خُدا دی پسندیدہ زندگی
4
1 غرض اے بِھراؤ! اَساں تُہاڈی مِنت کریندے ہئیں تے خُداوند یسوع ءچ نصیحت کریندے ہئیں جو جِیویں تُساں ساڈے کنُوں تعلیم گِھدی ہے جو خُدا کُوں راضی کرݨ کیتے کِیویں زِندگی گزانڑی چاہیدی ہے تے جِیویں تُساں کریندے وی ہِیوے ہنڑ اِینویں کریندے رَہو بلکہ اُوندے ءچ خوب ترقی کرو۔ 2 کیوں جو تُساں جانڑدے ہِیوے جو اَساں خُداوند یسوع دی طرفوں تُہاکُوں کیا کیا حُکم ڈِتے۔ 3 خُدا دی مرضی ایہہ ہے جو تُساں پاک رَہو تے حرام کاری کنُوں بچے رَہو۔ 4 تے تُہاڈے ءچوں ہر ہِک پاک تے باعزت طریقہ نال آپنڑے جِسم کُوں قابو ءچ رکھنڑا جانڑے۔ 5 اُنہاں قوماں وانگوں شہوت پرستی ءچ زندگی نہ گُزارو، جیہڑیاں خُدا کُوں نئیں جانڑدیاں۔ 6 تے اِیں معاملے ءچ کوئی شخص آپنڑے بِھرا دے نال زیادتی تے دَغا نہ کرے کیوں جو خُداوند ایجھے کَم کرݨ آلیاں کُوں سزا ڈیسی جِیویں جو اَساں تُہاکُوں پہلے ای ڈسا تے خبردار کر چُکے ہئیں۔ 7 کیوں جو خُدا نیں ساکُوں ناپاکی کیتے نئیں بلکہ پاکیزگی کیتے سَڈیا ہے۔ 8 اِیں واسطے جیہڑا ایہہ نئیں مَنیندا اوہ اِنسان کُوں نئیں بلکہ خُدا کُوں نئیں مَنیندا، جیہڑا تُہاکُوں رُوح القُدس عطا کریندے۔9 ہُنڑ برادرانہ محبت دے بارے ءچ تُہاکُوں کُجھ لکھنڑ دی ضرورت نئیں کیوں جو خُدا نیں خُود تہاکُوں ہِک ڈوجھے نال محبت کرݨ سِکھا یا ہے، 10 تے تُساں مَکِدُنیہ دے سارے بِھراواں نال محبت کریندے ہِیوے۔ وَل وی اے بِھراؤ! اَساں تُہاکُوں نصیحت کریندے ہئیں جو اِیندے ءچ بِیا وی ترقی کریندے رَہو۔ 11 تے جِیویں اَساں تُہاکُوں حُکم ڈے چُکے ہئیں، ہر ہِک شخص چُپ چاپ رَہوݨ ، آپنڑے کَم ءچ لگارَہوݨ تے آپنڑے ہَتھ نال محنت کر تے روٹی کماوݨ دی کوشش کرے۔ 12 اِینویں تُساں باہر آلیاں دے سامنڑے عزت دار زندگی گُزریسو تے کہیں چیز دے مُتھاج نہ رَہسو۔
خُداوند دی ڈوجھی آمد
13 بِھراؤ! اَساں نئیں چاہندے جو تُساں اُنہاں دے حال کنُوں ناواقف رَہو جیہڑے سَم گئے ہِن تاں جو اُنہاں وانگوں غم نہ کرو جِنہاں کُوں کوئی اُمید ای نئیں۔ 14 کیوں جو جِیں وَیلے ساکُوں یقین ہے جو یسوع مَر گِیا تے وَلا زندہ تھی گِیا تاں اَساں ایہہ وی یقین رکھیندے ہئیں جو خُدا اُنہاں کُوں وی جیہڑے مسیحی ہوندے ہوئے سَم گئے ہِن، یسوع دے نال وَلا گِھن آسی۔
15 اِیں واسطے اَساں خُداوند دی طرفوں تُہاکُوں آہدھے ہئیں جو اَساں جیہڑے زندہ ہئیں تے خُداوند دے آوݨ تئیں باقی رَہسوں، اُنہاں کنُوں پہلے ہر گِز اُونکُوں نہ مِلسُوں جیہڑے پہلےسَم گئے ہِن۔ 16 کیوں جو خُداوند خود وَڈی للکار تے مُقرب فرشتہ دی آواز ، تے خُدا دے نرسنگے دے پھونکے وَنجنڑ دے نال اَسمان کنُوں تَلے لہہ آسی تے پہلے تاں اوہ جیہڑے مسیح ءچ مَر چُکے ہِن زندہ تھی وَیسن۔ 17 وَل اَساں جیہڑے باقی ہئیں اُنہاں دے نال بدلاں اُتے چا گِھدے وَیسوں تاں جو ہوا ءچ خُداوند دا اِستقبال کرؤں تےاِیویں ہمیشاں اُوندے نال رَہسوں۔ 18 بس تُساں اِنہاں گالھیں نال ہِک ڈوجھے کُوں تسلی ڈِتا کرو۔