‏3 پَر خُداوند وفادار ہے۔ اوہ تُہاکُوں مضبوط کریسی تے شیطان کنُوں محفوظ رکھیسی۔ ‏4 ساکُوں خُداوند ءچ یقین ہے جو جیہڑا حُکم اَساں تُہاکُوں ڈیندے ہئیں، تُساں اُوندے اُتے عمل کریندے ہِیوے تے کریندے رَہسو۔

‏5 خُداوند تُہاڈے دِلاں کُوں خُدا دی مُحبت تے آپنڑے صبر دی ہدایت ڈیوے۔

‏6 اے بِھراؤ! اَساں آپنڑے خُداوند یسوع مسیح دے ناں ءچ تُہاکُوں حُکم ڈیندے ہئیں جو ہر ہِک بِھرا کنُوں دُور رَہو جیہڑا آلسی ہووے تے اُوں تعلیم دے مطابق نئیں چلدا جیہڑی اُونکُوں ساڈی طرفوں مِلی۔ ‏7 تُساں آپ جانڑدے ہِیوے جو تُہاکُوں کِیویں ساڈے نمُونے اُتے چلنڑا چاہیدے کیوں جو اَساں تُہاڈےدرمیان آلسی نہ ہاسے، ‏8 تے نہ ای اَساں کہیں دی روٹی مُفت ءچ کھاندے ہاسے بلکہ ڈینہہ رات محنت مُشقت کریندے ہاسے تاں جو تُہاڈے ءچوں کہیں اُتے بھار نہ بنڑوں۔ ‏9 اِیں واسطے نئیں جو ساڈا تُہاڈے اُتے کوئی حق نہ ہا بلکہ اِیں واسطے جو ایجھا نمونہ پیش کروں جو تُساں ساڈے وانگوں بنڑ سگو۔ ‏10 جِیں وَیلے اَساں تُہاڈے کولھ ہاسےتاں اُوں وَیلے وی تہاکُوں ایہہ حُکم ڈیندے ہاسے جو”جیہڑا آدمی کَم کرݨ نئیں چاہندا، اوہ کھاوے وی نہ۔“

‏11 اَساں سُنڑیا ہے جو تُہاڈے ءچ کُجھ ایجھے وی ہِن جیہڑے آلسی ہِن تےخود تاں کُجھ کریندے نئیں پَر ڈوجھیاں دے کَم ءچ دَخل ڈیندے ہِن۔ ‏12 ایجھے لوکاں کُوں اَساں خُداوند یسوع مسیح دے ناںءچ حُکم ڈیندے ہئیں تے نصیحت کریندے ہئیں جو اوہ خاموشی نال آپنڑا کَم کر تے محنت دی روٹی کھاوݨ۔

‏13 تے تُساں اے بِھراؤ! نیک کَم کرݨ ءچ ہِمت نہ ہارو۔ ‏14 جے کوئی ساڈے اِیں خط ءچ لکھی ہوئی نصیحت کُوں نہ مَنے تاں اُوندے اُتے نِگاہ رَکھو تے اُوندے نال تعلق چھوڑ ڈیؤ تاں جو اوہ شرمسار تھیوے۔ ‏15 پَر اُونکُوں دُشمنڑ نہ سمجھو بلکہ بِھرا سمجھ تے نصیحت کرو۔

‏16 ہُنڑ خُداوند جیہڑا اِطمینان دا چشمہ ہے خود تُہاکُوں ہمیشاں تے ہر حالت ءچ اِطمینان بخشے۔ خُداوند تُہاڈے ساریاں دے نال رَہوے۔

‏17 میں پَولُس آپنڑے ہَتھ نال سلام لکھدا ہاں۔ ہر خط ءچ میڈا اِیہو نِشان ہے جو میں اِینویں ای لکھدا ہاں۔

‏18 ساڈے خُداوند یسوع مسیح دا فضل تُہاڈے ساریاں دے نال رَہوے۔