سردِیس دی کلیسیا کُوں پیغام
3
1 سردِیس دی کلیسیا دے فرشتہ کُوں لکھ جوجِیندے کولھ خُدا دیاں سَت رُوحاں تے سَت ستارے ہِن، اوہ ایہہ فرمیندے جو ”میں تیڈے کَماں کُوں جانڑدا ہاں۔ تُوں زندہ اَکھویندا ہئیں، پَر ہئیں مُردہ۔ 2 نَیندر کنُوں جاگ تے جیہڑا باقی ہے تے جیہڑا مِٹنڑ آلا ہئی، اُونکُوں مضبُوط کر گِھن کیوں جو میں تیڈے کہیں کَم کُوں خُدا دی نِگاہ ءچ مکمّل نئیں ڈِٹھا۔ 3 اِیں واسطے یاد کر جو جیہڑی تعلیم تَیں گِھدی تے سُنڑی ہئی، اُوندے اُتے قائم رہ تے توبہ کر گِھن۔ پَر جے تُوں نیندر کنُوں نہ جاگ سیں تاں میں چور وانگوں آساں تے تیکُوں پتہ وی نہ ہوسی جو میں کیہڑے وَیلے تَیں اُتے آ پوساں۔ 4 پَر سردِیس ءچ تیڈے کُجھ لوک ایجھے ہِن جِنہاں نیں آپنڑی پُشاک کُوں ناپاک نئیں کیتا۔ اوہ چِٹے کپڑے پاتے ہوئے میڈے نال ٹُرسن۔ کیوں جو اوہ اِیندے لائق ہِن۔ 5 جیہڑا غالب آسی، اُونکُوں اِینویں ای چِٹے کپڑے پوا ڈِتے ویسن تے میں اُوندا ناں کِتاب ِ حیات ءچوں کڈھائیں خارج نہ کریساں بلکہ آپنڑے باپ تے اُوندے فرشتیاں دے سامنڑے اُوندے ناں دا اِقرار کریساں۔
6 جِیندے کَن ہووݨ اوہ سُنڑے جو رُوح القُدس کلیسیاواں کُوں کیا فرمیندے۔“
فِلدِلفیہ دی کلیسیا کُوں پیغام
7 فِلدِلفیہ دی کلیسیا دے فرشتہ کُوں لکھ جو
جیہڑ ا قدُوس تے برحق ہے تے داؤد دی کُنجیa رکھیندے، جِیندے کھولے ہوئے کُوں کوئی بند نئیں کر سگدا تے بند کیتے ہوئے کُوں کوئی کھول نئیں سگدا، اوہ ایہہ فرمیندے جو 8 ”میں تیڈے کَماں کُوں جانڑدا ہاں۔ ڈیکھ! میں تیڈے سامنڑے ہِک دروازہ کھول رکھیا ہے جِینکُوں کوئی بند نئیں کر سگدا۔ میں جانڑدا ہاں جوتیڈے ءچ طاقت گَھٹ ہے پَر تَیں میڈے کلام اُتے عمل کیتے تے میڈے ناں دا اِنکار نئیں کیتا۔ 9 ڈیکھ! میں شیطان دی جماعت دے اُنہاں لوکاں نال جیہڑے آپنڑے آپ کُوں بنی اِسرائیل b آہدھے ہِن پَر ہِن نئیں بلکہ کُوڑے ہِن، اِینویں کریساں جو اوہ تیڈے پیراں اُتےڈھے تےسِجدہ کریسن تے مَنے سِن جو میں تیڈے نال محبت رکھیندا ہاں۔ 10 کیوں جو تَیں میڈے صبر کرݨ دے کلام اُتے عمل کیتے، میں وی اَزمایش دے اُوں وَیلے جیہڑا ساری دُنیا اُتے آوݨ آلا ہے، تیڈی حفاظت کریساں۔
11 ڈیکھ! میں جلدی آندا پِیا ہاں۔ جیہڑا کُجھ تیڈے کولھ ہے، اُونکُوں مضبُوطی نال پکڑی رکھ تاں جو تیڈا تاج کوئی کَھس نہ گِھنے۔ 12 جیہڑا غالب آسی، میں اُونکُوں آپنڑے خُدا دے مَقدِس ءچ ہِک تھمبا بنڑا ڈیساں۔ اوہ ہمیشاں اُتھاں رَہسی تے میں اُوندے اُتے آپنڑے خُدا دا ناں تے آپنڑے خُدا دے شہر دا ناں لکھ ساں یعنی نواں یروشلیم جیہڑا میڈے خُدا دی طرفوں اَسمان کنُوں لَہوݨ آلا ہے۔ تے میں اُوندے اُتے آپنڑا نواں ناں وی لکھ ساں۔
13 جِیندے کَن ہووݨ اوہ سُنڑے جو رُوح القُدس کلیسیاواں کُوں کیا فرمیندے۔“
لَودِیکیہ دی کلیسیا کُوں پیغام
14 لَودِیکیہ دی کلیسیا دے فرشتہ کُوں لکھ جو
جیہڑا آمین ہے تے سچا تے برحق گواہ تے خُدا دی خلقت دا منبع ہے،اوہ ایہہ فرمیندے جو 15 ”میں تیڈے کَماں کُوں جانڑدا ہاں جو تُوں نہ تاں ٹَھڈا ہئیں نہ گرم۔ کاش جو تُوں ٹَھڈا یا گرم ہوندا۔ 16 پَر کیوں جو تُوں نہ گرم ہئیں نہ ٹَھڈا بلکہ نیم گرم ہئیں، اِیں واسطے میں تیکُوں آپنڑے مُنہ کنُوں کڈھ تے تُھکنڑ آلا ہاں۔ 17 تُوں آہدھیں جو میں دولت مند ہاں تے مالدار بنڑ گِیا ہاں تے کہیں چیز دا مُتھاج نئیں پَر تُوں ایہہ نئیں جانڑدا جو تُوں بدبخت، قابل ِ ترس، غریب ، اَندھا تے ننگا ہئیں۔ 18 میڈا مشورہ ایہہ ہے جو میں کنُوں بھاہ ءچ خالص کیتا ہویا سونا مُل گِھن چا تاں جو دولت مند تھی وَنجیں، تے میں کنُوں چِٹے کپڑے گِھن چا تاں جو اُنہاں کُوں پا تے تیکُوں ننگا تھیوݨ دی وجہ کنُوں شرمندہ نہ تھیونڑا پووےتے آپنڑے اَکھیں ءچ پاوݨ کیتے سُرمہ گِھن چا تاں جو ڈیکھ سگیں۔
19 میں جِنہاں نال پیار کریندا ہاں، اُنہاں کُوں ملامت تے تنبیہ وی کریندا ہاں۔ اِیں واسطے سرگرم تھی ،تے توبہ کر۔ 20 ڈیکھ ! میں دروازہ اُتے کھڑا ہاں تے کھڑکیندا پِیا ہاں۔ جے کوئی میڈی آواز سُنڑ تے دروازہ کھولیسی تاں میں اندر آتے اُوندے نال کھانڑا کھاساں تے اوہ میڈے نال۔ 21 جیہڑا غالب آسی، میں اُونکُوں آپنڑے نال آپنڑے تخت اُتے بلہیساں، جِیویں میں غالب آیا ہاں تے آپنڑے باپ دے نال اُوندے تخت اُتے بہہ گِیا ہاں۔
22 جِیندے کَن ہووݨ ، اوہ سُنڑے جو رُوح القُدس کلیسیاواں کُوں کیا فرمیندے۔“