تھِسّلُنِیکے مَکِدُنیہ دا صدر مقام ہا۔ پَولُس نیں آپنڑے ڈوجھے تبلیغی سفر دے دوران اِیں شہر ءچ کلیسیا قائم کیتی ہئی۔ ایہہ خط کلیسیا کُوں ٥٠ عیسوی دے دوران بھیجیا گِیا ہئی۔ پَولُس اُوں وقت کُرِنتِھُس ءچ ہئی۔ اِتھوں تِیمُتھِیُس جیہڑا تھِسّلُنِیکے کنُوں آیا ہا ،پَولُس رسُول کُوں مِلیا تے اُتھوں دی کلیسیا دے حالات کنُوں اُونکُوں آگاہ کِیتا۔ جِیں وَیلے پَولُس کُوں اُتھوں دی کلیسیا دے مسائل دا علم تھیّا تاں اُونیں جواب ءچ ایہہ خط لکھیا۔

اِیں خط ءچ پَولُس نیں آپنڑی اُوں تعلیم کُوں دُہرایا جیہڑی پہلے اِیں کلیسیا کُوں ڈے چُکیا ہا۔ تھِسّلُنِیکے دے جیہڑے لوک مسیحی تھی گئے ہَن اوہ ڈُکھاں دے باوجود آپنڑے اِیمان اُتے قائم ہَن۔ پَولُس آپنڑے خط ءچ اُنہاں دی حوصلہ افزائی کریندا ہے تے ڈسیندے جو زندگی دا مقصد خُدا کُوں خوش کرنڑا ہے۔ مسیح وَلا آوݨ آلا ہے۔ تے کلیسیا کُوں چنگی طرحاں محنت نال آپنڑے کَم کریندے رَہونڑا چاہیدا ہے۔

اِیں خط دے کُجھ مہینے بعد ڈوجھا خط لکھیا گِیا۔ اُوندے ءچ وی مسیحی تعلیمات کُوں پیش کِیتا گِیا ہے تے کلیسیا دی کُجھ اُنہاں غلط فہمیاں کُوں دُور کرݨ دی کوشش کیتی گئی ہے جیہڑیاں مسیح دی ڈوجھی آمد دے بارے ءچ ہِن۔ ایہہ ڈوہائیں خط پَولُس دی پہلی تحریراں ءچوں ہِن جیہڑیاں خُداوند یسوع مسیح دے مصلُوب تھیوݨ دے تقریباً ٢٠ سال بعد لکھیاں گئیاں ہَن۔