پَولُس رسُول ایہہ خط کُلسی شہر دی کلیسیا کُوں ٦٠ ـ٦١ عیسوی دے دوران لکھیا ہا۔ اوہ اُوں وَت رُوم ءچ نظر بند ہَن ۔کُلسی شہر اِفسُس کنُوں تقریباً سو میل دُور مغرب ءچ ہا۔ اوہ ایہہ شہر ءچ کڈھائیں نہ گئے ہَن۔ اُنہاں کُوں اُتھوں دی کلیسیا دا حال اُوں وقت معلوم تھیّا جِیں وَیلے اوہ آپنڑے ڈوجھے تبلیغی دَورے دے سِلسلے ءچ اِفسُس رَہندے پئے ہَن۔

کُلسی دی کلیسیا ءچ ایجھے عقائد موجود ہَن جیہڑے مسیحی عقائد دے خلاف ہَن۔ اُتھوں دے مسیحیاں اِپفُردِتُس کُوں پَولُس دے کولھ بھیج تے عرض کیتی جو تُساں اُنہاں کُوں مسیح دی شخصیت دے بارے صحیح عقائد کنُوں واقف کرو۔ پَولُس جواب ءچ ایہہ خط لکھیا تے تخکس دے ہَتھ بھیجیا۔ اُنہاں اِیندے ءچ بہُوں چنگی گالھیں لکھیا ہِن تے خاص طور تے مسیح دی شخصیت دی تشریح کریندے ہِوے صحیح مسیحی عقائد اُتے گالھ مُہاڑ کیتی ہے۔ اُنہاں کُلسی دے مسیحیاں کُوں تاکید کیتی ہے جو اوہ اُنہاں لوکاں کنُوں ہوشیار رَہوݨ جیہڑے مشرکانہ سوچ کُوں فلسفے دی شکل ءچ پیش کریندے ہِن۔