‏3 اے عزیزو! میں تُہاکُوں اُوں نجات دے بارے ءچ لکھنڑ دا بہُوں مُشتاق ہم جِیندے ءچ اَساں سارے شریک ہئیں پَر میں ایہہ نصیحت کرݨ ضروری سمجھدا ہاں جو تُساں اُوں اِیمان دے واسطے جیہڑا خُدا نیں آپنڑے مُقدّساں کُوں ہِکو واری ہمیشاں کِیتے سپُرد کر ڈِتا ہا، بہُوں محنت کرو۔ ‏4 کُجھ بے دین لوک لُک تے تُہاڈے درمیان آ گئے ہِن جیہڑے ساڈے خُدا دے فضل کُوں آپنڑی شہوت پرستی دا بہانہ بنڑائی پئے ہِن تے ساڈے واحد مالک تے خُداوند یسوع مسیح دا اِنکار کریندے ہِن۔ ایجھے لوکاں دی سزا دا حُکم بہُوں پہلے کنُوں ای لکھ ڈِتا گِیا ہا۔

‏5 بھانویں تُہاکُوں ایہہ سارا معلوم تھی گِیا ہے، وَل وی میں تُہاکُوں ایہہ گالھ یاد ڈیواوݨ چاہندا ہاں جو خُداوند نیں آپنڑے لوکاں کُوں مُلک ِ مِصر کنُوں چُھڑا گِھدا پَر بعد ءچ اِیمان نہ گِھن آوݨ آلیاں کُوں ہلاک کر ڈِتا۔ ‏6 تے جیہڑے فرشتیاں نیں آپنڑے مرتبہ کُوں قائم نہ رکھیا بلکہ آپنڑے مقررہ مقام کُوں چھوڑ ڈِتا، اُنہاں کُوں وی خُدا نیں دائمی زنزیراں نال بدھ تےعظیم عدالت دے ڈینہہ تئیں اندھارے ءچ قید رکھیا ہے۔ ‏7 اِینویں ای سدُوم تے عمورہ تے اُوندے آسوں پاسوں دے شہراں دے لوک وی حرام کاری تے بدفعلی کرݨ لگ گئے ہَن تے ہمیشاں دی بھاہ ءچ برباد کر ڈِتے گئے تے ساڈے کیتے عبرت دا نشان تھئے۔

‏8 اِیندے باوجود ایہہ لوک آپنڑی خوش فہمی ءچ رہ تے آپنڑے جِسم کُوں ناپاک کریندے ہِن، ہر اِختیار کُوں حقیر جانڑدے ہِن تے جلالی ہستیاں دی توہین کریندے ہِن۔ ‏9 پَر مُقرب فرشتہ مِیکائیل نیں وی موسیٰ دی لاش دے بارے ءچ اِبلیس نال تکرار کریندے وقت^a لعن طعن کرتے اُوندے اُتے بُہتان لاوݨ دی جُرات نہ کیتی بلکہ ایہہ آکھیا جو ”خُداوند تیکُوں ملامت کرے۔“ ‏10 تے ایہہ لوک جیہڑے گالھیں دا علم نئیں رکھیندے، اُنہاں اُتے توہین کریندے ہِن، تے جِنہاں کُوں بے سمجھ جانوراں آلی کار فطرتی طور تے جانڑدے ہِن، اُنہاں ءچ آپنڑے آپ کُوں برباد کر ڈیندے ہِن۔ ‏11 اِنہاں اُتے افسوس! کیوں جو ایہہ قائن دی راہ اُتے چلے تے بِلعام وانگوں پیسے دے لالچ کیتے لوکاں کُوں دوکھا ڈیندے ریہے تے قورح وانگوں مخالفت کر تے ہلاک تھئے^b۔ ‏12 ایہہ لوک تُہاڈیاں رفاقتی دعوتاں ءچ دریا دی لُکیاں ہویاں چٹاناں وانگوں ہِن۔ ایہہ ایجھے آجڑی ہِن جیہڑے بے دھڑک کھاندے ہِن۔ ایہہ بغیر پانڑی دے بدلاں وانگوں ہِن جِنہاں کُوں ہوا چا گِھن وَیندی ہے۔ ایہہ پَتر کیر دے بے پھل درخت ہِن جیہڑے جَڑ کنُوں اُکھڑ گئے ہِن تے ڈوہائیں پاسوں مُردہ ہِن۔ ‏13 ایہہ سُمندر دیاں بے قابو چھلاں ہِن جیہڑیاں آپنڑی بےشرمی دا جھگ مریندیاں ہِن۔ ایہہ اوہ آوارہ ستارے ہِن جِنہاں کیتے اندھاری جاہ ہمیشاں کیتے مُقرر کر ڈِتی گئی ہے۔

‏14 حنوک نیں وی جیہڑا آدم دی ستویں پُشت کنُوں ہا، اِنہاں دے بارے ءچ پیشن گوئی کیتی ہئی جو ”ڈیکھو! خُداوند آپنڑے لکھاں پاک فرشتیاں دے نال آندا پِیا ہے۔ ‏15 تاں جو سارے لوکاں دا اِنصاف کرے، تے سارے بے دیناں کُوں اُنہاں دے سارے کَماں دی وجہ کنُوں جیہڑے اُنہاں نیں بے دینی نال کیتے ہِن، سزا دا حُکم ڈیوے۔تے خُدا بے دین گُنہگاراں کُوں وی سزا دا حُکم ڈیسی کیوں جو اُنہاں نیں اُوندی شان ءچ بہُوں گُستاخ گالھیں کیتیاں ہِن۔“ ‏16 ایہہ لوک ہمیشاں بَک بَک تے عیب جوئی کریندے ہِن تے آپنڑیاں خواہشاں دے پِچھے ٹُردے ہِن تے آپنڑے بارے ءچ وَڈے بول بولیندے ہِن تے آپنڑے فائدے کیتے ڈوجھیاں دی خوشامد کریندے ہِن۔

‏17 پَر اے عزیزو! اُنہاں گالھیں کُوں یاد رکھو جیہڑیاں ساڈے خُداوند یسوع مسیح دے رسُول پہلے ای آکھ چُکے ہِن۔ ‏18 اُنہاں نیں تُہاکُوں آکھیا ہا جو ”آخری ڈینہاں ءچ ٹھٹھا کرݨ آلے نِکل سِن جیہڑے آپنڑی بے دینی دی خواہشاں دے پِچھے چلسن۔“ ‏19 اِیہو اوہ لوک ہِن جیہڑے تفرقے پَیندے ہِن، ایہہ نفسانی ہِن تے رُوح القدس کنُوں محروم ہِن۔ ‏20 پَر اے عزیزو! تُساں آپنڑے پاک ایمان ءچ ترقی کر تے رُوح القُدس دی مدد نال دُعا کریندے رَہو۔ ‏21 آپنڑے آپ کُوں خُدا دی محبت ءچ قائم رکھو تے خُداوند یسوع مسیح دی رحمت دے مُنتظر رَہو جِیندا نتیجہ ابدی زندگی ہے۔

‏22 جیہڑے لوک شک ءچ مُبتلا ہِن، اُنہاں اُتے ترس کھاؤ۔ ‏23 کُجھ کُوں بھاہ ءچوں جھٹ مار تے کڈھ گِھنوتے کُجھ اُتے خُدا دے خوف نال رحم کرو تے اُوں پُشاک تُوں نفرت کرو جیہڑی اِنسانی فطرت دی وجہ کنُوں داغ دار تھی گئی ہے۔

‏24 ہُنڑ جیہڑا تُہاکُوں گُمراہی کنُوں بچا سگدا ہے تے آپنڑی جلال آلی حضوری ءچ بہُوں وَڈی خوشی دے نال بے عیب بنڑا تے پیش کر سگدا ہے، ‏25 ساڈے اُوں نجات ڈیون آلے واحد خُدا دا جلال، عظمت، قدرت تے اِختیار ساڈے خُداوند یسوع مسیح دےوسیلہ نال اَزل کنُوں ہے، ہُنڑ وی ہووے تے ہمیشاں تئیں تھیندا رَہوے۔آمین۔