‏4 ایہہ پیغام یُوحنا دی طرفوں، اُنہاں سَت کلیسیاواں دے ناں ہے جیہڑیاں آسیہ ءچ ہِن۔ تُہاکُوں فضل تے اِطمینان حاصل تھیندا رَہوے، اُوندی طرفوں جیہڑا ہے، جیہڑا ہا تے جیہڑا آوݨ آلا ہے، تے اُنہاں سَت رُوحاں^a دی طرفوں جیہڑیاں اُوندے تخت دے سامنڑے ہِن، ‏5 تے یسوع مسیح دی طرفوں جیہڑا سچا گواہ تے مُردیاں ءچوں زندہ تھیوݨ آلیاں ءچ پلیٹھی دا بال تے دُنیا دے بادشاہاں اُتے حُکمران ہے۔

اوہ ساڈے نال محبت رکھیندا ہے، تے اُونیں آپنڑے خون دے وسیلہ نال ساکُوں ساڈے سارے گُناہاں کنُوں رہائی بخشی۔ ‏6 تے ساکُوں ہِک بادشاہی تے آپنڑے خُدا تے باپ دی خدمت کیتے کاہِن وی بنڑایا۔ جلال تے سلطنت ہمیشاں تئیں اُوندا رَہوے۔آمین۔

‏8 خُداوند خُدا جیہڑا ہے، جیہڑا ہا تے جیہڑا آوݨ آلا ہے یعنی قادر ِمطلق فرمیندا ہے "الفا تے اومیگا میں ہاں ^b۔"

‏9 میں یُوحنا، تُہاڈا بِھرا تے یسوع ءچ ڈُکھ ،بادشاہی تے صبر ءچ تُہاڈا شریک ہاں۔ میں خُدا دا کلام سُنڑاوݨ تے یسوع دی گواہی ڈیوݨ دی وجہ کنُوں اُوں جزیرہ اُتے موجود ہم جیہڑا پِتمُس^c اَکھویندا ہے۔ ‏10 خُداوند دے ڈینہہ ^dمیڈے اُتے ہِک روحانی کیفیت طاری تھی گئی تے میں آپنڑے پِچھوں نرسنگے جیہی ہِک آواز سُنڑی۔ ‏11 جیہڑی آہدھی پئی ہئی جو "جیہڑا کُجھ تُوں ڈیدھا ہئیں اُونکُوں ہِک کتاب ءچ لکھ گِھن تے سَتاں کلیسیاواں کُوں بھیج ڈے یعنی اِفِسُس، سمُرنہ، پِرگمُن ،تھواتِیرہ،سردِیس، فِلَدِلفیہ تے لَودیکیہ ءچ۔“

‏12 جِیں وَیلے میں اُوں آواز آلے کُوں ڈیکھنڑ کیتے مُڑیا جیہڑا میڈے نال کلام کریندا پِیا ہا تاں میکُوں سونے دے سَت چراغ دان نِظر آئے۔ ‏13 تے میں اُنہاں چراغ داناں دی اَدھ ءچ ہِک اِبنِ آدم جِیہا شخص ڈِٹھا ۔اُوہ پیراں تئیں چولا پاتی تے سینہ اُتے سنہری سینہ بند بَدھی پِیا ہئی۔ ‏14 اُوندا سِر تے اُوندے وال اُون بلکہ برف وانگوں چِٹے ہَن۔اُوندے اَکھیں بھاہ دے شعلہ وانگوں ہَن۔ ‏15 اُوندے پیر بھٹی ءچ تپائے ہوئے خالص پیتل وانگوں ہَن تے اُوندی آواز زور نال وَہندے پانڑی وانگوں ہئی۔ ‏16 اُوندے سَجے ہَتھ ءچ سَت ستارے ہَن۔ اُوندے مُنہ ءچوں ہِک ڈو دھاری تیز تلوار نِکلدی ہئی تے اُوندا چہرہ اِینویں چمکدا ہا جِیویں سِجھ پوری شِدت نال چمکدا پِیا ہووے۔ ‏17 اُونکُوں ڈیکھ تے میں اُوندے پیراں ءچ بے جان جِیہا تھی تے ڈھے پِیا پَر اُونیں آپنڑا سَجا ہَتھ میڈے اُتے رکھیا تے آکھیا جو ” خوف نہ کر، میں اول تے آخر ہاں۔ ‏18 میں اوہ ہاں جیہڑا زندہ رَہندا ہاں۔ میں مَر گِیا ہم پَر ڈیکھ ہُنڑ میں ہمیشاں کیتے زندہ ہاں۔ مَوت تے عالم ِارواح دیاں چابیاں میڈے کولھ ہِن۔ ‏19 ایں واسطے جیہڑا کُجھ تَیں ڈِٹھا ہے تے جیہڑا کُجھ ہُنڑ ہے تے جیہڑا اِنہاں دے بعد واقع تھیوݨ کُوں ہے، اُنہاں کُوں لکھ گِھن۔ ‏20 جیہڑے سَت سِتارے تَیں میڈے سَجے ہَتھ ءچ ڈِٹھے ہِن تے سونے دے سَت چراغ داناں دا راز ایہہ ہے جو اوہ سَت سِتارے تاں سَت کلیسیاواں دے فرشتے^e ہِن تے سَت چراغ دان سَت کلیسیاواں ہِن۔“