‏2 پیارے پوتر تِیمُتھِیُس دے ناں۔ ساڈے خُدا باپ تے خُداوند یسوع مسیح دی طرفوں تیکُوں فضل، رحم تے اطمینان حاصل تھیندا رَہوے۔

‏3 میں خُدا دا شُکر ادا کریندا ہاں جِیندی عبادت میں پِیُو ڈاڈےدی طرحاں نیک نیتی نال کریندا ہاں، تے تیکُوں ڈینہہ رات آپنڑی دُعاواں ءچ یاد کریندا ہاں۔ ‏4 تیڈے ہَنجُوواں کُوں یاد کر تے میں تیکُوں مِلنڑ دی سِک رکھیندا ہاں تاں جو تیکُوں مِل تے خوش تھی سگاں۔ ‏5 میکُوں تیڈا اوہ بے ریا اِیمان وی یاد آندا ہے جیہڑا پہلے تیڈی نانی لُوئِس تے تیڈی ماں یُونیکے دا ہا تے میکُوں یقین ہے جو اُوہو اِیمان تیڈا وی ہے۔ ‏6 اِیہو وجہ ہے جو میں تیکُوں یاد ڈیویندا ہاں جو خُدا دی اُوں نعمت کُوں چمکا ڈے جیہڑی میڈے ہَتھ رَکھنڑ نال تیکُوں حاصل تھئی ہے۔ ‏7 کیوں جو خُدا نیں ساکُوں دہشت دی رُوح نئیں ڈِتی بلکہ قوت ، محبت تے تربیت دی رُوح ڈِتی ہے۔

‏8 بس تُوں ساڈے خُداوند دی گواہی ڈیوݨ تے میڈے تُوں جیہڑا اُوندی خاطر قیدی ہاں، شرم نہ کر بلکہ میڈے نال خُدا دی قُدرت دی مدد نال خُوشخبری دی خاطر ڈُکھ چا۔ ‏9 کیوں جو اُونیں ساکُوں نجات ڈِتی ہے تے مُقدّس بُلاوے نال سَڈیا ہے۔ ایہہ ساڈے اعمال دی وجہ کنُوں نئیں بلکہ اُوندے آپنڑے خاص مقصد تے فضل دی وجہ کنُوں ہئی۔ ایہہ فضل ساڈے اُتے مسیح یسوع ءچ اَزل کنُوں ای تھی گِیا ہئی۔ ‏10 پَر ہُنڑ اوہ ساڈے نجات ڈیوݨ آلے یسوع مسیح دی آمد نال ظاہر تھیّا ہے۔ اُونیں مَوت کُوں نیست کر ڈِتا تے زِندگی تے بقا کُوں اُوں خُوشخبری دےوسیلے نال روشن کر ڈِتا۔

‏11 خُدا نیں میکُوں اِیں خوشخبری کیتے غیر قوماں دا مُبلغ، رسُول تے اُستاد مُقرر کیتا۔ ‏12 اِیہو وجہ ہے جو میں ہنڑ ڈُکھ چیندا ہاں، پَر میں شرمیندہ نئیں کیوں جو جئیں اُتے میں بھروسہ کیتے، میں اُونکُوں جانڑدا ہاں تے میکُوں یقین ہے جو اوہ آخرت دے ڈینہہ تئیں میڈی امانت دی حفاظت کر سگدا ہے۔ ‏13 ہُنڑ اُنہاں صحیح گالھیں کُوں جیہڑیاں تُوں میڈے کنُوں سُنڑیاں، مسیح یسوع ءچ آپنڑے اِیمان تے محبت دے نال آپنڑے کیتے ہِک نمونہ بنڑائی رکھ۔ ‏14 تے رُوح القُدس دی مدد نال جیہڑا ساڈے ءچ وَسدا پِیا ہے اُوں چنگی امانت کُوں سنبھال تے رکھ جیہڑی تیڈے سپُرد کیتی گئی ہے۔

‏15 تُوں جانڑدا ہئیں جو آسیہ صوبے ءچ سارے لوکاں نیں میکُوں چھوڑ ڈِتا ہے۔ اُنہاں ءچ فُوگلُس تے ہرمُگِنیُس وی ہِن۔ ‏16 اُنیسِفرُس دے خاندان اُتے خُداوند دی رحمت تھیوے کیوں جو اُونیں بہُوں دفعہ میکُوں تازہ دَم کیتا تے میڈی قید دی زنزیراں کنُوں شرمندہ نہ تھیّا۔ ‏17 بلکہ جِیں وَیلے اوہ روم ءچ آیا تاں بہُوں کوشش نال تلاش کرتے میکُوں مِلیا۔ ‏18 خُداوند اُونکُوں ایہہ بخشے جو قیامت دے ڈینہہ اُوندے اُتے خُدا دا رحم تھیوے۔ تیکُوں چنگی طرحاں معلوم ہے جو اُونیں اِفِسُس ءچ میڈی بہُوں خدمت کیتی ہے۔