‏5 بس تُساں آپنڑی نفسانی خواہشاں کُوں مِٹا ڈیوو یعنی حرام کاری، ناپاکی، شہوت پرستی، بُری خواہش تے لالچ کُوں جیہڑی بُت پرستی دے برابر ہے۔ ‏6 کیوں جو اُنہاں دی وجہ نال نافرمانی دے فرزنداں اُتے خُدا دا غضب نازل تھیندے۔ ‏7 ہِک وقت ہا جیں ویلے تُساں اِنہاں ءچ زندگی گُزریندے ہَوےتے خود وی اُنہاں اُتے چلدے ہَوے۔

‏8 پَر ہُنڑ تُساں اِنہاں ساریاں کُوں یعنی کاوِڑ، ناراضگی، بغض، بدگوئی، تے آپنڑے مُنہ کنُوں مَندے کَڈھنڑاں چھوڑ ڈیؤ۔ ‏9 ہِک ڈوجھے نال کُوڑ نہ بولو کیوں جو تُساں آپنڑی پُرانڑی اِنسانیت کُوں اُوندے کَماں سمیت لَہا ڈِتا ہے۔ ‏10 تے نویں اِنسانیت کُوں پا گِھدا ہے، جیہڑی معرفت حاصل کرݨ کیتے آپنڑے خالق دی صورت اُتے نویں بنڑدی وَیندی ہے۔ ‏11 اِیں نویں زندگی ءچ نہ تاں کوئی یہُودی رِیہا، نہ یُونانی، نہ ختنہ آلا نہ نامَختُون ،نہ وحشی نہ جنگلی، نہ غلام نہ آزاد، فقط مسیح ای سارا کُجھ تے ساریاں ءچ ہے۔

‏12 بس تُساں خُدا دے چُنڑے ہُوے، پاک تے عزیز لوک ہِیوے، اِیں واسطے رحم، ہمدردی، فروتنی، حلیمی تے تحمل دی پُشاک پا گِھنّو۔ ‏13 ہِک ڈوجھے دی برداشت کرو تے جے ہِک ڈوجھے کنُوں کوئی شکایت ہووے تاں ہِک ڈوجھے کُوں معاف کرو۔ جِیویں خُداوند نیں تُہاکُوں معاف کیتے، اُونویں ای تُساں وی معاف کرو۔ ‏14 تے اُنہاں ساریاں خوبیاں اُتے محبت کُوں جیہڑا کاملیت دا کمر بند ہے، بَدھ گِھنو۔ ‏15 تے مسیح دے اِطمینان کُوں آپنڑے دِلاں اُتے حکومت کرݨ ڈیؤ، کیوں جو تُساں ہِک بدن تھیوݨ دی حیثیت نال صلح کیتے سَڈے گئے ہِیوے۔ تے تُساں شُکر گُزار رَہو۔ ‏16 مسیح دے کلام کُوں آپنڑے دِلاں ءچ کثرت نال رَہوݨ ڈیؤ تے کمال حِکمت دے نال ہِک ڈوجھے کُوں تعلیم ڈیؤ تے نصیحت کرو۔ تے آپنڑے دِلاں ءچ خُدا دی شُکر گُزاری کریندے ہوئے زبُور، حمد تے رُوحانی غزلاں گاؤ۔ ‏17 تے جیہڑا کُجھ تُساں آہدھے یا کریندے ہِیوے خُداوند یسوع دے ناں نال کرو تے اُوندے وسیلے نال خُدا باپ دا شُکر ادا کرو۔

‏18 اے ذالو! جِیویں خُداوند ءچ مناسب ہے، آپنڑے پایاں دے تابع رَہو۔

‏19 اے پایو! آپنڑی ذالاں نال محبت رکھو تے اُنہاں نال سختی نال پیش نہ آؤ۔

‏20 اے بالو! ہر گالھ ءچ ماں پِیُو دے فرمانبردار رَہو کیوں جو خُداوند کُوں ایہہ پسند ہے۔

‏21 اے اولاد آلیو! آپنڑے بالاں اُتے اِتی سختی نہ کرو، تاں جو اوہ بے دِل تھی وَنجنڑ۔

‏22 اے نوکرو! آپنڑے دُنیاوی مالکاں دے سارے گالھیں ءچ فرمانبردار رَہو، ڈِکھاوے کیتے نئیں جِیویں آدمیاں کُوں خوش کرݨ کیتے بلکہ خلوص دِلی تے خُدا دے خوف کنُوں۔ ‏23 جیہڑا کَم کرو اُونکُوں دِل نال کرو، جِیویں جو خُداوند کیتے کریندے پئے ہِیوے، نہ جو کہیں اِنسان کیتے۔ ‏24 کیوں جو تُساں جانڑدے ہِیوے جو تُہاکُوں اِیندے بدلہ ءچ خُداوند دی طرفوں میراث مِلسی۔ تُساں آپنڑے خُداوند مسیح دی خدمت کریندے پئے ہِیوے۔ ‏25 پَر بُرا کرݨ آلا آپنڑی بُرائی دا بدلہ پے سی کیوں جو خُدا کہیں دی طرفداری نئیں کریندا۔