پَطرس خُداوند یسوع مسیح دے بارہاں شاگرداں ءچ بہُوں عزت دی نِگاہ نال ڈِٹھا وَیندے ۔پطرس نال ڈو خط منسُوب کیتے وَیندے ہِن۔ پہلا خط رُوم کنوں غالباً تَریٹھ ــچوریٹھ(٦٣ ـ ٦٤ ) عیسوی دے درمیان ایشیائے کوچک دے پنج رُومی صوبیاں دے اِیمانداراں کُوں لکھیا گِیا ہا ۔عُلما دا خیال ہے جو ایہہ خط پطرس نیں آپنڑی زندگی دے آخری ڈینہاں ءچ لکھیا ہا ،جِیں وَیلے مسیحیاں اُتے رُومی حکومت دی طرفوں مظالم دا آغاز تھی گِیا ہا ۔پطرس اِیں خط ءچ اِیمانداراں کُوں ڈسیندے جو اُنہاں کُوں مسیحی ہووݨ دی وجہ کنُوں تکلیفاں دا سامنڑا کرنڑا پوسی۔ اوہ خُداوند یسوع مسیح دی مثال ڈے تے مسیحی اِیمانداراں کُوں ڈُکھ چاوݨ کیتے تیار کریندے۔ کُجھ مسیحی جیہڑے اَذیت دے خوف نال آپنڑے مسیحی اِیمان کنُوں گُمراہ تھیندے پئے ہَن ، اُنہاں کُوں اِیں خط کنُوں حوصلہ مِلیا تے جِیں وَیلے اذیتاں دا دور شروع تھیّا تاں اُنہاں ءچوں بہُوں سارے لوک آپنڑے مسیحی اِیمان اُتے ثابت قدم رِیہے۔ روایت ہے جو پطرس کُوں وی صلیب اُتے چڑھا تے شہید کر ڈِتا گِیا ہا ۔پطرس دا ڈوجھا خط وی رُوم کنُوں غالباً چوریٹھ (٦٤ ) عیسوی دے دوران لکھیا گِیا۔ اِیں خط دے لکھے وَنجنڑ دے کُجھ عرصہ بعد پطرس رسُول دی موت دا سانحہ پیش آیا۔ اِیں خط ءچ کلیسیاواں کُوں کُجھ کُوڑے نبیاں تے اُستاداں دی تعلیم کنُوں خبردار رَہنڑ دی ہدایت ڈِتی گئی ہے۔ پطرس رسُول خُداوند یسوع مسیح دی ڈوجھی آمد دی حقیقت دا اِظہار کریندے ہوئے اِیمانداراں کُوں یاد ڈیویندے جو جے اوہ نیک زندگی گُزریسن، کلام دی سچائی اُتے اِیمان گِھن آسن ، سختیاں کُوں جھلیسن، خُدا اُتے بھروسہ رکھیسن تے خُداوند مسیح دے ظہور دے مُنتظر رَہسن تاں اُنہاں کُوں چنگا اَجر مِلسی۔