ایہہ خط سَٹھ ( ٦٠ ) تے سَتر (٧٠ ) عیسوی دے دوران لکھیا گِیا۔ ایہہ اُنہاں مسیحی اِیمانداراں دے ناں ہے جیہڑے یہُودی نسل کنُوں ہِن تے یروشلیم ءچ بیت المقدس کُوں وَڈی اہمیت ڈیندے ہِن۔ اُنہاں دے نزدیک یہُودی مذہب دیاں ساریاں رَسماں جِنہاں دا تعلق اُوں بیت المقدس نال ہا، راستبازی کیتے لازمی سمجھیاں وَیندیاں ہَن تے اوہ اُنہاں کُوں پورا کرݨ فرض سمجھدے ہَن۔ اُنہاں ءچوں بہُوں سارے لوک مسیحی تھیوݨ دے بعد وی یروشلیم وَنج تے اِنہاں مذہبی رَسماں اُتے عمل کرݨ لازمی سمجھدے ہَن۔

ایہہ خط ایجھےای یہُودی مسیحیاں کُوں لکھیا گِیا ہئی۔ اِیں خط ءچ یہُودی رسم و رواج تے شریعت دی اَندھا دُھند پیروی کرݨ دی بجائے ہِک پاک صاف مسیحی زندگی گُزارݨ دی ہدایت کیتی گئی ہے تے جیہڑا کوئی خُداوند یسوع مسیح کُوں آپنڑا نجات ڈیوݨ آلا مَنیندا ہے تے اُوندے اُتے سچے دِل نال اِیمان گِھن آندا ہے، اوہ خُداوند دے فضل نال شریعت دی غلامی کنُوں آزاد تھی وَیندا ہے۔ پہلی صدی عیسوی دے یہُودی نژاد مسیحی اِیں چِھک تاݨ ءچ مُبتلا ہَن جو اُنہاں کُوں نجات پاوݨ کیتے یہُودی مذہب دیاں کیہڑیاں کیہڑیاں گالھیں مَننڑ لازمی ہِن تے کیا غیر یہُودی مسیحی اِیمانداراں کُوں یہُودی شریعت تے رسم و رواج اُتے عمل کرݨ لازمی ہے یا نئیں؟ اِنہاں گالھیں دا جواب اِیں خط ءچ تفصیل دے نال ڈِتا گِیا ہے۔