‏2 شُکر گُزاری تے بےداری دے نال دُعا کرݨ ءچ مصروف رَہو۔ ‏3 تے ساڈے کیتے وی دُعا کرو جو خُدا ساڈے کیتے کلام دا دروازہ کھول ڈیوے تاں جو میں مسیح دے اُوں راز دی تبلیغ کر سگاں جِیندی وجہ کنُوں قید ءچ ہاں۔ ‏4 تے دُعا کرو جو میں اُونکُوں اِینویں صاف ظاہر کراں جِیویں میکُوں کرنڑا چاہیدے۔

‏5 وقت کُوں غنیمت جاݨ تے غیر اِیمان آلیاں دے نال ہوشیاری نال پیش آؤ۔ ‏6 تُہاڈی گُفتگو ایجھی فضل نال بھری تے دِلکش ہووے، جو تُہاکُوں ہر شخص کُوں مناسب جواب ڈیونڑا آ وَنجے۔

‏7 عزیز بِھرا تُخِکس جیہڑا وفادار خادم تے خُداوند دی خدمت ءچ میڈا ساتھی ہے میڈا سارا حال تُہاکُوں ڈسا ڈیسی۔ ‏8 میں اُونکُوں اِیں مقصد کیتے بھجیندا پِیا ہاں جوتُہاکُوں ساڈی حالت معلُوم تھی وَنجے تے تُساں تسلی پاؤ۔ ‏9 اُوندے نال اُنیسِمُس کُوں وی بھجیندا پِیا ہاں ۔اوہ وفادار تے عزیز بِھرا ہے بلکہ تُہاڈے ءچوں ای ہے۔ ایہہ ڈوہائیں تُہاکُوں اِتھوں دے سارے گالھیں ڈسا ڈیسن۔

‏10 اِرِسترخُس جیہڑا میڈے نال قید ءچ ہے تے مرقس جیہڑا برنباس دا رشتے دارہے تُہاکُوں سلام آہدھا ہے۔ تُہاکُوں مرقس کیتے ہدایت ڈِتی گئی ہے جو جے اوہ تُہاڈے کولھ آوے تاں اُونکُوں خوشی نال مِلائے۔ ‏11 تے یسوع ^aوی جیہڑا یُوستُس اَکھویندے تُہاکُوں سلام آہدھے۔ یہُودی ایمانداراںءچوں فقط اِیہو تَرے شخص خُدا دی بادشاہی دے پیغام دی تبلیغ کرݨ ءچ میڈے ہم خدمت تے میڈی تسلی دا باعث ریہے ہِن۔

‏12 اِپَفراس جیہڑا تُہاڈے ءچوں ہے تے مسیح یسوع دا خادم ہے تُہاکُوں سلام آہدھے۔ اوہ بہُوں محنت نال تُہاڈے کیتے دُعا کریندے جو تُساں خُدا دی پوری منشا ءچ کامل تے پُورے اعتقاد نال ثابت قدم رَہو۔ ‏13 میں اُوندے حق ءچ گواہی ڈیندا ہاں جو اوہ تُہاڈے کیتے تے لَودِیکیہ تے ہِیراپُلس دے لوکاں کیتے بہُوںمحنت کریندا ہے۔ ‏14 پیارا طبیب لُوقا تے دیماس تُہاکُوں سلام آہدھے ہِن۔

‏15 لَودِیکیہ دے بِھراواں تے نُمفاس (بھینڑ ) تے اُوندے گھر دی کلیسیا کُوں سلام اَکھائے۔ ‏16 جِیں وَیلے تُساں ایہہ خط پڑھ گِھنو تاں ایہہ لَودیکیہ دی کلیسیا ءچ وی پڑھیا وَنجے، تے جیہڑا خط لَودیکیہ دی کلیسیا دے ناں ہے اُونکُوں وی تُساں پڑھ گِھنائے۔ ‏17 ارخِپُّس کُوں اَکھائے جو جیہڑی خدمت خُداوند ءچ اُوندے سُپرد تھئی ہے اُونکُوں ہوشیاری نال کرے۔

‏18 میں پَولُس آپنڑے ہَتھ نال تُہاکُوں سلام لکھدا ہاں۔ میڈے زنزیراں کُوں یاد رکھائے۔ فضل تُہاڈےنال رَہوے۔