4
1 میں خُدا تے مسیح کُوں جیہڑا زندیاں تے مُردیاں دی عدالت کریسی، گواہ بنڑا تے اُوندے ظہور تے بادشاہی دی یاد ڈیوا تے تیکُوں تاکید کریندا ہاں، 2 جو تُوں کلام دی تبلیغ کر، تے اِیندے کیتے وقت بے وقت تیار رہ، بہُوں صبر تے تعلیم دے نال لوکاں کُوں سمجھا، ملامت تے نصیحت کر۔ 3 کیوں جو ایجھا وقت آندا پِیا ہے جو لوک صحیح تعلیم دی برداشت نہ کریسن بلکہ آپنڑی آپنڑی نفسانی خواہشاں دے مطابق ایجھے اُستادبنڑیسن جیہڑے اُوہو اَکھیسن جیہڑا اوہ سُننڑا چاہندے ہِن۔ 4 اوہ حق دی طرفوں کَن بند کر گِھنسن تے داستاناں دو توجہ ڈیوݨ لگسن۔ 5 پَر تُوں ہر حال ءچ ہوشیار رہ، ڈُکھ برداشت کر، خُوشخبری دی تبلیغ کر، تے آپنڑی خدمت کُوں پورا کر۔6 کیوں جو اوہ وقت آ گِیا ہے جو میکُوں مَے دی نذر دے وانگوں قُربان گاہ اُتے وِیٹیا وَنجے ،تے میڈے کُوچ دا وقت آ گِیا ہے۔ 7 میں چنگی کُشتی لَڑ گِھدی ہے۔ میں دوڑ کُوں مُکا گِھدا ہے تے اِیمان کُوں محفوظ رکھیا ہے۔ 8 ہُنڑ راستبازی دا تاج میڈے کیتے رکھیا ہے۔ ایہہ تاج خُداوند جیہڑا عادل مُنصف ہے میکُوں آپنڑے آوݨ دے ڈینہہ ڈیسی ۔تے نہ فقط میکُوں بلکہ اُنہاں ساریاں کُوں وی جیہڑے اُوندے ظہور دی سِک رکھیسن۔
شخصی گالھیں
9 میڈے کولھ جلدی آوݨ دی کوشش کر۔ 10 کیوں جو دیماس نیں دُنیا نال مُحبت کرتے میکُوں چھوڑ ڈِتے تے تھِسّلُنِیکے چلیا گئے۔ تے کریسکینس گلِتیہ تے طِطُس دلمتیہ کُوں روانہ تھی گئے۔ 11 فقط لُوقا میڈے کولھ ہے۔ تُوں مرقُس کُوں نال گِھن تے آ وَنج کیوں جو اوہ اِیں خدمت ءچ میڈے وَڈے کَم دا ہے۔ 12 تخِکُس کُوں میں اِفِسُس بھیج ڈِتے۔ 13 جِیں وَیلے تُوں آویں تاں اوہ چولا جیہڑا میں تروآس ءچ کرپُس دے کولھ چھوڑ آیا ہم تے کتاباں خاصکر اوہ جیہڑیاں کَھل اُتے لکھیاں ہِن، آپنڑے نال گِھدی آویں۔
14 سِکندر ٹھٹھیرے نیں میڈے نال بہُوں بُرائیاں کِیتیاں ہِن۔ خُداوند اُونکُوں اُوندے کَماں دا بدلہ ڈیسی۔ 15 تُوں اُوں کنُوں خبردار رَہویں کیوں جو اُونیں ساڈے گالھیں دی بہُوں مخالفت کیتی ہئی۔
16 عدالت ءچ میڈی پہلی پیشی دے وقت کوئی میڈی مدد کیتے نہ آیا بلکہ سبھ نیں میکُوں چھوڑ ڈِتا۔ خُدا اُنہاں کنُوں اُوندا حِساب نہ گِھنے۔ 17 پَر خُداوند میڈا مددگار ہئی تے اُونیں میکُوں زور ڈِتا تاں جو میڈے ذریعے اُوندا پیغام پوری طرحاں سُنڑایا وَنجے تے سارے غیر قوماں آلے اُونکُوں سُننڑ تے میں شیر دے مُنہ کنُوں چھڑایا گِیا۔ 18 خُداوند میکُوں ہر بُرے حملے کنُوں بچیسی تے سلامتی دے نال آپنڑی اَسمانی بادشاہی ءچ پُچیسی۔ اُوندی تعریف ہمیشاں تھیندی رَہوے۔ آمین۔
اِختتامی سلام
19 پرسِکہ تے اَکوِلہ کُوں تے اُنیسِفرُس دے خاندان کُوں سلام آکھ۔ 20 اِراستُس کُرِنتھُس ءچ کَھڑ گِیا، تے میں ترُفِمُس کُوں میلیتُس ءچ چھوڑ ڈِتا کیوں جو اوہ بیمار ہئی۔ 21 سردی دے موسم کنُوں پہلے میڈے کولھ پُجنڑ دی کوشش کر۔
یُوبُولُس، پُودینس، لینُس، کلودِیہ تے سارے مسیحی بِھرا تیکُوں سلام آہدھے ہِن۔
22 خُداوند تیڈی رُوح دے نال رَہوے۔ فضل تیڈے نال رَہوے۔