‏4 ایہہ خط اِیمان دی شراکت دے مطابق میڈے سچے فرزند طِطُس دے ناں ہے۔ تیکُوں خُدا باپ تے ساڈے نجات ڈیوݨ آلے مسیح یسوع دی طرفوں فضل تے اِطمینان حاصل تھیندا رَہوے۔

‏5 میں تیکُوں کریتے ءچ اِیں واسطے چھوڑ ڈِتا ہئی تاں جو جیہڑا کَم اُتھاں ادھورا رہ گِیا ہئی، تُوں اُونکُوں پورا کر سگیں تے ہر شہر ءچ بزُرگاں کُوں مُقرر کریں جِیویں جو میں تیکُوں ہدایت ڈِتی ہئی۔ ‏6 بزرگ بے اِلزام ہووے، ہِک ذال آلا ہووے ،اُوندے بال اِیماندار ہووݨ تے نافرمان تے اِلزام کنُوں پاک ہووݨ۔ ‏7 نگہبان کُوں وی خُدا دےگھر دا مُختار ہووݨ دے سببّوں بے اِلزام ہوونڑا چاہیدے۔ اوہ خودسر تے گرم مزاج نہ ہووے، شرابی تے جھیڑا کرݨ آلا نہ ہووے، نہ ای پیسے دا لالچی ہووے۔ ‏8 بلکہ مہمان نواز، خیردوست، متقی، اِنصاف پسند، پاک تے آپنڑے نفس اُتے قابو رکھنڑ آلا ہووے۔ ‏9 جیہڑا سچا‍‍ کلام اُونکُوں سِکھایا گِیا ہے، اوہ اُوندے اُتے قائم رَہوے تاں جو اوہ صحیح تعلیم نال ڈوجھیاں کُوں نصیحت ڈے سگے تے مخالفاں کُوں وی قائل کر سگے۔

‏10 کیوں جو بہُوں سارے لوک نافرمان، فضول گالھیں آکھنڑ آلے تے دغاباز ہِن، خاص کر مَختُوناں ^aءچوں۔ ‏11 ایجھے لوکاں دا مُنہ بند کرنڑا ضروری ہے،اِیں واسطے جو ایہہ ناجائز نفع دی خاطر غلط تعلیم سِکھا تے گھراں دے گھر برباد کر ڈیندے ہِن۔ ‏12 اُنہاں دے آپنڑے نبیاں ءچوں ہِک نیں تاں اِتھوں تئیں آکھ ڈِتے جو ”کریتی لوک ہمیشاں کُوڑے، مُوذی درندے، کاہل پَیٹُو ہوندے ہِن۔“ ‏13 ایہہ گواہی سچی ہے۔ اِیں واسطے اُنہاں کُوں سختی نال ملامت کیتا کر تاں جو اُنہاں دا اِیمان درُست تھی وَنجے، ‏14 تےاوہ یہُودیاں دی داستاناں تے ایجھے آدمیاں دے حُکماں دو متوجہ نہ تھیوݨ جیہڑے حق کنُوں مُنہ پھیر گِھندے ہِن۔ ‏15 جیہڑے خود پاک ہِن اُنہاں کیتے ساریاں چیزاں پاک ہِن، پَرناپاک تے بے اِیمان لوکاں کیتے کوئی چیز پاک نئیں کیوں جو اُنہاں دی عقل تے دِل ڈوہائیں ناپاک ہِن۔ ‏16 اوہ خُدا دی پچھاݨ دا دعویٰ تاں کریندے ہِن پَر آپنڑے کَماں کنُوں اُوندا اِنکار کریندے ہِن کیوں جو اوہ مکرُوہ تے نافرمان ہِن تے کوئی نیک کَم کرݨ دے قابل نئیں۔