مسیح دی ڈوجھی آمد دا وعدہ
3
1 اے عزیزو! ہُنڑ میں تُہاکُوں ڈوجھا خط لِکھدا پِیا ہاں۔ میں ڈوہائیں خطاں ءچ تُہاڈی یاداشت کُوں تازہ کر تے تُہاڈے ذہناں ءچ پاک سوچ کُوں اُبھارݨ دی کوشش کیتی۔ 2 تاں جو تُساں پاک نبیاں دیاں پیشن گوئیاں تے ساڈے خُداوند تے نجات ڈیوݨ آلے دے حُکم کُوں جیہڑا اَساں رسُولاں دی معرفت تُہاڈے تئیں پُجیا ہے۔ 3 ساریاں کنُوں وَدھ تےتُہاکُوں ایہہ جاݨ گِھننڑاں چاہیدے جو آخری ڈینہاں ءچ ایجھے ٹھٹھا کرݨ آلے لوک آسِن جیہڑے آپنڑی نفسانی خواہشاں دے مطابق زندگی گُزریسن۔ 4 تے اَکھیسن جو”مسیح دے آوݨ دا وعدہ کِتھاں گِیا؟ ساڈے پِیُو ڈاڈا تاں مَر گئے تے دُنیا دے خلق تھیوݨ تُوں ہُنڑ تئیں سارا کُجھ اِینویں ای ہے“۔ 5 اوہ جاݨ بُجھ تے بُھل گئے جو خُدا دے کلام دے ذریعہ اَسمان بہُوں پہلے تُوں بنڑائے گئے ہِن، تے زمین پانڑی ءچوں تے پانڑی دے ذریعہ بنڑی۔ 6 پانڑی کنُوں ای اُوں وقت دی دُنیا بُڈ تے تباہ تھی گئی۔ 7 تے موجودہ اَسمان تے زمین اُوں کلام دے وسیلے رکھ ڈِتے گئے ہِن تاں جو بھاہ ءچ ساڑے وَنجنڑتے بے دیناں دی عدالت تے ہلاکت دے ڈینہہ تئیں محفوظ رَہوݨ۔8 اے عزیزو! ہِک گالھ کڈھائیں نہ بُھلائے جو خُداوند دی نِگاہ ءچ ہِک ڈینہہ ہزار سال تے ہزار سال ہِک ڈینہہ دے برابر ہِن۔ 9 خُداوند آپنڑا وعدہ پُورا کرݨ ءچ دیر نئیں کریندا جِیویں کُجھ لوک سمجھدے ہِن بلکہ اوہ تُہاڈے کیتے صبر کریندے، اِیں واسطے جو کہیں دی ہلاکت نئیں چاہندا بلکہ چاہندے جو ہرکوئی توبہ کرے۔
10 پَر خُداوند دا ڈینہہ چور وانگوں آ ویسی۔ اُوں ڈینہہ اَسمان بہُوں خوفناک آواز نال غیب تھی ویسن تے اَسمان دیاں ساریاں چیزاں حرارت دی شِدت کنُوں پگھر ویسن تے زمین تے اُوندے اُتے دیاں ساریاں چیزاں سَڑ ویسن۔ 11 جِیں وَیلے ساریاں چیزاں اِینویں پگھرݨ آلیاں ہِن تاں تُہاکُوں کیجھا ہوونڑا چاہیدے؟ تُہاکُوں تاں بہُوں ای پاکیزگی تے پرہیزگاری دی زندگی گزریندے ہوئے 12 خُدا دے اُوں ڈینہہ دا بہُوں مُشتاق تے مُنتظر رَہونڑا چاہیدے جِیندی وجہ کنُوں اَسمان بھاہ نال تے اَسمان دیاں ساریاں چیزاں حرارت دی شِدت نال پگھر ویسن۔ 13 پَر اَساں خُدا دے اُوں وعدیاں دے مطابق نویں اَسمان تے نوِیں زمین دے اِنتظار ءچ ہئیں جِتھاں راستبازی سکونت کریندی ہے۔
14 بس اے عزیزو! کیوں جو تُساں اِنہاں گالھیں دے مُنتظر ہِیوے، اِیں واسطے پوری کوشش کرو جو تُساں اِطمینان دے نال خُدا دے نزدیک بے داغ تے بے اِلزام ثابت تھیؤ۔ 15 ساڈے خُداوند دے صبر کُوں نجات حاصل کرݨ دا موقع سمجھو،جیویں ساڈے عزیز بِھرا پَولُس نیں وی اُوں حِکمت دے مطابق جیہڑی خُدا نیں اُونکُوں ڈِتی ہے، تُہاکُوں لکھیا ہے۔ 16 اُونیں آپنڑے سارے خطاں ءچ اِنہاں گالھیں دا ذکر کیتا ہے۔ اُوندے کُجھ گالھیں دا سمجھنڑا مشکل ہے۔ تے نادان تےبے قیام لوک اُنہاں دے معنی کُوں وی ڈوجھے صحیفیاں وانگوں تروڑ مروڑ تے پیش کریندے ہِن تے آپنڑے کیتے تباہی پیدا کریندے ہِن۔
17 اِیں واسطے اے عزیزو! تُساں جیہڑے اِنہاں گالھیں تُوں پہلے ای خبردار ہِیوے، ہوشیار رَہو، اِینویں نہ تھیوے جو بے دیناں دے غلط گالھیں تُہاکُوں گُمراہ کر تے محفوظ جاہ تُوں ڈھا ڈیوݨ۔ 18 بلکہ ساڈے خُداوند تے نجات ڈیوݨ آلے یسوع مسیح دے فضل تے علم ءچ وَدھدے وَنجو۔ اُوندی تعریف ہُنڑ وی تھیوے تے ہمیشاں تئیں تھیندی رَہوے۔ آمین۔