پَولُس رسُول نیں ایہہ خط آپنڑے ہم خدمت طِطُس کُوں پنجھیٹھ (٦٥ ) عیسوی دے دوران لکھیا ہا۔ طِطُس اُوں وقت جزیرہ کریتے ءچ رَہندا ہا۔ کریتے دے لوک آپنڑی بد اخلاقی دی وجہ کنُوں بہُوں بدنام ہَن۔ پَولُس نیں اُتھاں کلیسیا قائم کیتی تے طِطُس کُوں اُوندا نگہبان مُقرر کیتا ہا۔ طِطُس ہِک خوش اِخلاق مسیحی جوان ہا تے پَولُس دا بہُوں وفادار سنگتی ہا۔ پَولُس اُونکُوں بہُوں عزیز رکھیندا ہا تے اُوندے اُتے بہُوں فخر کریندا ہا۔

کلیسیا کُوں مسیحی تعلیم دی وَڈی ضرورت ہئی۔ اِیں واسطے پَولُس رسُول نیں ایہہ خط بھیج تے طِطُس کُوں ہدایت کیتی جو اوہ کلیسیا کُوں مضبوط بنڑاوے تے اُوندے ءچ معلم مُقرر کرے۔ معلماں ءچ کیہڑیاں صِفات ہونڑیاں چاہیدیاں ہِن اُنہاں دا ذِکر اِیں خط ءچ موجود ہے۔ اِیندے ءچ ایہہ وی ڈسایا گِیا ہے جو ہِک سچے اِیماندار کُوں گُناہ آلے ماحول ءچ کِیویں زندگی گُزارنڑی چاہیدی ہے تے لوکاں کُوں محض نصیحت نال ای نئیں بلکہ نیک کردار نال وی جیتنڑ دی کوشش کرنڑی چاہیدی ہے۔