جیہڑا آپنڑے سَجے ہَتھ ءچ سَت سِتارے گِھدی کھڑا ہےتے سونے دے سَت چراغ داناں ءچ پِھردا ہے، اوہ فرمیندے جو ‏2 ”میں تیڈے کَم، تیڈی محنت ،تے تیڈی ثابت قدمی کنُوں واقف ہاں۔تے ایہہ وی جانڑدا ہاں جو تُوں بدکاراں کُوں برداشت نئیں کر سگدا تے جیہڑے آپنڑے آپ کُوں رسُول آہدھے ہِن پَر ہِن نئیں، تَیں اُنہاں کُوں اَزمایا تے کُوڑا ثابت کیتا۔ ‏3 تے تُوں صبر کریندا ہئیں تے میڈے ناں دی خاطر مُصیبت چَیندے چَیندے نئیں تھکدا۔ ‏4 پَر میکُوں تیڈے تُوں ایہہ شکایت ہے جو تَیں آپنڑی پہلے آلی محبت چھوڑ ڈِتی ہے۔ ‏5 بس یاد کر جو تُوں کِتھوں کنُوں ڈھٹھاہئیں۔ توبہ کر تے پہلے جیہے کَم کر ،نہ تاں میں تیڈے کولھ آ تے تیڈے چراغ کُوں اُوندی جاہ کنُوں ہَٹا ڈیساں۔ ‏6 ہاں ایہہ گالھ تیڈے حق ءچ ہے جو تُوں نِیکُلیاں^a دے کَماں کنُوں نفرت کریندا ہئیں جِنہاں کنُوں میں وی نفرت کریندا ہاں۔

‏7 جِیندے کَن ہووݨ اوہ سُنڑے جو رُوح القُدس کلیسیاواں کوں کیا فرمیندے۔ جیہڑا غالب آسی میں اُونکُوں زندگی دے اُوں درخت دا پھل کھاوݨ کیتے ڈیساں جیہڑا خُدا دے فِردوس ءچ ہے۔“

جیہڑا اول تے آخر ہے تے جیہڑا مَر گِیا ہا تے وَلا زندہ تھی گِیا، اوہ فرمیندے جو ‏9 ”میں تیڈی مُصیبت تے غریبی کُوں جانڑدا ہاں بھانویں تُوں دولت مند ہئیں^b، تے اُنہاں لوکاں دے بُہتان کُوں وی جانڑدا ہاں جیہڑے آپنڑے آپ کُوں بنی اِسرائیل ^c تاں اَکھیندے ہِن پَر ہِن نئیں بلکہ شیطان دی جماعت کنُوں ہِن۔ ‏10 جیہڑے ڈُکھ تیکُوں سَہنڑیں ہوسِن اُنہاں کنُوں نہ ڈر۔ ڈیکھو اِبلیس تُہاڈے ءچوں کُجھ کُوں قید ءچ بند کراوݨ آلا ہے تاں جو تُہاڈی اَزمایش تھیوے تے تُساں ڈاہ ہِک ڈینہہ تئیں مُصیبت چیسو۔جان ڈیوݨ تئیں وفادار رہ تاں میں تیکُوں زندگی دا تاج ڈیساں۔

‏11 جِیندے کَن ہووݨ اوہ سُنڑے جو رُوح القُدس کلیسیاواں کوں کیا فرمیندے۔ جیہڑا غالب آسی اُونکُوں ڈوجھی مَوت ^dکنُوں کوئی ضرر نہ پُجسی۔“

جِیندے کولھ ڈو دھاری تلوار ہے، اوہ فرمیندے جو ‏13 ”میں جانڑدا ہاں جو جِتھاں تُوں رَہندیں اُتھاں شیطان دا تخت ہے، پَر وَل وی تَیں میڈا ناں مضبوطی نال پکڑیا ہویا ہے تے اُنہاں ڈینہاں ءچ وی جیں ویلے میڈا سچا گواہ انتپاس تُہاڈے ءچ اُتھاں شہید کِیتا گیا جِتھاں شیطان رَہندے، تَیں میڈے اُتے آپنڑے اِیمان کنُوں اِنکار نئیں کیتا۔ ‏14 پَر میکُوں تیڈے تُوں کُجھ گالھیں دی شکایت ہے جو تیڈے کُجھ لوک بِلعام دی تعلیم دی پیروی کریندے ہِن، جئیں بلق کُوں سِکھایا جو بنی اِسرائیل کُوں گُمراہ کرݨ کیتے اُنہاں کُوں بُتاں کُوں نذر کیتی گئی قُربانیاں دا گوشت کھاوݨ تے حرام کاری کرݨ دی ترغیب ڈیوے۔ ‏15 اِینویں ای تُہاڈے ءچ ایجھے لوک وی ہِن جیہڑے نِیکُلیاں دی تعلیم دی پیروی کریندے ہِن۔ ‏16 اِیں واسطے توبہ کر، نہ تاں میں جلدی تیڈے کولھ آساں تے آپنڑے مُنہ دی تلوار نال اُنہاں نال لَڑساں۔

‏17 جِیندے کَن ہووݨ اوہ سُنڑے جو رُوح القُدس کلیسیاواں کُوں کیا فرمیندے۔ جیہڑا غالب آسی میں اُونکُوں پوشیدہ مَن ءچوں ڈیساں۔ میں اُونکُوں ہِک سفید پتھر وی ڈیساں جِیندے اُتے نواں ناں لکھیا ہویا ہوسی جِیندا علم فقط اُونکُوں ہوسی جِینکُوں اوہ مِلسی۔“

خُدا دا پوتر جِیندی اَکھیں بھاہ دے شعلہ وانگوں تے جِیندے پیر خالص پِتّل وانگوں ہِن، اوہ فرمیندے جو ‏19 ”میں تیڈے کَماں، تیڈی محبت ، تیڈے اِیمان، تیڈی خدمت تے تیڈی ثابت قدمی کنُوں واقف ہاں تے ایہہ وی جو تُوں ہنڑ پہلے کنُوں زیادہ کم کریندا پِیا ہئیں۔ ‏20 پَر میکُوں تیڈے تُوں ایہہ شکایت ہے جو تَیں اُوں عورت اِیزبِل^e کُوں جیہڑی آپنڑے آپ کُوں نبیہ آہدھی ہے، نئیں روکیا۔ اوہ میڈے خادماں کُوں تعلیم ڈیندی تے گُمراہ کریندی ہے جو اوہ بُتاں کُوں پیش کیتی گئی قُربانیاں دا گوشت کھاوݨ تے حرامکاری کرݨ۔ ‏21 میں اُونکُوں مُہلت ڈِتی ہے جو اوہ آپنڑی بدکرداری کنُوں توبہ کرے پَر اوہ توبہ کرݨ نئیں چاہندی۔ ‏22 ڈیکھو! میں اُونکُوں اِینویں سزا ڈیساں جو اوہ بستر اُتے پئی رَہسی تے جیہڑے اُوندے نال زِنا کریندے ہِن ،جے اُنہاں بُرے کماں کنُوں توبہ نہ کریسِن تاں میں اُنہاں کُوں وی سخت مُصیبت ءچ پھسا ڈیساں۔ ‏23 ہاں، میں اُوں عورت دے فرزنداں کُوں جان کنُوں مار ڈیساں۔ وَل ساریاں کلیسیاواں کُوں معلوم تھیسی جو اوہ میں ای ہاں جیہڑا دِلاں تے ذہناں کُوں پرکھدا ہے تے تُہاڈے ءچوں ہر ہِک کُوں اُوندے کَماں دے مطابق بدلہ ڈیساں۔

چُنانچہ میں وی آپنڑے باپ کنُوں ایجھا اِختیارپایا ہے۔ ‏28 تے میں اُونکُوں صُبح دا ستارہ ڈیساں۔

‏29 جِیندے کَن ہووݨ اوہ سُنڑے جو رُوح القُدس کلیسیاواں کُوں کیا فرمیندے۔“