‏3 ساڈے خُدا باپ تے خُداوند یسوع مسیح دی طرفوں تُہاکُوں فضل تے اِطمینان حاصل تھیندا رَہوے۔

‏4‏-5 میں سُنڑدا ہاں جو تُوں خُدا دے سارے مُقدساں کیتے محبت رکھیندیں تے تیڈا اِیمان خُداوند یسوع مسیح اُتے ہے، اِیں واسطے میں تیکُوں آپنڑی دُعاواں ءچ یاد کر تے ہمیشاں آپنڑے خُدا دا شُکر ادا کریندا ہاں۔ ‏6 میں دُعا کریندا ہاں جو تیڈے ایمان دی رفاقت ایجھی موثر ہووے جو تُوں ہر خُوبی کُوں جیہڑی مسیح ءچ حاصل ہے چنگی طرح سمجھ سگیں۔ ‏7 کیوں جو اے بِھرا! میکُوں تیڈی محبت تُوں بہُوں خوشی تے تسلی تھئی اِیں واسطے جو تَیں مُقدساں دے دِلاں کُوں تازہ کیتے۔

‏8 بھانویں جو مسیح دا بندہ ہوندے ہوئےمیکُوں ایجھی دلیری تاں ہے جو تیکُوں اوہ کَم کرݨ دا حُکم ڈیواں جیہڑا تیکُوں کرݨ چاہیدا ہے۔ ‏9 پَر میکُوں ایہہ زیادہ پسند ہے جو میں تیکُوں محبت دی وجہ تُوں درخواست کراں ۔میں، پولُس جیہڑا بُڈھا تے اِیں وقت مسیح یسوع دی خاطر قیدی ہاں، ‏10 آپنڑے پوتر اُنیسمُس دے بارے ءچ تیکُوں مِنت کریندا ہاں جیندا میں قید ءچ روحانی لحاظ نال پِیُو بنڑ گیا۔ ‏11 ہِک وقت ہا جو اوہ تیڈے کہیں کَم دا نہ ہا پَر ہُنڑ اوہ میڈے تے تیڈے ڈوہائیں دے کَم دا ہے۔

‏12 ہُنڑ میں اُونکُوں یعنی آپنڑے دِل دے ٹوٹے کُوں تیڈے کولھ واپس بھجیندا پِیا ہاں۔ ‏13 میں چاہندا تاں ایہہ ہم جو اُونکُوں آپنڑے کولھ ای رکھاں تاں جوجئیں تئیں میں خوشخبری سُنڑاوݨ دی وجہ کنُوں قید ءچ ہاں، اوہ تیڈی جاہ تے میڈی خدمت کرے۔ ‏14 پَر تیڈی مرضی دے بغیر میں کُجھ کرݨ نئیں چاہیا تاں جو تیڈا نیک کَم مجبوری نال نئیں بلکہ خوشی نال ہووے۔

‏15 تھی سگدے جو اُنیسمُس تَیں کنُوں کُجھ دیر کیتے اِیں واسطے اَنج ریہا جو بعد ءچ ہمیشاں کیتے تیڈے کولھ رَہوے، ‏16 پَر ہُنڑ ہِک غلام وانگوں نئیں بلکہ غلام کنُوں وَدھ تے یعنی ہِک بِھرا وانگوں، جیہڑا میکُوں تے مَیں کنُوں وَدھ تے تیکُوں تیڈے بندہ تے خُداوند دے بندہ دی حیثیت نال عزیز ہووے۔

‏17 بس جے تُوں میکُوں آپنڑا ساتھی سمجھدا ہئیں تاں اُونکُوں وی میڈے وانگوں قبول کر۔ ‏18 تے جے اُونیں تیڈا کُجھ نقصان کیتے یا اُونیں تیڈا کُجھ ڈیونڑا ہے تاں اُونکُوں میڈے ناں لکھ گِھن۔ ‏19 میں پَولُس آپنڑے ہَتھ نال لکھدا ہاں جو تیکُوں ادا کر ڈیساں۔ ایہہ لکھنڑ دی کوئی ضرورت نئیں جو میڈا قرض جیہڑا تیڈے اُتے ہے، اوہ تُوں خود ہئیں۔ ‏20 اے بِھرا! خُداوند دی خاطر میڈے اُتے ایہہ مہربانی کرتے مسیح ءچ میڈے دِل کُوں تازگی ڈے۔

‏21 میں تیڈی فرمانبرداری اُتے یقین کر تے تیکُوں لکھدا پِیا ہاں تے جانڑدا ہاں جو جیہڑا کُجھ تیکُوں آہدھا پِیا ہاں، تُوں اُوں کنُوں ودھ کریسیں۔ ‏22 اِیندے علاوہ میڈے رَہنڑ کیتے جاہ تیار رکھیں کیوں جو میکُوں اُمید ہے جو تُساں لوکاں دی دُعاواں دے طفیل میں قید کنُوں چُھٹ تے تُہاڈے ءچ آ ویساں۔

‏23 اِپُفراس جیہڑا مسیح یسوع دی خاطر میڈے نال قید ہے، تیکُوں سلام آہدھا ہے۔ ‏24 تے مرقس، اَرِسترخُس، دیماس تے لُوقا وی جیہڑے میڈے ہم خدمت ہِن، تیکُوں سلام آہدھے ہِن۔

‏25 ساڈے خُداوند یسوع مسیح دا فضل تُہاڈی رُوح دے نال رَہوے۔