تھِسّلُنیکیاں دے ناں پولُس رسُول دا پہلا خط
پیش لفظ
پولُس رسُول آپنڑے ڈُوجھے تبلیغی سفر دے دوران تھِسّلُنِیکے شہر ءچ کلیسیا قائم کیتی۔ پر بعد ءچ جڈاں اُونکُوں تِیمُتِھیُس دی طرفوں اِیں کلیسیا دے حالات تے مسائل دی خبر مِلی تاں اُوں جواب ءچ ایہ خط لِکھیا۔
اِیں خط ءچ پولُس رسُول شُکر گُزاری کریندے جو تھِسّلُنِیکے دے اِیماندار ڈُکھاں دے باوجود آپنڑے اِیمان اُتے قائم ہِن۔ او اُنہاں دی حوصلہ افزائی کریندے جو مسیح ضرور واپس آسی تے اُوں ویلے اساں تکلیفاں تُوں ازاد تھی تے اُونکُوں مِلسُوں، تے نہ صرف اساں بلکہ او سبھ اِیماندار وی، جیہڑے مر گئے ہِن۔ پولُس رسُول نصیحت کریندے جو ساکُوں اُوں ڈینہہ دا اِنتظار کریندے ہوئے پاک راہونڑا ہے، ہِک ڈُوجھے نال محبت رکھنڑ، خدمت کرݨ تے خُدا کُوں خوش کرنڑا چاہیدے۔