پَولُس رسُول نیں ایہہ خط فِلیمون کُوں غالباً روم کنُوں سَٹھ (٦٠ ) یا اِکیٹھ ( ٦١ ) عیسوی دے دوران بھیجیا ہا۔ فِلیمون ہِک مالدار آدمی ہئی تے یسوع المسیح اُتے اِیمان گِھن آیا ہئی۔ اُوندا ہِک غلام اُنیسمُس بھج تے روم چلیا گِیا جِتھاں اوہ پَولُس دی تبلیغ دی وجہ کنُوں یسوع المسیح اُتے اِیمان گِھن آیا۔ پَولُس کُوں اُنیسمُس دے حالات معلوم تھئے تاں اُونیں اُونکُوں آپنڑے مالک دے کولھ واپس وَنجنڑ اُتے راضی کر گِھدا تے اُوندے ہَتھ ایہہ مختصر جِیہا خط فِلیمون دو بھیجیا تے اُونکُوں درخواست کیتی جو ہُنڑ اُنیسمُس کُوں غلام دی بجائے مسیحی بِھرا دا مقام ڈے تے قبول کر گِھن تے اُوندی غلطیاں کُوں معاف کر ڈے۔ ہُنڑ اوہ خُداوند ءچ ساڈا بِھرا ہے۔