‏2 یُوؤدیہ تے سُنتخے ڈوہائیں کُوں میڈی نصیحت ایہہ ہے جو اوہ خُداوند یسوع ءچ ہِک دِل رَہنڑ۔ ‏3 تے میڈے سچے ہم خدمت !میں تیکُوں وی عرض کریندا ہاں جو اِنہاں عورتاں دی مدد کر کیوں جو اُنہاں نیں کلیمینس تے میڈے ڈوجھے ہم خدمتاں سمیت میڈے نال خوشخبری سنڑاوݨ ءچ بہُوں محنت کیتی ہے۔ اِنہاں ساریاں دے ناں کِتاب ِحیات ءچ درج ہِن۔ ‏4 خُداوند ءچ ہر وقت خوش رَہو۔ وَلا آہدھا ہاں جو خوش رَہو۔

‏5 تُہاڈی نرم مزاجی سارے لوکاں اُتے ظاہر تھیوے۔ خُداوند قریب ہے۔ ‏6 کہیں گالھ دی فِکر نہ کرو، بلکہ ہر گالھ ءچ تُہاڈیاں درخاستاں، دُعا تے مِنت دے ذریعے خُدا دے سامنڑے شُکر گُزاری دے نال پیش کیتیاں وَنجنڑ۔ ‏7 وَل خُدا دا اِطمینان جیہڑا سمجھ کنُوں بالکل باہر ہے، تُہاڈے دِلاں تے خیالاں کُوں مسیح یسوع ءچ محفوظ رکھیسی۔

‏8 غرض اے بِھراؤ! جِتی گالھیں سچیاں ہن، جِتی گالھیں شرافت دیاں ہِن، جِتی گالھیں اِنصاف دیاں ہن، جِتی گالھیں پاک ہِن تے جِتی گالھیں دلکش تے پسندیدہ ہِن یعنی جیہڑیاں نیک تے قابل ِتعریف ہِن، اُنہاں اُتے غور کریندے ریہا کرو۔ ‏9 جیہڑے گالھیں تُساں میڈے کولُھوںسِکھیاں، حاصل کیتیاں، سُنڑیاں تے میڈے ءچ ڈِٹھیاں ہِن اُنہاں اُتے عمل کریندے رَہو تے خُدا جیہڑا اِطمینان دا چشمہ ہے تُہاڈے نال رَہسی۔

‏10 میں خُداوند ءچ بہُوں خوش ہاں جو اِتی مُدت دے بعد میڈے کیتے تُہاڈا خیال تازہ تھی گِیا۔ بے شک تُہاکُوں پہلے وی خیال ہا پَر تُہاکُوں موقع نہ مِلیا۔ ‏11 ایہہ نئیں جو میں مُتھاجی دے لحاظ نال آہدھا ہاں کیوں جو میں ہر حالت ءچ راضی رہنڑاں سِیکھ گِھدا ہے۔ ‏12 میں تنگ حالی کنُوں وی واقف ہاں تے خوشحالی کنُوں وی۔ ہر گالھ تے ہر حالت ءچ ، آسودگی تے فاقہ کشی ءچ ، مُتھاجی تے خوشحالی ءچ رَہنڑا سِیکھیا ہے۔ ‏13 میں یسوع المسیح دے وسیلے جیہڑا میکُوں طاقت بخشیندا ہے، سارا کُجھ کر سگدا ہاں۔

‏14 وَل وی تُساں چنگا کیتا جو میڈی مُصیبت ءچ شامل تھئے۔ ‏15 اے فِلپی دے رَہنڑ آلیو! تُساں چنگی طرحاں جانڑدے ہِیوے جو خوشخبری دے شروع ءچ جِیں وَیلے میں مَکِدُنیہ کنُوں روانہ تھیّا ہم تاں تُہاڈے سِوا کہیں کلیسیا نیں گِھننڑ ڈیوݨ دے معاملے ءچ میڈی مدد نہ کیتی۔ ‏16 جِیں وَیلے میں تِھسّلُنِیکے ءچ ہم تاں تُساں میڈیاں ضرورتاں کُوں پورا کرݨ کیتے ہِک واری نئیں بلکہ کئی واری مدد کیتی۔ ‏17 ایہہ نئیں جو میں کوئی تحفہ چاہندا ہاں بلکہ میں تُہاڈے کیتے اُنہاں برکتاں کُوں چاہندا ہاں جیہڑیاں ڈیوݨ نال مِلدیاں ہِن۔ ‏18 میڈے کولھ سارا کُجھ ہے بلکہ بہُوں ہے۔ تُہاڈے بھیجے ہوئے تحفے اِپَفرُدِتُس دے ہَتھوں گِھن تے میں مزید آسودہ تھی گِیا ہاں ۔ایہہ ہِک ایجھی خوشبودار تے مقبول قُربانی ہے جیہڑی خُدا کُوں پسند ہے۔ ‏19 میڈا خُدا آپنڑے جلال دی دولت دے نال تُہاڈی ہر ہِک ضرورت یسوع مسیح ءچ پوری کر ڈیسی۔ ‏20 ساڈے خُدا تے باپ دی ہمیشاں تئیں تعریف تھیندی رَہوے۔ آمین۔

‏21 سارے مقامی مُقدساں کُوں مسیح یسوع ءچ سلام آکھو۔ جیہڑے بِھرا میڈے نال ہِن، تُہاکُوں سلام آہدھے ہِن۔ ‏22 اِتھاں دے سارے مُقدساں، خاص طور تے قیصر دے گھر آلے تُہاکُوں سلام آہدھے ہِن۔

‏23 خُداوند یسوع مسیح دا فضل تُہاڈی رُوح دے نال رَہوے۔