‏1 غرض میڈے بِھراؤ ! خُداوند ءچ خوش رَہو ۔تُہاکُوں ایہہ گالھ وَلا وَلا لکھنڑ ءچ میکُوں تاں کوئی مسٔلہ نئیں تے اِیندے ءچ تُہاڈا تحفظ ہے۔ ‏2 اُنہاں کُتیاں، بدکاراں، جِسم کَٹواوݨ آلیاں کنُوں ہوشیار رَہو ^a۔ ‏3 کیوں جو اصلی مَختُون تاں اَساں ہئیں جیہڑے خُدا دے رُوح القُدس دی ہدایت نال عبادت کریندے، تے مسیح یسوع اُتے فخر کریندے ہئیں تے جِسم نال تعلق آلے گالھیں اُتے بھروسہ نئیں کریندے، ‏4 بھانویں جو میں تاں جِسم اُتے بھروسہ کر سگدا ہاں۔ جے کوئی جِسم اُتے بھروسہ کرݨ دا خیال کر سگدے تاں میں اِیں کنُوں وی زیادہ کر سگدا ہاں۔ ‏5 اَٹھویں ڈینہہ میڈا ختنہ تھیّا، میں اِسرائیلی قوم تے بِنیمِین دے قبیلہ کنُوں ہاں، عِبرانیاں دا عِبرانی۔ شریعت (اُتے عمل کرݨ )دے اعتبار نال میں فریسی ہاں، ‏6 جوش دے اعتبار نال کلیسیا کُوں ستاوݨ آلا تے شریعت دی راستبازی دے اعتبار نال بے اِلزام۔ ‏7 پَر جیہڑا کُجھ میڈے کیتے نفع دا باعث ہا، میں اُونکُوں مسیح دی خاطر نقصان سمجھ گِھدا ہے۔ ‏8 بلکہ میں آپنڑے خُداوند یسوع مسیح کُوں جاننڑ دی وَڈی خوبی دے مقابلہ ءچ ڈوجھیاں ساریاں چیزاں کُوں نقصان سمجھدا ہاں۔ اُوندی خاطر میں سارا نقصان برداشت کیتا تے اُنہاں کُوں گَند سمجھدا ہاں تاں جو مسیح کُوں حاصل کر گِھناں، ‏9 تے اُوندے ءچ ہوواں پَر شریعت دی طرفوں مِلنڑ آلی آپنڑی راستبازی دے نال نئیں بلکہ اُوں راستبازی دے نال جیہڑی مسیح اُتے اِیمان گِھن آوݨ دے نال حاصل تھیندی ہے ۔اوہ راستبازی جیہڑی اِیمان دی وجہ کنُوں خُدا دی طرفوں مِلدی ہے۔ ‏10 میں مسیح کُوں تے اُوندے زندہ تھیوݨ دی قُدرت کُوں جاننڑاں، اُوندےنال ڈُکھاں ءچ شریک تھیوݨ دا تجربہ حاصل کرنڑاں تے اُوندی مَوت نال مشابہت کرنڑاں چاہندا ہاں، ‏11 تاں جو کہیں طرحاں مُردیاں ءچوں زندہ تھیوݨ دے مقام تئیں پُج وَنجاں۔