اِیمان دی راہ اُتے صبر نال دوڑنا
12
1 اِیں واسطے جیں وَیلے گواہاں دی اِتی وَڈی بِھیڑ بَدل وانگوں ساکُوں چارے پاسوں وَلھیٹی کھڑی ہے تاں آؤ! اَساں وی ہر ہِک بھار کُوں جیہڑا ساڈے کیتے رُکاوٹ دا باعث ہے تے اُوں گُناہ کُوں جیہڑا ساکُوں آسانی نال پھسا گِھندے پَرے کروں، تے اُوں دوڑ ءچ صبر نال دوڑُوں جیہڑی ساڈے سامنڑے ہے۔ 2 اَساں اِیمان دے بانی تے کامل کرݨ آلے یسوع اُتے آپنڑی دید لائی رکھوں، جئیں اُوں خوشی کیتے جیہڑی اُوندی نظراں دے سامنڑے ہئی، صلیب دا ڈُکھ سہہ تے اُوندی شرمندگی دی پروا نہ کیتی۔ تے ہنڑ خُدا دے تخت دے سجے پاسُوں بیٹھا ہویا ہے۔3 ہاں، تُساں اُوندے اُتے غور کرو جئیں گُنہگاراں دی طرفوں اِتی مُخالفت برداشت کیتی تاں جو تُساں بے دِل تھی تے ہِمت نہ ہارو۔ 4 تُساں گُناہ نال لڑن ءچ ہُنڑ تئیں ایجھا مُقابلہ نئیں کیتا جو تُہاڈا خون ویہہ گِیا ہووے۔ 5 کیا تُساں اُوں نصیحت کُوں بُھل گئے ہِیوے جیہڑی تُہاکُوں فرزنداں وانگوں کیتی گئی ہے جو
”میڈے پوترو! خُداوند دی تربیت کُوں حقیر نہ سمجھو،
تےجیں وَیلے اوہ تُہاکُوں ملامت کرے تاں بے دِل نہ تھیؤ۔
6 کیوں جو جِیندے نال خُداوند مُحبت رکھیندے اُوندی تربیت وی کریندے،
تے جِینکُوں پوتر بنڑا گِھندے اُونکُوں سزا وی ڈیندے۔“
7 تُساں آپنڑی مُصیبت کُوں تربیت سمجھ تے برداشت کرو۔ خُدا تُہاکُوں آپنڑے پوتر سمجھ تے تُہاڈے نال سلوک کریندے۔ کیوں جو کیہڑا پوتر ہے جِیندی اُوندا پِیُو تربیت نئیں کریندا؟ 8 پَرجے تُہاڈی تربیت نہ کیتی وَنجے، جِیویں جو ساریاں دی کیتی وَیندی ہے، تاں تُساں ناجائز اولاد تھیسو، نہ جو حقیقی پوتر۔ 9 اِیندے علاوہ جِیں وَیلے ساڈا جِسمانی پِیُو ساڈی تربیت کریندے تے اَساں اُوندی عزت کریندےہئیں، تاں کیا آپنڑے رُوحانی باپ دی زیادہ تابعداری نہ کرُوں ؟تے زندہ رَہُوں؟ 10 ساڈے پیُو تاں تھوڑے ڈینہاں کیتے آپنڑی سمجھ دے مطابق ساڈی تربیت کریندے ہِن، پَر خُدا ساڈے فائدہ کیتے ساڈی تربیت کریندے تاں جو جیویں اوہ پاک ہے اساں وی پاک بنڑ وَنجوں۔ 11 ہُنڑ ہر طرحاں دی تربیت ساکُوں ڈُکھ دا باعث لگدی ہے، خوشی دا باعث نئیں پَر جیہڑے اُونکُوں سہہ سہہ تے پَکے تھی وَیندے ہِن، اوہ بعد ءچ سکُون تے راستبازی دا پھل پَیندے ہِن۔
ایمان دی دوڑ ءچ ہمّت نہ ہارو
12 بس تُساں آپنڑے تھکے ہوئے ہَتھاں تے کمزور گوڈیاں کُوں مضبُوط کرو۔ 13 تے ”آپنڑے ٹُرݨ کیتے سِدھے رَستیاں دا اِستعمال کرو“ تاں جو لنگڑے مزید لنگڑ ے نہ رَہوݨ بلکہ شفا پاوݨ۔
نصیحت تے تنبیہ
14 ہِک ڈوجھے دے نال صُلح صفائی نال رَہو تے اُوں پاکیزگی دے طالب رَہو، جِیندے بغیر کوئی خُداوند کُوں نہ ڈیکھسی۔ 15 دھیان کرو، اِینویں نہ تھیوے جو کوئی شخص خُدا دے فضل کنُوں محروم رہ وَنجے تے کوئی بُرائی، کڑوی جڑ آلی کار پھُٹ تے تُہاکُوں تکلیف ڈیوے تے بہُوں سارے لوکاں کُوں وِگاڑ ڈیوے۔ 16 خبردار!کوئی حرام کار یا عیسو وانگوں بے دین نہ بنڑے جئیں ہِک وقت دے کھانڑا کیتے آپنڑے پلیٹھی د ے حق کُوں ویچ ڈِتا۔ 17 کیوں جو تُساں جانڑدے ہِیوے جو بعد ءچ جِیں وَیلے اُونیں برکت کُوں وراثت ءچ پاوݨ چاہیا تاں قبول نہ کیتا گِیا۔ اُونکُوں توبہ کرݨ دا موقع نہ مِلیا بھانویں جو اوہ ہَنجو وَہا وَہا تے اُونکُوں حاصل کرݨ دی کوشش کریندا رِیہا۔
18 تُساں کوہ ِ سینا دے کولھ نئیں آئے جِینکُوں ہَتھ لاوݨ مُمکن ہئی۔ اوہ پہاڑ بھاہ نال بلدا پیا ہئی تے کالے بَدل، اَندھارے تے طوفان نال چارے پاسُوں گِھریا ہویا ہئی۔ 19 اُوں ویلے نرسِنگے دی آواز تے کلام کرݨ آلے دی ایجھی آواز سُنڑائی ڈِتی جِیندے نال لوکاں نیں منت کیتی جو ساڈے نال بِیا کلام نہ کیتا وَنجے۔ 20 اِیں واسطے جو اوہ ڈر تے اِیں حُکم دی برداشت نہ کر سگے جو ”جے کوئی جانور وی اُوں پہاڑ نال لگ پووے تاں اُونکُوں وی سنگسار کر ڈِتا وَنجے ۔“ 21 اوہ نظارہ ایجھا خوفناک ہا جو موسیٰ نیں آکھیا، ”میں خوف نال کمبدا ہاں۔“
22 بلکہ تُساں کوہ ِصِیُّون تے زندہ خُدا دے شہر یعنی اَسمانی یروشلیم دے کولھ، تے خوشی مناوݨ آلے لَکھاں فرشتیاں، 23 تے اُنہاں پلوٹھیاں aدی جماعت جِنہاں دے ناں اَسمان اُتے لِکھے ہِن، تے سبھ دے مُنصِف خُدا، تے کامل کِیتے ہوئے راستبازاں دی رُوحاں دے کولھ آئے ہِیوے۔ 24 تُساں نویں عہد دے درمیانی یسوع تے اُوندے اُوں چِھنڑکے ہوئے خون دے کولھ آئے ہِیوے جیہڑا ہابل دے خونb دی نسبت چنگاپیغام ڈیندا ہے۔
25 خبردار! جیہڑا تُہاڈے نال کلام کریندا ہے اُوندا اِنکار نہ کرائے ۔کیوں جو جیں ویلے بنی اسرائیل زمین اُتے ہدایت کرݨ آلے دا اِنکار کرتے بچ نہ سگے تاں جے اَساں اَسمان کنُوں ہدایت کرݨ آلے دا اِنکار کر ڈیسوں تاں کیویں بچ سگسُوں؟ 26 اُوں وقت اُوندی آواز نیں زمین کُوں ہَلا ڈِتا، پَر ہُنڑ اُونیں ایہہ وعدہ کیتا جو ”ہِک واری وَلا میں نہ فقط زمین کُوں ای بلکہ اَسمان کُوں وی ہَلا ڈیساں۔“ 27 خُدا دا ہِک واری وَلا آکھنڑ صاف ظاہر کریندا ہے جوپیدا کیتیاں ہویاں چیزاں جیہڑیاں ہَلایاں وَنج سگدیاں ہِن مِٹا ڈِتیاں وَیسن تاں جو جیہڑیاں ہَلایاں نئیں وَنج سگدیاں، فقط اُوہو قائم رَہوݨ۔