مُکاشفہ دی کِتاب یُوحنا عارِف نال منسوب ہے۔یُوحنا پہلی صدی دی کلیسیا ءچ ہِک مُمتاز دینی رہنما سمجھیا وَیندا ہا۔ اُونکُوں آپنڑے مسیحی اِیمان دی وجہ کنُوں پِتمُس ناں دے ہِک خشک جزیرہ ءچ جلاوطنی دی زندگی گُزارنڑی پئی۔ اُتھاں اُوندے اُتے رویا ءچ خُدا نیں جیہڑا کُجھ اُونکُوں ڈِکھایا تے ڈسایا، اوہ اِیں کتاب ءچ رَمز تے اِستعارہ دی زبان ءچ لکھیا گِیا ہے ۔ایہہ کتاب غالباً نَوے (٩٠ ) کنُوں چھیانوے (٩٦) عیسوی دے دوران یُونانی زبان ءچ لکھی گئی۔آوݨ آلے واقعات جیہڑے مسیح دی ڈوجھی آمد کنُوں پہلے تھیونڑے ہَن، اِیں کتاب ءچ بیان کیتے گئے ہِن۔

مُکاشفہ نَویں عہد نامہ دی آخری کتاب ہے۔ اِیندے کُجھ گالھیں کُوں سمجھنڑاں بہُوں مُشکل ہے۔ اِیں واسطے اِیں کتاب دیاں بہُوں ساریاں تفسیراں لکھیاں گئیاں ہِن۔ اِیں کتاب دے مطالعہ ءچ اُنہاں تفسیراں کنُوں مدد گِھدی وَنج سگدی ہے۔ اِیں کتاب دے مطالعہ نال پڑھن آلے کُوں مسیحی اِیمانداراں دی اوہ اُمیدحاصل تھیندی ہے جیہڑی ایہہ ہے جو خُداوند یسوع مسیح کُوں بزُرگی حاصل تھیسی۔ اوہ ساریاں چیزاں کُوں نواں بنڑا ڈیسی، رووݨ آلے دے ہَنجوو صاف کر ڈیسی، نہ مَوت رَہسی، نہ ماتم رَہسی، نہ دھاڑ پِٹ نہ درد۔ خُداوند یسوع مسیح اول تے آخر یعنی ابتدا تے اِنتہا ہے۔