خُداوند دی ڈوجھی آمد کیتے تیاری
5
1 بِھراؤ! ساکُوں وقت تے تاریخاں دے بارے ءچ تُہاکُوں لکھنڑ دی کوئی ضرورت نئیں۔ 2 کیوں جو تُساں چنگی طرحاں جانڑدے ہِیوے جو خُداوند دے ظہُور دا ڈینہہ اِینویں آوݨ آلا ہے جِیویں چور رات کُوں آندے۔ 3 جِیں وَیلے لوک آہدھے ہوسِن جو ”ہُنڑ اَمن تے سلامتی ہے“ اُوں وَیلے ہلاکت اِینویں آویسی جِیویں حاملہ عورت کُوں دَرد ِحمل شروع تھی وَیندے۔ تے اوہ اَصلُوں نہ بچ سِن۔ 4 پَر اے بِھراؤ! تُساں اَندھارے ءچ نئیں جو اوہ ڈینہہ چور دے وانگوں تُہاڈے اُتے آ پووے۔ 5 کیوں جو تُساں سارے نُوردے فرزند تے ڈینہہ دے فرزند ہِیوے۔ اَساں نہ رات دے ہئیں نہ اَندھارے دے۔ 6 اِیں واسطے اَساں ڈوجھیاں دے وانگوں سُتے نہ رَہوں بلکہ جاگدے تے ہوشیار رَہوں۔ 7 کیوں جو جیہڑے سَمدے ہِن اوہ رات کُوں سَمدے ہِن، تے جیہڑے پی تے مَست تھیندے ہِن اوہ وی رات کُوں تھیندے ہِن۔ 8 پَر اَساں ڈینہہ دے فرزند ہئیں اِیں واسطے ساکُوں چاہیدے جو اِیمان تے محبت دا بکتر لا تے، تے نجات دی اُمید دا خود aپا تے ہوشیار رَہوں۔ 9 کیوں جو خُدا نیں ساکُوں غضب کیتے مُقرر نئیں کِیتا بلکہ اِیں واسطے جو اَساں آپنڑے خُداوند یسوع مسیح دے وسیلے نال نجات حاصل کروں۔ 10 مسیح نیں ساڈی خاطر اِیں واسطے جان ڈِتی جو بھانویں اَساں اُوندی آمد دے ڈینہہ سُتے ہوؤں یا جاگدے ہوؤں، اُوندے نال ای زندہ رَہوں۔ 11 اِیں واسطے تُساں ہِک ڈوجھے دی حوصلہ افزائی کرو تے ترقی دا باعث بنڑو جِیویں جو تُساں کریندے وی پئے ہِیوے۔اِختتامی نصیحتاں تے سلام
12 پیارے بِھراؤ! اَساں تُہاکُوں درخاست کریندے ہئیں جو جیہڑے تُہاڈے ءچ محنت کریندے ہِن تے خُداوند ءچ تُہاڈے رَہنما ہِن تے تُہاکُوں نصیحت کریندے ہِن، اُنہاں دی قَدر کرو۔ 13 اُنہاں دی خدمت دی وجہ کنُوں محبت دے نال اُنہاں دی بہُوں عزت کرو ۔تے آپس ءچ میل مِلاپ رَکھو۔
14 اے بِھراؤ! اَساں تُہاڈی مِنت کریندے ہئیں جو آلسیاں کُوں سمجھاؤ، بے دِلاں کُوں ہِمت ڈیواؤ ، کمزوراں دی مدد کرو تے سارے لوکاں دے نال تحمل نال پیش آؤ۔ 15 خبردار ! کوئی کہیں دے نال بَدی دے بدلے بدی نہ کرے بلکہ ہر حال ءچ آپس ءچ تے سارے لوکاں دے نال نیکی کرݨ دی کوشش ءچ رَہو۔
16 ہر وقت خوشی مناؤ۔ 17 بلا ناغہ دُعا کرو۔ 18 ہر گالھ ءچ شُکر گُزاری کرو کیوں جو مسیح یسوع ءچ تُہاڈے کیتے خُدا دی اِیہو مَرضی ہے۔
19 رُوح القُدس کُوں نہ بُجھاؤ b ۔ 20 نبوتاں دی حقارت نہ کرو۔ 21 ہر گالھ کُوں اَزماؤ۔ جیہڑی چنگی ہووے اُونکُوں پکڑی رَہو۔ 22 ہر طرحاں دی بَدی کنُوں دُور رَہو۔
23 خُدا جیہڑا اِطمینان دا سر چشمہ ہے آپ ای تُہاکُوں مکمل طور تے پاک کرے۔ تے تُہاڈی رُوح ، جان تے تُہاڈے جِسم خُداوند یسوع مسیح دے آوݨ تئیں بے عیب تے محفوظ رَہنڑ۔ 24 تُہاڈا سَڈݨ آلا وفادار ہے تے اوہ اِینویں ای کریسی۔
25 بِھراؤ! ساڈے کیتے وی دُعا کرو۔
26 سارے بِھرانواں کُوں پاک بوسیاں دے نال میڈا سلام آکھو۔
27 میں خُداوند دے ناں ءچ تُہاکُوں تاکید کریندا ہاں جو سارے بِھرانواں کُوں ایہہ خط پڑھ تے سُنڑایا وَنجے۔
28 ساڈے خُداوند یسوع مسیح دا فضل تُہاڈے نال رَہوے۔