خُدا دے پسندیدہ کَم
13
1 برادرانہ محبت قائم رکھو۔ 2 مُسافراں دی مہمان نوازی تُوں غافل نہ تھیؤ ، کیوں جو اِینویں کرݨ نال کُجھ نیں بےخبری ءچ فرشتیاں دی مہمان نوازی کیتی ہے۔ 3 تُساں قیدیاں کُوں اِینویں یاد رکھو جیویں جو تُساں خُود اُنہاں دے نال قید ءچ ہَوے، تے جِنہاں دے نال بدسلُوکی کیتی ویندی ہے اُنہاں کُوں ایہہ سوچ تے یاد رکھو جوساڈے وی بدن ہِن۔4 شادی کرݨ ساریاں لوکاں ءچ عزت دی گالھ سمجھی وَنجے تے میاں بیوی دا رِشتہ بے داغ رَہوے۔ کیوں جو خُدا حرام کاراں تے زِنا کاراں دی عدالت کریسی۔
5 پیسے دے لالچ کنُوں دُور رَہو تے جِتی تُہاڈے کولھ ہے اُوندے ءچ قناعت کرو ،کیوں جو خُدا نیں فرمایا ہے
" میں تیکُوں ہر گز نہ چھوڑیساں
تےتیکُوں کڈھائیں تَرک نہ کریساں۔"
6 اِیں واسطے اَساں پوری دلیری نال آکھ سگدے ہئیں جو
”خُداوند میڈا مددگار ہے
میں نہ ڈرساں
اِنسان میڈا کیا کر سگدے ؟ “
7 آپنڑے رہنماواں کُوں یاد رَکھو جِنہاں نیں تُہاکُوں خُدا دا کلام سُنڑایا۔ اُنہاں دی زندگی دے انجام اُتے غور کرو تے اُنہاں دے ایمان دے نمُونے اُتے چلو۔ 8 یسوع مسیح کَل تے اَج بلکہ ہمیشاں تئیں یکساں ہے۔ 9 قِسم قِسم دیاں عجیب تعلیماں کنُوں گُمراہ نہ تھیؤ۔ چنگا ایہہ ہے جو تُہاڈے دِل خُدا دے فضل نال قوت پاوݨ، نہ جو کھاوݨ دے اصولاں نال جِیندے اُتے چلنڑ نال کوئی رُوحانی فائدہ نئیں تھیندا۔
10 ساڈی ہِک ایجھی قُربان گاہ ہے جِیندے ءچوں مقدّس تمبو دی خدمت کرݨ آلے کاہِن کُوں کھاوݨ دا حق نئیں۔ 11 کیوں جو سردار کاہِن جانوراں دا خون مقدّس ترین کمرے ءچ گُناہ دے کفارے کیتے گِھن وَیندے پَر اُنہاں دے جِسم ڈیرے دی حدود کنُوں باہر ساڑ ڈِتے وَیندے ہِن۔ 12 اِینویں ای یسُوع نیں وی لوکاں کُوں خود آپنڑے خون نال پاک کرݨ کیتے شہر دے پھاٹک دے باہر ڈُکھ چاتا۔ 13 اِیں واسطے آؤ ! اَساں یسوع دی ذِلت کُوں آپنڑے اُتے گِھن تے ڈیرے دی حد کنُوں باہر اُوندے کولھ جُلوں۔ 14 کیوں جو اِیں دُنیا ءچ ساڈا کوئی قائم رَہنڑ آلا شہر نئیں بلکہ اَساں ہِک آوݨ آلے شہر دی گولھ ءچ ہئیں۔ 15 اِیں واسطے اَساں یسوع دے وسیلے نال آپنڑی حمد دی قُربانی خُدا دے حضور پیش کریندے رَہوں یعنی خُدا دے ناں دا اِقرار کریندے رَہوں ۔ایہہ ساڈے ہونٹھاں دامناسب پھل ہے۔ 16 تے بھلائی تے سخاوت کرݨ نہ بُھلائے کیوں جو خُدا ایجھیاں قُربانیاں کُوں پسند کریندے۔
17 آپنڑے رَہنماواں دے تابع دار تے فرمانبردار رَہو کیوں جو اوہ تُہاڈی رُوحانی نِگرانی کریندے ہِن، ایہہ جانڑدے ہوئے جو اِیں خدمت دا حساب ڈیونڑا پوسی۔ اُنہاں دے فرمانبردار رَہو تاں جو آپنڑا کَم خوشی نال کرݨ نہ جوشکایت نال کیوں جو اِیں صورت ءچ تُہاکُوں کوئی فائدہ نہ تھیسی۔
18 ساڈے کیتے دُعا کریندے رَہو۔ ساکُوں یقین ہے جو ساڈا دِل صاف ہے تے اَساں ہر لحاظ نال نیکی دے نال زندگی گُزارݨ چاہندے ہئیں۔ 19 پَر میں تُہاڈی مِنت کریندا ہاں جو خاص کر اِیں کیتے دُعا کرو جو میں جلدی تُہاڈے کولھ آسگاں۔
اِختتامی دُعا
20 خُدا جیہڑا اِطمینان دا سرچشمہ ہے، اُونیں اَبدی عہد قائم کرݨ دے خون دے سببّوں بھیڈاں دے عظیم آجڑی یعنی ساڈے خُداوند یسوع کُوں مُردیاں ءچوں زندہ کر تے چا گِھدا۔ 21 اوہ تُہاکُوں ہر چنگی چیز ڈیوے تاں جو تُساں اُوندی مَرضی پوری کر سگو ،تے جیہڑا کُجھ اُوندی نِگاہ ءچ پسندیدہ ہے، اوہ یسوع مسیح دے وسیلے نال ساڈے ءچ پیدا کرے جِیندی تعریف ہمیشاں تئیں تھیندی رَہوے۔ آمین۔
اِختتامی گالھیں
22 اے بِھراؤ! میں مِنت کریندا ہاں جو میڈے نصیحت دے گالھیں کُوں صبر دے نال سُنڑو، جِنہاں کُوں میں مُختصر لکھیا ہے۔ 23 میں تُہاکُوں خبر ڈیندا ہاں جو ساڈا بِھرا تِیمُتِھیُس رِہا کر ڈِتا گِیا ہے۔ جے اوہ جلدی آ گِیا تاں میں اُونکُوں نال گِھن تے تہاکُوں ملنڑ آساں۔
24 آپنڑے سارے رَہنماواں تے سارے مُقدساں کُوں سلام ڈیوائے۔ اِٹلی تُوں آوݨ آلے بھرا تُہاکُوں سلام آہدھے ہِن۔
25 تُہاڈے ساریاں اُتے فضل تھیندا رَہوے۔