‏3 اِینویں ای وَڈی عُمر آلی عورتاں کُوں سِکھا جو اوہ خُدا پرست نِظر آوݨ تے تُہمت لاوݨ تے شراب نوشی ءچ مُبتلا نہ تھیوݨ بلکہ نیکی سِکھاوݨ آلیاں ہووݨ، ‏4 تاں جو اوہ نوجوان عورتاں کُوں سِکھا سگنڑ جو اوہ آپنڑے پایاں تے بالاں کُوں پیار کرݨ ، ‏5 تے متّقی، پاک دامن، گھر دا کَم کرݨ آلیاں تے مہربان ہووݨ تے آپنڑے پایاں دی اطاعت کرݨ تاں جو خُدا دے کلام دی بدنامی نہ تھیوے۔

‏6 اِینویں ای نوجواناں کُوں وی نصیحت کر جو اوہ متّقی بننڑ۔ ‏7 تُوں وی سارے گالھیں ءچ نیک کَماں دا نمونہ بنڑ تے تیڈی تعلیم ءچ صاف دِلی تے سنجیدگی نِظر آوے، ‏8 تے ایجھا صحیح کلام ہووے جِیندے اُتے کوئی حرف نہ آ سگے تاں جو کوئی مخالف ساڈے اُتے عیب لاوݨ دا موقع نہ پاوے بلکہ شرمندہ تھی وَنجے۔

‏9 غلاماں کُوں سِکھا جو آپنڑے مالکاں دے تابع رَہوݨ، اُنہاں کُوں ہر گالھ ءچ راضی کرݨ تے کڈھائیں اِنکار نہ کرݨ، ‏10 چوری نہ کرݨ بلکہ ہر کَم پوری اِیمانداری نال کرݨ تاں جو اُنہاں دے سارے کَم ساڈے نجات ڈیوݨ آلے خُدا دی تعلیم دی شان دا باعث بننڑ۔

‏11 کیوں جو خُدا دا اوہ فضل جیہڑا سارے اِنساناں دی نجات دا باعث ہے، ظاہر تھی گِیا ہے۔ ‏12 اوہ فضل ساکُوں تربیت ڈیندے جو اَساں بے دینی تے دُنیوی خواہشاں کُوں چھوڑ تے اِیں موجودہ جہان ءچ پرہیزگاری، راستبازی، تے دینداری دے نال زندگی گُزاروں، ‏13 تے نال نال اُوں مُبارک اُمید یعنی آپنڑے عظیم خُدا تے نجات ڈیوݨ آلے یسوع مسیح دے جلال دے ظہور دے اِنتظار ءچ رَہوں۔ ‏14 مسیح نیں آپنڑے آپ کُوں ساڈی خاطر ڈے ڈِتا تاں جو ساڈا فِدیہ ڈے تے ساکُوں ہر طرحاں دی بے دینی کنُوں چُھڑا گِھنے، تے ساکُوں پاک کر تے آپنڑے کیتے ہِک ایجھی اُمت بنڑا گِھنے جیہڑی نیک کَم کرݨ ءچ سرگرم رَہوے۔

‏15 تُوں ایہہ گالھیں سِکھا، تے پورے اِختیار دے نال تنبیہ کر تے نصیحت کریندا رہ۔ کوئی شخص تیڈی حقارت کرݨ نہ پاوئے۔