آخری زمانہ
3
1 پَر ایہہ جاݨ گِھن جو اَخیر زمانے ءچ بُرے ڈینہہ آسِن۔ 2 لوک خود غرض، زَر دوست، شیخی خور، مغرور، بد گو، ماں پِیُو دے نا فرمان، نا شُکرے، ناپاک، 3 محبت کنُوں خالی، سخت دِل، بدنام کرݨ آلے، بے ضبط ، تُند مزاج، نیکی دے دُشمنڑ ، 4 دوکھے باز، بے پرواہ، مغرور تے خُدا دی نسبت عیش و عشرت کُوں زیادہ پسند کرݨ آلے ہوسِن۔ 5 اوہ دینداراں وانگوں ڈِکھالی تاں ڈیسِن پَر زندگی ءچ دینداری دا کوئی اثر قبول نہ کریسن۔ ایجھیاں کنُوں دُور ای رَہویں۔ 6 اِنہاں ءچ کُجھ ایجھے وی ہِن جیہڑے گھراں ءچ وَڑ آندے ہِن تے چھچھوری عورتاں کُوں آپنڑے قابو ءچ کر گِھندے ہِن جیہڑیاں گُناہاں ءچ دَبیاں ہوندیاں ہِن تے طرحاں طرحاں دی بُری خواہشاں دا شکار تِھیّاں رَہندیاں ہِن۔ 7 ایہہ عورتاں سِکھدیاں رَہندیاں ہِن پَر حق دی پچھاݨ تئیں کَڈھائیں نئیں پُجدیاں۔ 8 جِیویں جادُوگر ینیّس تے یمبریسa نیں موسیٰ دی مخالفت کیتی ہئی، اُونویں ای ایہہ لوک وی حق دی مخالفت کریندے ہِن۔ اُنہاں دا دماغ وِگڑ گِیا ہے تے ایہہ اِیمان دے لحاظ نال نا مقبول ہِن۔ 9 پَر ایہہ زیادہ کامیاب نہ تھی سگسنڑ کیوں جو اُنہاں دی نادانی سارے آدمیاں اُتے ظاہر تھی ویسی جِیویں اُنہاں جادُوگراں دی تھئی ہئی۔آخری ہدایات
10 پَر تُوں میڈی تعلیم، چال چلنڑ ، مقصد، اِیمان، تحمل، محبت ، صبر، ستائے وَنجنڑ 11 تے ڈُکھ چاوݨ ءچ میڈی پیروی کیتی۔ یعنی ایجھے ڈُکھاں ءچ جیہڑے انطاکیہ، اِکُنیُم تے لُسترہ ءچ میڈے اُتے آئے ہَن۔ پَر خُداوند نیں میکُوں اُنہاں ساریاں کنُوں رہائی بخشی۔ 12 اَصل ءچ جِتی لوک مسیح یسوع ءچ دینداری آلی زندگی گُزارݨ چاہندے ہِن اوہ سارے ستائے ویسِن۔ 13 تے بدکار تے دوکھے باز لوک فریب ڈیندے ڈیندے تے فریب کھاندے کھاندے وِگڑدے وَیسن۔
14 پَر تُوں اِنہاں گالھیں اُتے قائم رہ جیہڑیاں تَیں سِکھیاں ہِن تے جِنہاں دا تیکُوں پورا یقین ہے، کیوں جو تُوں اِنہاں گالھیں کُوں سِکھاوݨ آلیاں کُوں جانڑدا ہئیں۔ 15 تے تُوں چھوٹے لا کنُوں خُدا دے پاک کلام کنُوں واقف ہئیں جیہڑے تیکُوں مسیح یسوع اُتے اِیمان گِھن آوݨ نال نجات حاصل کرݨ دی دانائی بخش سگدے ہِن۔ 16 ہر ہِک مُقدس صحیفہ خُدا دے اِلہام کنُوں ہے تے اوہ تعلیم ڈیوݨ ، ملامت کرݨ ، اصلاح کرݨ تے راستبازی ءچ تربیت ڈیوݨ کیتے مُفید ہے۔ 17 تاں جو خُدا دا بندہ کامِل بنڑے تے ہر ہِک نیک کَم کرݨ کیتے تیار تھی وَنجے۔