو تُساں خُداوند ءچ تے اُوندی قُدرت دے زور ءچ مضبوط بنڑ وَنجو۔ 11 خُدا دے ڈِتے ہوئے سارے ہتھیارتے حفاظتی لباس پا گِھنو تاں جو تُساں اِبلیس دے منصوبیاں دا مُقابلہ کر سگو۔ 12 کیوں جو ساکُوں خون تے گوشت دے خلاف جنگ نئیں کرنڑی بلکہ حکومتاں، اِختیار آلیاں، اِیں دُنیا دے تاریکی دے حاکماں تے شریر رُوحانی قوتاں دے خلاف جیہڑیاں اَسمانی مقاماں ءچ ہِن۔ 13 اِیں واسطے تُساں خُدا دے سارےہتھیارتے حفاظتی لباس گِھن گِھنو تاں جو تُساں بدی دے ڈینہہ ءچ مُقابلہ کر سگو، تے سارا کُجھ انجام ڈے تے قائم رہ سگو۔
14 چنانچہ قائم رَہو یعنی سچائی نال آپنڑی کَمر بَدھ گِھنو، راستبازی دا بکتر بَدھ گِھنو۔ 15 صُلح دی خوشخبری دی تیاری دی جُتی پا گِھنو۔ 16 تے اِیندے علاوہ اِیمان دی ڈھال چاتی رکھو جِیندے نال تُساں شیطان دے سارے بَلدے ہوئے تیراں کُوں مسما سگو۔ 17 تے نجات دا خود b تے رُوح الُقدس دی تلوار کُوں جیہڑا خُدا دا کلام ہے گِھن گِھنو۔ 18 رُوح ءچ ہر وقت ہر طرحاں نال دُعا تے مِنت کریندے رَہو ،تےاِیں غرض نال جاگدے رَہو تے سارے مُقدساں کیتے ہروقت دُعا کریندے رَہو۔ 19 میڈے کیتے وی دُعا کرو تاں جو جِیں وَیلے کڈھائیں میکُوں بولنڑ دا موقع مِلےتاں میکُوں ایجھے الفاظ مِلنڑ جو خوشخبری دے راز کُوں دلیری نال ظاہر کر سگاں، 20 جِیندی خاطر میں زنجیر نال بَدھیا ہویا ایلچی ہاں، تےدُعا کرو جو میں اُونکُوں ایجھی دلیری نال بیان کراں جِیویں میڈے اُتے فرض ہے۔
اِختتامی سلام
21 تخِکُس جیہڑا عزیز بِھرا تے خُداوند ءچ وفادار خادم ہے، تُہاکُوں سارا کُجھ ڈسا ڈیسی تاں جو تُساں وی میڈے حالات کنُوں واقف تھی وَنجو۔ 22 میں اُونکُوں تُہاڈے کولھ اِیں غرض نال بھجیندا پِیا ہاں جو اوہ تُہاکُوں ساڈے حالات کنُوں واقف کروا تے تُہاڈے دِلاں کُوں تسلی ڈیوے۔