‏6 جے تُوں بِھرانواں کُوں ایہہ گالھیں یاد کرویسیں تاں مسیح یسوع دا چنگا خادم تھیسیں، تے اِیندے نال اُوں اِیمان تے چنگی تعلیم دے گالھیں نال پرورش پے سیں جِیندے اُتے تُوں عمل کریندا آ یا ہئیں۔ ‏7 پَر اُنہا بے ہُودہ تے پُرانڑی عورتاں آلیاں داستاناں کنُوں کنارہ کر بلکہ دینداری کیتے ریاضت کر۔ ‏8 کیوں جو جِسمانی ریاضت کنُوں تھوڑا فائدہ تاں تھیندے پَر دینداری ہر لحاظ نال فائدہ مند ہوندی ہے تے اِیندے ءچ نہ فقط موجودہ زندگی دا بلکہ آوݨ آلی زندگی دا وعدہ وی موجود ہے۔ ‏9 ایہہ گالھ سچ تے ہر لحاظ نال قبول کرݨ دے لائق ہے۔ ‏10 ایں واسطے اَساں سخت محنت کریندے ہئیں کیوں جو اَساں آپنڑی اُمید اُوں زندہ خُدا اُتے رکھی ہے جیہڑا سارے اِنساناں، خاص کر اِیمانداراں دا نجات ڈیوݨ آلا ہے۔

‏11 اِنہاں گالھیں دی تعلیم ڈے تے اِنہاں اُتے عمل کرݨ دا حُکم ڈے۔ ‏12 کوئی وی تیڈی جوانی دی حقارت نہ کر سگے بلکہ تُوں اِیمانداراں کیتے کلام کرݨ، چال چلنڑ، محبت تے پاکیزگی ءچ نمونہ بنڑ۔ ‏13 میڈے آوݨ تئیں خُدا دے کلام پڑھن، نصیحت کرݨ تے تعلیم ڈیوݨ ءچ مشغول رہ۔ ‏14 اُوں نعمت تُوں غافل نہ رہ جیہڑی تیکُوں نبوت دے ذریعے، جماعت دے بزُرگاں دےتیڈے اُتے ہَتھ رکھنڑتُوں مِلی ہے۔ ‏15 اِنہاں گالھیں اُتے غور کر، تے آپنڑے آپ کُوں مُکمل طور تے اُنہاں کیتے وقف کر ڈے تاں جو سارے لوک تیڈی ترقی ڈیکھنڑ۔ ‏16 آپنڑے کردار تے آپنڑی تعلیم دا خاص خیال رکھ۔ اِنہاں گالھیں اُتے عمل کریندا رہ کیوں جو اِینویں کرݨ نال تُوں آپنڑی تے آپنڑے سُننڑ آلیاں دی نجات دا باعث تھی سیں۔