گُناہ دا شخص
2
1 اے بِھراؤ، اَساں آپنڑے خُداوند یسوع مسیح دی ڈوجھی آمد تے اُوندے کولھ جمع تھیوݨ دے بارے ءچ تُہاکُوں ایہہ درخواست کریندے ہئیں، 2 جو تُساں کہیں رُوح کنُوں، کہیں کلام کنُوں تے کہیں خط کنُوں پریشان نہ تھیوائے تے نہ گھبرائے، جیہڑا ساڈی طرفوں معلُوم تھیوے تے دعویٰ کرے جو خُداوند دی آمد دا ڈینہہ آ گیا ہے۔ 3 کہیں طرحاں وی کہیں دے فریب ءچ نہ اَوائے۔ کیوں جو اوہ ڈینہہ اُوں وَیلے تئیں نہ آسی جئیں تئیں جو لوک خُدا کنُوں برگشتہ نہ تھی وَنجنڑ، تے اوہ بے دین شخص یعنی ہلاکت دا فرزند ظاہر نہ تھی وَنجے۔ 4 اوہ مخالفت کریندے تے ہر ہِک کنُوں جیہڑا معبود اَکھویندے یا جِیندی پُوجا تھیندی ہے، آپنڑے آپ کُوں وَڈا بنڑیندے۔ اِتھوں تئیں جو اوہ خُدا دے مَقدِس ءچ بَہہ تے دعویٰ کریندے جو اوہ خُدا ہے۔5 کیا تُہاکُوں یاد نئیں جو جِیں وَیلے میں تُہاڈے کولھ ہَم تاں تُہاکُوں ایہہ گالھیں ڈسیندا رَہندا ہَم ؟ 6 تے تُساں جانڑدے ہِیوے جو صرف آپنڑے مُقررہ وقت تے ظاہر تھیوݨ کنُوں اُونکُوں کیہڑی چیز روکی پئی ہے۔ 7 کیوں جو بے دینی دی لُکی ہوئی قوت ہُنڑ وی آپنڑا اَثر کریندی پئی ہے، پَر ہِک روکنڑ آلا وی ہے تے جئیں تئیں اوہ رستے کنُوں ہَٹایا نہ وَنجے اوہ اُونکُوں روکی رکھیسی۔ 8 وَل اوہ بے دین ظاہر تھیسی جِینکُوں خُداوند یسوع آپنڑے مُنہ دی پھونک نال مار سَٹیسی تے آپنڑی آمد دی تجّلی نال برباد کر ڈیسی۔ 9 اِیں بے دین دی آمد شیطان دے اَثر دے مطابق ہر طرحاں دی کُوڑی قُدرت، نِشاناں تے عجیب کماں دے نال ہوسی۔ 10 تے ہلاک تھیوݨ آلیاں کیتے بُرائی دے ہر طرحاں دے دوکھے دے نال ہوسی۔ اِیں واسطے جو اُنہاں حق کُوں قبول کرݨ تُوں اِنکار کیتا جِیندے وسیلے اوہ نجات پیندے۔ 11 اِیں وجہ کنُوں خُدا اُنہاں کُوں گُمراہی ءچ پھسنڑ ڈیندے تاں جو اوہ کُوڑ کُوں سچ مَننڑ۔ 12 تےجِتی لوک سچائی دا یقین نئیں کریندے بلکہ بُرائی کُوں پسند کریندے ہِن، اوہ سارے سزا پے سِن۔
تُساں نجات کیتے چُنڑے گئے ہِوے
13 پَر اے بِھراؤ خُداوند دے پیاریو! تُہاڈے کیتے خُدا دا شُکر کریندے رَہوݨ ساڈے اُتے فرض ہے کیوں جو اُونیں تُہاکُوں شروع کنُوں ای چُنڑ گِھدا ہا جو تُساں رُوح القُدس دے ذریعے پاکیزگی حاصل کر تے، تے حق اُتے اِیمان گِھن آ تے نجات پاؤ۔ 14 اِیں نجات کیتے خُدا نیں تُہاکُوں ساڈی خوشخبری دے ذریعے سَڈیا تاں جو ساڈے خُداوند یسوع مسیح دے جلال کُوں حاصل کرو۔ 15 اِیں واسطے اے بِھراؤ! ثابت قدم رَہو تے اُنہاں تعلیمات اُتے قائم رہوجیہڑیاں تُساں ساڈی زبانی سُنڑیاں یا ساڈے خط دے ذریعے سِکھیاں۔