تیکُوں خُدا باپ تے ساڈے خُداوند یسوع مسیح دی طرفوں فضل، رحم تے اطمینان حاصل تھیندا رَہوے۔

‏3 جِیویں مَکِدُنیہ تُوں روانہ تھیندے وَیلے میں تیکُوں نصیحت کیتی ہئی جو تُوں اِفِسُس ءچ رہ تے، غلط تعلیم ڈیوݨ آلیاں کُوں تاکید کر جو اوہ اِینویں کرݨ کنُوں باز آ وَنجنڑ۔ ‏4 تے فرضی داستاناں تے بے شُمار نسب نامیاں اُتے غور نہ کرݨ جیہڑے تکرار دی وجہ تھیندے ہِن تے نہ ای اُوں خُدا دےنِظام دے مطابق ہے جِیندی بُنیاد اِیمان اُتے ہے۔ ‏5 اِیں نصیحت دا مقصد ایجھی محبت ہے جیہڑی پاک دِلی، نیک نیتی تے حقیقی اِیمان نال پیدا تھیندی ہے۔ ‏6 کُجھ لوک اِنہاں کنُوں ہَٹ گئے ہِن تے فضول گالھیں دو متوجہ تھی گئے ہِن۔ ‏7 اوہ شریعت دے عالم بننڑاں چاہندے ہِن پر جیہڑے گالھیں اوہ آہدھے ہِن تےجِنہاں دا یقین نال دعویٰ کریندے ہِن، اُنہاں کُوں خود وی نئیں سمجھدے۔

‏8 اَساں جانڑدے ہئیں جو شریعت چنگی ہے، شرط ایہہ ہے جو اُونکُوں مُناسب طور تے استعمال کِیتا وَنجے۔ ‏9 اَساں ایہہ وی جانڑدے ہئیں جو شریعت راستبازاں کیتے نئیں بلکہ بے شرع لوکاں، باغیاں، بےدیناں، گُنہگاراں، بدکاراں ،احترام نہ کرݨ آلیاں ،تے ماں پِیُو دے قاتلاں، خونیاں ‏10 تے اُنہاں کیتے جیہڑے زِنا کار ہِن، چھوہر باز ہِن، بردہ فروشی کریندے ہِن، کُوڑ مَریندے ہِن، کُوڑیاں قَسماں کھاندے ہِن، تے ایجھے بہُوں کَم کریندے ہِن جیہڑے اُوں صحیح تعلیم دے خلاف ہِن۔ ‏11 ایہہ صحیح تعلیم خُدائے مُبارک دے جلال دی اُوں خوشخبری دے مطابق ہے جیہڑی میڈے سپُرد کیتی گئی ہے۔

‏12 میں آپنڑے خُداوند یسوع مسیح دا شُکر کریندا ہاں جئیں میکُوں طاقت ڈِتی تے دیانتدار جاݨ تے آپنڑی خدمت کیتے مُقرر کیتا۔ ‏13 بھانویں میں پہلے کُفر بکنڑ آلا، ستاوݨ آلا تے بے عزت کرݨ آلا ہَم پَر میڈے اُتے رحم تھیّا کیوں جو میں اِیمان گِھن آوݨ کنُوں پہلے تے نادانی ءچ ایہہ سارا کُجھ کیتا ہا۔ ‏14 تے ساڈے خُداوند دا فضل اُوں اِیمان تے محبت نال جیہڑا مسیح یسوع ءچ ہے، میڈے اُتے بہُوں زیادہ تھیّا۔ ‏15 ایہہ گالھ سچ تے ہر لحاظ نال قبول کرݨ دے لائق ہے جو ” مسیح یسوع گُنہگاراں کُوں نجات ڈیوݨ کیتے دُنیا ءچ آیا،“ جِنہاں ءچوں ساریاں کنُوں وَڈا گُنہگار میں ہاں۔ ‏16 پَر میڈے اُتے اِیں واسطے رحم تھیّا جو خُداوند یسوع مسیح میڈے ذریعے جیہڑا وَڈا گُنہگار ہاں، آپنڑا کمال تحمل ظاہر کرے تاں جو میں اُنہاں ساریاں کیتے نمونہ بنڑ سگاں جیہڑے ہمیشاں دی زندگی کیتے اُوندے اُتے اِیمان گِھن آسن۔ ‏17 ہُنڑ ازلی تے اَبدی بادشاہ یعنی اُوں غیر فانی، نادیدہ واحد خُدا دی عزت تے تعریف ہمیشاں تئیں تھیندی رَہوے۔ آمین۔

‏18 میڈے فرزند تِیمُتھِیُس! میں تیکُوں اُنہاں پیشنگوئیاں دے مطابق جیہڑیاں تیڈے بارے ءچ کِیتیاں گِیاں ہِن ایہہ نصیحت ڈیندا ہاں تاں جو تُوں اُنہاں دی مدد نال چنگی کُشتی لَڑیں۔ ‏19 تے اِیمان تے نیک نیتی اُتے قائم رَہویں، کیوں جو کُجھ لوکاں نیں اِینکُوں رد کر ڈِتے، تے آپنڑے ایمان دا بیڑا غرق کر ڈِتے۔ ‏20 اُنہاں ءچ ہُمِنِیُس تے سکندر وی ہِن، جِنہاں کُوں میں شیطان دے حوالے کر ڈِتے تاں جو اوہ کُفر بکنڑ کنُوں باز رَہونڑا سِکھنڑ۔