کلیسیا دے رَہنما
3
1 ایہہ گالھ سچ ہے جو ”جیہڑا شخص کلیسیا ءچ نِگہبان دا عُہدہ چاہندا ہے اوہ چنگے کَم دی خواہش کریندا ہے۔“ 2 اِیں واسطے نگہبان کُوں چاہیدے جو اوہ بے اِلزام، ہِک ذال دا پایا، پرہیزگار، مُتّقی، شریف، مہمان نواز تے تعلیم ڈیوݨ دے لائق ہووے۔ 3 شرابی تے مار کُٹائی کرݨ آلا نہ ہووے بلکہ نرم مزاج ہووے تے نہ بحث کرݨ آلا تے نہ زَر دوست ہووے۔ 4 اوہ آپنڑے گھر دا چنگی طرحاں بندوبست کرݨ آلا ہووے تے آپنڑے بالاں کُوں بہُوں سنجیدگی دے نال قابو ءچ رکھنڑ آلا ہووے۔ 5 کیوں جو جے کوئی آپنڑے ای گھر کُوں نئیں سنبھال سگدا تاں اوہ خُدا دی کلیسیا دی ڈیکھ بھال کیویں کریسی؟ 6 اوہ نو مُرید نہ ہووے تاں جو تکبر کر تے اِبلیس جِیہی سزا نہ پاوے۔ 7 غیر ایمانداراں ءچ وی نیک ناں ہووے تاں جو کوئی اُونکُوں لعن طعن نہ کرے تے اوہ اِبلیس دے پھندے ءچ پَھس نہ وَنجے۔کلیسیا ءچ مددگار
8 اِینویں ای جماعت دے منتظمین کُوں وی چاہیدے جو اوہ سنجیدہ مزاج ہووݨ ، ڈو زباناں آلے، شرابی تے پیسے دے لالچی نہ ہووݨ۔ 9 اِیمان دے راز کُوں نیک نیتی نال محفوظ رکھنڑ۔ 10 تے ایہہ پہلے چنگی طرحاں پرکھے وَنجنڑ ، وَل جے بے اِلزام نِکلنڑ تاں اُنہاں کُوں منتظمین بننڑ ڈیؤ۔ 11 عورتاں کُوں وی چاہیدے جو اوہ سنجیدہ مزاج ہووݨ ، ڈوجھیاں کُوں بدنام کرݨ آلیاں نہ ہووݨ بلکہ پرہیز گار تے ہر گالھ ءچ اِیماندار ہووݨ۔ 12 منتظمین ہِک ذال آلے ہووݨ تے آپنڑے بالاں تے گھراں دے بندوبست کُوں چنگی طرحاں سنبھالنڑ آلے ہووݨ۔ 13 کیوں جو جیہڑے منتظمین چنگی خدمت کریندے ہِن اوہ چنگا مرتبہ پیندے ہِن تے مسیح یسوع اُتے آپنڑے اِیمان ءچ وی دلیری حاصل کریندے ہِن۔
وَڈا بھید
14 میں تیڈے کولھ جلدی آوݨ دی اُمید کریندا پِیا ہاں، وَل وی تیکُوں ایہہ گالھیں ایں واسطے لکھدا پِیا ہاں، 15 جو جے میکُوں آوݨ ءچ دیر تھی وَنجے تاں تیکُوں معلوم ہووے جو خُدا دے گھر آلیاں دا چل چلنڑ کیویں ہوونڑا چاہیدے۔ اوہ زِندہ خُدا دی کلیسیا تے حق دا تھمبا تے بنیاد ہے۔
16 اِیندے ءچ کوئی اِختلاف نئیں جو ساڈے ایمان دا راز وَڈا ہے یعنی
اوہ جِسم ءچ ظاہر تھیّا،
رُوح دے وسیلے نال صادق ثابت تھیّا
فرشتیاں کُوں ڈِکھالی ڈِتا،
غیر قوماں ءچ اُوندی تبلیغ تھئی
دُنیا ءچ لوک اُوندے اُتے اِیمان گِھن آئے
تے اوہ جلال ءچ اَسمان اُتے چاتا گِیا۔