‏4 جِیں وَیلے خُدا نیں اُنہاں فرشتیاں کُوں نئیں چھوڑیا جِنہاں نیں گُناہ کیتا، بلکہ اُنہاں کُوں اندھارے دیاں زنزیراں نال ^aبدھ تے دوزخ ءچ سَٹ ڈِتا تاں جو عدالت دے ڈینہہ تئیں قید ءچ رَہوݨ۔ ‏5 اِینویں ای اُونیں بہُوں پہلے دُنیا کُوں نہ چھوڑیا بلکہ دُنیا دے بےدین لوکاں اُتے طوفان بھیج تے فقط راستبازی دی منادی کرݨ آلے نُوح کُوں بِیاں سَت جاناں سمیت بچا گِھدا۔ ‏6 تے اُونیں سدُوم تے عمُورہ دے شہراں کُوں ہلاکت دی سزا دے لائق قرار ڈے تے راکھ کر ڈِتا تے آوݨ آلے زمانہ دے بے دیناں کیتے عِبرت دا نِشان بنڑا ڈِتا۔ ‏7 پَر راستباز لُوط کُوں جیہڑا بے دیناں دےگندے چال چلنڑ تُوں تنگ ہئی، رہائی بخشی۔ ‏8 کیوں جو اُنہاں ءچ رہ تے اُنہاں دے بُرے کَماں کُوں ڈیکھ تے، تے سُنڑ تے اِیں راستباز شخص دا دِل عذاب ءچ رَہندا ہئی۔ ‏9 تاں خُداوند دیندار لوکاں کُوں اَزمایش تُوں بچاوݨ تے بے دین لوکاں کُوں عدالت دے ڈینہہ تئیں سزا کیتے رکھنڑا جانڑدا ہے۔ ‏10 خاص کر اُنہاں کُوں جیہڑےآپنڑے جِسم دی گندی خواہشاں دی پیروی کریندے ہِن تے اِختیار کُوں حقیر سمجھدے ہِن۔

ایہہ گُستاخ تے مغرور ہِن تے جلالی ہستیاں دی توہین کرݨ تُوں نئیں ڈردے۔ ‏11 بھانویں فرشتے جیہڑے طاقت تے قُدرت ءچ اُنہاں تُوں وَڈے ہِن، خُداوند دے سامنڑے اُنہاں اُتے بُہتان نئیں لَیندے۔ ‏12 پَر ایہہ کُوڑے اُستاد بےوقوف جانوراں وانگوں ہِن جیہڑے فِطری طور تے اِیں واسطے پیدا تھئے ہِن جو اُنہاں کُوں پکڑیا تے ختم کیتا وَنجے۔ جیہڑا کُجھ اوہ نئیں سمجھدے، اُوندی توہین کریندے ہِن تےاوہ آپنڑی بربادی ءچ خود برباد تھی وَیسن۔ ‏13 جیہڑا نقصان اُنہاں نیں ڈوجھیاں کُوں پُچایا، اُوہو اُنہاں کُوں خود بُھگتناپوسی۔اُنہاں دے نزدیک لُطف چاوݨ تُوں مراد ایہہ ہے جو ڈینہہ دے وَیلے کُھل تے عیاشی کرݨ۔ اوہ داغ تے دھبے ہِن جیہڑے تُہاڈی ضیافتاں ءچ شریک تھی تے غلط عیاشیاں کریندے ہِن۔ ‏14 اُنہاں دے اَکھیں ہر وَیلے زِناکار عورتاں دی گولھ ءچ رَہندیاں ہِن تے گُناہ کرݨ تُوں کڈھائیں نئیں رُکدیاں۔اوہ کمزور لوکاں کُوں غلط کَم کرݨ کیتےوَرغلیندے ہِن تے لالچ کرݨ ءچ ماہر ہِن۔ اوہ لعنتی ہِن۔ ‏15 اوہ صحیح راہ تُوں ہَٹ تے آوارہ پِھردے پئے ہِن تے بلعام بن بعُور دے نقش ِ قدم اُتے ٹُردے پئے ہِن جئیں ناراستی دی مزدوری کُوں عزیز سمجھیا۔ ‏16 پَر گڈھاں نیں اُونکُوں اِیں گُناہ دے سببّوں ملامت کیتی۔ اِیں جانور نیں جیہڑا بولنڑ دے قابل نہ ہئی، اِنسان جِیہی آواز ءچ گالھ کیتی تے نبی کُوں اُوندی بے وقوفی کنُوں روکیا۔

‏17 ایہہ لوک سُکے ہوئے چشمے تے اَندھاری دے اُڈائے ہوئے بَدل ہِن۔اِنہاں کیتے اَندھارے دا بہُوں تاریک حصہ مُقرر ہے۔ ‏18 ایہہ لوک مغرور گالھیں کریندے ہِن جِنہاں دے پِچھے کُجھ نئیں تے بے ہُودہ شہوت پرستی نال ایجھے لوکاں کُوں وَرغلیندے ہِن جیہڑے اَجنڑ گُمراہ کرݨ آلیاں ءچوں نِکلے ای ہِن۔ ‏19 ایہہ اُنہاں دے نال تاں آزادی دا وعدہ کریندے ہِن پَر خود بُرائی دے غلام بنڑے پئے ہِن۔کیوں جو جیہڑی چیز اِنسان اُتے غالب آ وَیندی ہے، اِنسان اُوندی غلامی ءچ تھی وَیندے۔ ‏20 تے جے اوہ لوک خُداوند تے نجات ڈیوݨ آلے یسوع مسیح دی پچھاݨ دے وسیلہ نال دُنیا دی گندگی کنُوں چُھٹ تے وَلا کنُوں اُنہاں ءچ پھس وَنجنڑ تے اُنہاں کنُوں مغلوب تھیوݨ تاں اُنہاں دی بعد دی حالت پہلی حالت کنُوں وی بدتر تھی وَیندی ہے۔ ‏21 جِنہاں نیں راستبازی دی راہ کُوں جاݨ تاں گِھدا پَر اُوں پاک حُکم کنُوں پِھر گئے جیہڑا اُنہاں کُوں ڈِتا گِیا ہا، تاں اُنہاں کیتے اِیہو چنگا ہا جو اِیں راہ کُوں نہ جانڑدے۔ ‏22 اُنہاں اُتے تاں اوہ مثال سچ آندی ہے جو ”کُتا آپنڑی اُلٹی دو رجوع کریندے“ تے ”دھاتی ہوئی سُورنی وَلا چِکڑ دو وَیندی ہے۔“