‏7 اُنہاں ٹِڈیاں دے جسم گھوڑیاں وانگوں نظر آندے ہَن جیہڑے جنگ کیتے تیار کیتے گئے ہووݨ، اُنہاں دے سِراں اُتے جِیویں سونے دے تاج ہَن تے اُنہاں دیاں شکلاں اِنسانی شکلاں وانگوں ہَن۔ ‏8 اُنہاں دے وال عورتاں دے والاں وانگوں ہَن تے ڈند ببر شیر دے ڈنداں وانگوں ہَن۔ ‏9 اُنہاں دے سینے اُتے لوہے آلی کار بکتر ہَن، تے اُنہاں دے کھنباں دی آواز ایجھی ہئی جِیویں جنگ دے میدان ءچ بے شمار گھوڑیاں تے رتھاں دے دَھروکنڑ نال تھیندی ہے۔ ‏10 اُنہاں دیاں پُچھاں تے ڈنگ وٹھوویاں وانگوں ہَن تے اُنہاں دیاں پُچھاں ءچ پَنچ مہینے تئیں لوکاں کُوں اذیت ڈیوݨ دی طاقت ہئی۔ ‏11 گڑھے دا فرشتہ اُنہاں دا بادشاہ ہا۔ اُوندا ناں عِبرانی ءچ "ابدّون" تے یُونانی ءچ "اپُلّیون" ہے^a۔

‏12 پہلا افسوس تاں تھی گِیا، اِیندے بعد ڈو افسوس تھیوݨ آلے ہِن۔

‏13 جِیں وَیلے چِھیویں فرشتہ نیں آپنڑا نرسنگا پھونکیا تاں میں خُدا دے سامنڑے آلی سنہری قُربان گاہ دے چار سِینگاں کنُوں ہِک آواز آندی سُنڑی۔ ‏14 اُوہ اُوں چھیویں فرشتہ کُوں جیہڑا نرسنگا گِھدی کھڑا ہئی ایہہ آہدھی پئی ہئی جو ”اُنہاں چارے فرشتیاں کُوں جیہڑے وَڈے دریائے فرات دے کولھ بدھے پئے ہِن، کھول ڈِے۔“ ‏15 اوہ چارے فرشتے جیہڑے خاص کر اُونہئی سال تے اُونہئی مہینے تے اُونہئی ڈِیہنہ تے اُونہئی لاحظے کیتے تیار کیتے گئے ہَن، کھول ڈِتے گئے تاں جو ہِک تِہائی اِنساناں کُوں مار سَٹنڑ۔ ‏16 میکُوں سُنڑائی ڈِتا جو اُنہاں دے سوار فوجاں دی تعداد وِیح کروڑ ہئی۔ ‏17 اوہ گھوڑے تے اُنہاں دے سوار جِنہاں کُوں میں آپنڑی رویا ءچ ڈِٹھا ہا، ایجھے بکتر پاتی وَدے ہَن جیہڑے بھاہ وانگوں رَتے، سُنبل وانگوں نیلے تے گندھک وانگوں زرد ہَن۔ تے اُنہاں گھوڑیاں دے سِر ببر شیر وانگوں ہَن۔ اُنہاں دے مُنہ کنُوں بھاہ، دُھوواں تے گندھک نِکلدی ہئی۔ ‏18 اِنہاں تَرے آفتاں یعنی بھاہ، دُھوئیں تے گندھک دی وجہ کنُوں جیہڑی اُنہاں دے مُنہ کنُوں نِکلدی ہئی، بنی نوع اِنسان دی ہِک تِہائی آبادی ہلاک تھی گئی۔ ‏19 اُنہاں گھوڑیاں دی طاقت اُنہاں دے مُنہ تے پُچھاں ءچ ہئی۔ ایہہ پُچھاں ناگاں وانگوں ہَن جِنہاں دے سِرنُقصان پُچیندے ہَن۔

‏20 باقی لوکاں نیں جیہڑے اُنہاں آفتاں کنُوں نہ مرے، آپنڑے ہتھاں دے کَماں کنُوں توبہ نہ کیتی ۔اوہ اُنہاں شیاطین دی تے سونے، چاندی، پِتل تے لکڑ دے بنڑے ہوئے بُتاں دی عبادت کرݨ تُوں باز نہ آئے جیہڑیاں نہ تاں ڈیکھ سگدیاں ہِن، نہ سُنڑ سگدیاں ہِن تے نہ ٹُر سگدیاں ہِن۔ ‏21 تے اُنہاں نیں قتل، جادوگری، حرام کاری تے چوری کرݨ تُوں توبہ نہ کیتی۔