پَولُس نیں ایہہ خط آپنڑی زندگی دےآخری ڈینہاں ءچ تقریباً چوریَٹھ(٦٤ ) عیسوی دے درمیان آپنڑے ہِک شاگرد تِیمُتھِیُس کُوں لکھیا ہا جِینکُوں اُونیں آپنڑے پوتر وانگوں پیار کِیتا۔ تِیمُتھِیُس اُوں وقت اِفسُس ءچ رَہندا ہا تے اُتھوں دی کلیسیا دا نگہبان ہا۔ اوہ پَولُس دے ڈوجھے تبلیغی سفر ءچ اُوندا سنگتی ہا۔

تِیمُتھِیُس دا پِیُو یُونانی ہا پَر ماں اِسرائیلی نسل ءچوں ہئی۔ پَولُس نیں اُونکُوں لکھیا جو اوہ اِفسُس دی کلیسیاکُوں کُوڑی تعلیم دے بارے ءچ خبردار کرے۔ اُنہاں ڈینہاں ءچ کلیسیا ءچ مسیحی رَسماں ، تعلیمات، کلیسیائی نظام تے مسیحی زندگی دےبارے ءچ مختلف سوال پُچھے وَیندے ہَن۔ اِیں واسطے پَولُس نیں ایہہ خط لکھ تے کُجھ سوالاں دے جواب ڈِتے ہِن۔ اِیں خط ءچ کلیسیا دے عہدہ داراں کُوں مُقرر کرݨ کیتے خاص ہدایت ڈِتی گئی ہے تے اُنہاں دے نیک کردار تے مسیحی تعلیمات کنُوں صحیح واقفیت دی اہمیت بیان کیتی گئی ہے۔ ایہہ وی ڈسایا گِیا ہے جو دُعا کرݨ دا صحیح طریقہ کیا ہے تے کلیسیا ءچ عورتاں دا مقام کیا ہے۔

پَولُس نیں تِیمُتھِیُس کُوں ڈوجھا خط غالباً سَتیٹھ ( ٦٧ ) عیسوی دے دوران لکھیا ہا۔ اِیں خط کنُوں معلوم تھیندے جو پَولُس کُوں آپنڑی نظربندی دے بعد تِیمُتھِیُس دے کولھ وَنجڑ دی اُمید ہئی۔ اِیندے ءچ کُجھ اِشارے سنگتیاں دی بے وفائی دو ہِن۔ اِیویں لگدے جو پَولُس دے کُجھ سنگتیاں نیں ہِک ہِک کر تے اُونکُوں مِلنڑا بند کر ڈِتا ہا۔ نظر بندی دی زندگی نیں اُونکُوں تھکا ڈِتا ہا تے اوہ اِیں عالم ِ بقا تُوں کُوچ کرݨ دا مُنتظر ہا۔

پَولُس آپنڑی نظر بندی کنُوں رہائی پاوݨ دے بعد ہِک ڈو سال تئیں آزاد رِیہا پَر وَلا گرفتار تھی تے شہنشاہ نِیرو دے زمانے ءچ شہید کر ڈِتا گِیا۔

اِنہاں ڈوہائیں خطاں کنُوں پَولُس دے مسیحی اِیمان دی پُختگی، مسیح نال محبت تے وفاداری تے اُوندی قوت ِ برداشت دا پتا چلدا ہے۔