نُور ءچ زندگی گُزارنڑا
5
1 عزیز فرزنداں وانگوں، خُدا دے نمُونے اُتے چلوa۔ 2 تے تُساں وی مُحبت نال چلو جِیویں مسیح نیں ساڈے نال مُحبت کیتی تے ساڈے کیتے آپنڑے آپ کُوں خوشبو دار نذرانہ تے قُربانی دے طور تے خُدا کُوں ڈے ڈِتا۔3 جِیویں جو مُقدساں کُوں مناسب ہے تُہاڈے ءچ حرام کاری یا کہیں قِسم دی ناپاکی یا لالچ دا ناں تئیں نہ گِھدا وَنجے۔ 4 نہ ای بے شرمی، بَک بَک یا ٹھٹھا بازی دا، کیوں جو ایہہ مناسب نئیں بلکہ تُہاڈی زبان اُتے شُکر گُزاری ہووے۔ 5 کیوں جو تُساں ایہہ جانڑدے ہِیوے جو کہیں حرامکار، ناپاک یا لالچی شخص دی مسیح تے خُدا دی بادشاہی ءچ کوئی میراث نئیں کیوں جو لالچی شخص بُت پرست دے برابر ہے۔
6 کوئی تُہاکُوں فضول گالھیں نال دھوکا نہ ڈیوے، کیوں جو اِنہاں گالھیں دی وجہ کنُوں نافرماناں اُتے خُدا دا غضب نازل تھیند اہے۔ 7 اِیں واسطے ایجھے لوکاں دے کَماں ءچ شریک نہ تھیؤ۔ 8 کیوں جو پہلے تُساں تاریکی ءچ ہَوے پَر ہُنڑ خُداوند ءچ نُور ہِیوے۔ بس نُور دے فرزنداں دے وانگوں زِندگی گزارو۔ 9 کیوں جو نُور دا پھل ہر طرحاں دی نیکی، پرہیزگاری تے سچائی ہے۔ 10 تے تجربے نال معلوم کریندے رَہو جو خُداوند کُوں کیا پسند ہے۔ 11 تاریکی دے بے پھل کَماں ءچ شریک نہ تھیؤ بلکہ اُنہاں اُتے ملامت کیتا کرو۔ 12 کیوں جو لوکاں دے لُک چُھپ تے کیتے ہوئے کماں دا ذِکر کرنڑا وی شرم دی گالھ ہے۔ 13 تے ہر چیز نُور ءچ ظاہر کیتی وَیندی ہے کیوں جو جیہڑا کُجھ ظاہر کَیتا وَیندے، اوہ روشن تھی وَیندے۔ 14 اِیں واسطےفرمایا گِیا ہے جو
”اے سَمنڑ آلے جاگ
مُردیاں ءچوں زندہ تھی وَنج
تاں مسیح دا نُور تیڈے اُتے چمکسی۔“
15 بس غور نال ڈیکھو جو تُساں کیویں چلدے ہِیوے، بے سمجھاں وانگوں نئیں بلکہ سمجھداراں وانگوں چلو۔ 16 تے وقت کُوں غنیمت سمجھو کیوں جو ڈینہہ بُرے ہِن۔ 17 اَیں واسطے بے سمجھ نہ بنڑو بلکہ خُداوند دی مرضی معلوم کرو جو اوہ کیا ہے۔
18 شراب ءچ موالی نہ بنڑو کیوں جو ایہہ بدکار بنڑا ڈیندی ہے بلکہ رُوح القُدس نال بھریندے رَہو۔ 19 آپس ءچ مزامیر، حمد تے رُوحانی غزلاں گاندے رَہو تے خُداوند دی تعریف ءچ دِل نال گاندے وَجیندے رِیہا کرو۔ 20 تے ہمیشاں ہر گالھ ءچ ساڈے خُداوند یسوع مسیح دے ناں نال خُدا باپ دا شُکر کریندے رَہو۔
ذالاں تے پائے
21 تے مسیح دے خوف ءچ ہِک ڈوجھے دے تابع رَہو۔
22 اے ذالو! آپنڑے پایاں دے تابع رَہو جِیویں خُداوند دے۔ 23 کیوں جو پایا ذال دا سِر ہے، جِیویں مسیح آپنڑی کلیسیا دا سِر ہے تے اوہ بدن یعنی کلیسیا دا نجات ڈیوݨ آلا ہے۔ 24 اِیں واسطے جِیویں کلیسیا مسیح دے تابع ہے اُونویں ای ذالاں وی ہر ہِک گالھ ءچ آپنڑے پایاں دے تابع رَہوݨ۔
25 اے پایو! آپنڑی ذلاں نال اُونویں ای محبت رَکھو جِیویں مسیح نیں کلیسیا نال رکھی تے اُوندےکیتے آپنڑی جان ڈے ڈِتی، 26 تاں جو اوہ کلیسیا کُوں کلام دےذریعے پانڑی نال غسل ڈے تے صاف کر تے مُقدّس بنڑا ڈیوے، 27 تے ایجھی جلال آلی کلیسیا بنڑا تے آپنڑے کولھ حاضر کرے جِیندے ءچ کوئی داغ یا جُھری یا کوئی بِیا نُقص نہ ہووے بلکہ اوہ پاک تے بے عیب ہووے۔ 28 اِینویں ای پایاں کُوں چاہیدے جو آپنڑی ذالاں نال آپنڑے بدن وانگوں مُحبت رکھنڑ ۔جیہڑا آپنڑی ذال نال مُحبت رکھیندے، اوہ آپنڑے نال مُحبت رکھیندے۔ 29 کیوں جو کوئی شخص آپنڑے جِسم نال دُشمنڑی نئیں کریندا بلکہ اُونکُوں پَلیندا تے اُوندی پرورش کریندا ہے جِیویں مسیح کلیسیا دی کریندا ہے، 30 کیوں جو اَساں اُوندے بدن دے اَنگ ہئیں۔
31 ”اِیں وجہ تُوں مَرد آپنڑے ماں پِیُو کنُوں اَنج تھی تے
آپنڑی ذال دےنال رَہسی تے اوہ ڈوہائیں ہِک تَن ہوسن ۔“