‏2 خُدا تے ساڈے خُداوند یسوع دی پچھاݨ دے سببّوں تُہاکُوں ڈھیر سارا فضل تے اِطمینان حاصل تھیندا رَہوے۔

‏3 اُوندی اِلٰہی قُدرت نیں اوہ سبھ چیزاں جیہڑیاں دیندار زِندگی کیتے ضروری ہِن، ساکُوں اُوندی پچھاݨ دے وسیلے نال عنایت کِیتیاں جئیں ساکُوں آپنڑے جلال تے نیکی دے ذریعہ سَڈیا ہے۔ ‏4 اِینویں اُونیں ساڈے نال قیمتی تے بہُوں وَڈے وعدے کیتے تاں جو اُنہاں دے وسیلہ نال تُساں اُوں دُنیا وی خرابی کنُوں چُھٹ تے جیہڑی بُری خواہش دے سببّوں ہے، خُدا دی فطرت ءچ شریک تھی وَنجو۔ ‏5 ایں واسطے تُساں پوری کوشش کر تے آپنڑے اِیمان اُتے نیکی تے نیکی اُتے علم، ‏6 تے علم اُتے پرہیزگاری تے پرہیزگاری اُتے صبر تے صبر اُتے دینداری، ‏7 تے دینداری اُتے برادانہ اُلفت تے برادرانہ اُلفت اُتے محبت وَدھاؤ۔ ‏8 کیوں جو جے ایہہ خُوبیاں تُہاڈے ءچ موجود ہووݨ تے ودھدیاں وَنجنڑ تاں تُہاکُوں ساڈے خُداوند یسوع مسیح دے پچھاننڑ ءچ بے کار تے بے پھل نہ ہووݨ ڈیسن۔ ‏9 پَر جِیندے ءچ ایہہ خُوبیاں نہ ہووݨ، اوہ اَندھا ہے تے اُوندی نظر اِتنی کمزور ہے جو اُونکُوں فقط نزدیک دیاں چیزاں نظر آندیاں ہِن تے آپنڑے پہلے گُناہاں کنُوں پاک تھیوݨ کُوں بُھلی بیٹھا ہے۔

‏10 بس اے بِھراؤ! آپنڑے چُنڑاؤ تے سَڈے وَنجنڑ کُوں ثابت کرݨ دی زیادہ کوشش کرو۔ کیوں جو جے اِینویں کریسو تاں کڈھائیں گُناہ ءچ نہ ڈھاسو۔ ‏11 بلکہ اِیندے نال تُساں ساڈے خُداوند تے نجات ڈیوݨ آلے یسوع مسیح دی اَبدی بادشاہی ءچ وَڈی عزت نال داخل کیتے وَیسو۔

‏12 اِیں واسطے میں تُہاکُوں ایہہ گالھیں ہمیشاں یاد ڈِیویندا رَہساں بھانویں تُساں اُنہاں کنُوں واقف تے اُوں سچائی اُتے قائم ہِیوے جیہڑی تُہاکُوں مِلی ہے۔ ‏13 جِیں وَیلے تئیں میں اِیں تمبو یعنی بدن ءچ ہاں تُہاکُوں یاد ڈیوا ڈیوا تے تُہاڈی حوصلہ افزائی کرنڑا آپنڑے اُتے فرض سمجھدا ہاں۔ ‏14 کیوں جو ساڈے خُداوند یسوع مسیح نیں میڈے اُتے ظاہر کیتا ہےجو میڈے تمبو دے ڈھائے وَنجنڑ دا وَیلہ جلدی آوݨ آلا ہے۔ ‏15 بس میں پُوری کوشش کریساں جو میڈے کُوچ کرݨ دے بعد تُساں اِنہاں گالھیں کُوں ہمیشاں یاد رکھ سگو۔

‏16 کیوں جو جِیں وَیلے اَساں تُہاکُوں آپنڑے خُداوند یسوع مسیح دی قُدرت تے آمد دے بارے ءچ ڈسایا ہئی تاں اَساں چالاکی نال گھڑیاں کہانڑیاں دی پیروی نہ کیتی ہئی بلکہ اَساں اُوندی عظمت دے اَکھیں ڈِٹھے گواہ ہِسے۔ ‏17 اُونیں خُدا باپ تُوں اُوں وَیلے عِزت تے جلال پایا جِیں وَیلے اُوں افضل جلال ءچوں اُونکُوں ایہہ آواز آئی جو ”ایہہ میڈا پیارا پوتر ہے جِیندے تُوں میں بہوں خوش ہاں۔“ ‏18 اَساں اُوندے نال مُقدّس پہاڑ اُتے ہِسے تاں اَسمان تُوں اِیہو آواز آندی سُنڑی۔

‏19 اِیندے علاوہ ساڈے کولھ نبیاں دا اوہ کلام ہے جیہڑا بالکل مُعتبر ہے تے تُساں چنگا کریندے ہِیوے جو ایہہ سمجھ تے اُوندے اُتے عمل کریندے ہِیوے جو اوہ ہِک چراغ ہے جیہڑا اَندھاری جاہ ءچ روشنی ڈیندا ہے جئیں تئیں اُوں ڈینہہ دا سِجھ نہ نِکلے تے صُبح دا سِتارہ تُہاڈے دِلاں ءچ نہ چمکے^a۔ ‏20 پَر پہلے ایہہ جاݨ گِھنو جو خُدا دے کلام دی کہیں نبوت دا دارومدار کہیں دی ذاتی تفسیر اُتے نئیں۔ ‏21 کیوں جو نبوت دی کوئی گالھ آدمی دی خواہش نال کڈھائیں نئیں تھئی بلکہ آدمی رُوح القُدس دی تحریک دے سببّوں خُدا دی طرفوں بولیندے ہَن۔