22
1 وَل اُوں فرشتہ نیں میکُوں آب ِ حیات دا دریا ڈِکھایا جیہڑا بَلور آلی کار شفاف ہا تے خُدا تے برّہ دے تخت کنُوں نِکل تے 2 اُوں شہر دی وَڈی سڑک دے اَدھ ءچوں وَہندا ہا۔اُوں دریا دےڈوہائیں پاسوں حیات دا درخت ہئی۔ اوہ درخت پھلاں دیاں بارہاں فصلاں ڈیندا ہئی یعنی ہر مہینہ پھل ڈیندا ہئی تے اُوندے پتیاں کنُوں قوماں کُوں شِفا مِلدی ہئی۔ 3 اُتھاں لعنت کڈھائیں نہ ہوسی۔خُدا تے برّہ دا تخت اُوں شہر ءچ ہوسی تے اُوندے بندے اُوندی عبادت کریسن۔ 4 اوہ اُوندا چہرہ ڈیکھسن تے اُوندا ناں اُنہاں دے مَتھیاں اُتے لکھیا ہوسی۔ 5 وَل کڈھائیں رات نہ تھیسی تے اوہ چراغ تے سِجھ دی روشنی دے مُتھاج نہ ہوسن کیوں جو خُداوند خُدا خود اُنہاں کُوں روشنی ڈیسی تے اوہ ہمیشاں تئیں بادشاہی کریندے رَہسن۔
یسوع مسیح دی ڈوجھی آمد
6 اُوں فرشتہ نیں میکُوں آکھیا، ”ایہہ گالھیں سچ تے برحق ہِن۔ خُداوند نیں جیہڑا نبیاں دیاں رُوحاں دا خُدا ہے، آپنڑا فرشتہ اِیں غرض نال بھیجیا ہے جو اوہ آپنڑے بندیاں اُتے اوہ گالھیں ظاہر کرے جِنہاں دا جلدی واقع تھیوݨ ضرور ہے۔“
7 ”ڈیکھ، میں جلدی آوݨ آلا ہاں۔
مُبارک ہے اوہ جیہڑا اِیں نبوت دے گالھیں اُتے عمل کریندا ہے۔“
8 میں اُوہو یُوحنا ہاں جئیں اِنہاں گالھیں کُوں سُنڑیا تے ڈِٹھا۔ جِیں وَیلے میں ایہہ گالھیں سُنڑ تے ڈیکھ گِھدیاں تاں جئیں فرشتہ نیں میکُوں ایہہ گالھیں ڈِکھایاں ہَن، میں اُوندے پیراں ءچ سِجدہ ءچ ڈھے پِیا۔ 9 پَر اُونیں میکُوں آکھیا،”خبردار! اِینویں نہ کر۔ میں وی تیڈا، تیڈے بِھرانواں دا جیہڑے نبی ہِن تے اُنہاں ساریاں دا جیہڑے اِیں کِتاب دی نبوت دے گالھیں مَنیندے ہِن، ہم خدمت ہاں۔ خُدا ای کُوں سِجدہ کر۔“ 10 وَل اُونیں میکُوں آکھیا جو”تُوں اِیں کِتاب دی نبوت دے گالھیں کُوں مہرلا تےبند کرتے نہ رکھ کیوں جو وقت نزدیک ہےa۔ 11 جیہڑا بُرائی کریندے، اوہ بُرائی ای کریندا وَنجے۔ جیہڑا ناپاک ہے، اوہ ناپاک ای تھینداوَنجے۔ جیہڑا راستباز ہے ،اوہ راستبازی ای کریندا وَنجے۔ تے جیہڑا پاک ہے، اوہ پاک ای تھیندا وَنجے۔“
مسیح دا اعلان
12 ”ڈیکھ! میں جلدی آوݨ آلا ہاں تے ہر ہِک دے کَم دے مطابق ڈیوݨ کیتے اَجر میڈے کولھ ہے۔ 13 الفا تے اومیگا، اول تے آخر، ابتدا تے اِنتہا میں ہاں۔
14 مُبارک ہِن اوہ جیہڑے آپنڑے چولے دھوندے ہِن کیوں جو حیات دے درخت تئیں پُجنردا حق پے سِن تے اُنہاں پھاٹکاں کنُوں شہر ءچ داخل تھیسن۔ 15 پَر کُتے، جادوگر، حرام کار، خونی، بُت پرست، کُوڑی گالھ دا گھڑن آلا تے پسند کرݨ آلا باہر رہ ویسی۔
16 میں یسوع نیں آپنڑا فرشتہ اِیں کیتے بھیجیا ہے جو اوہ کلیسیاواں کیتے اِنہاں گالھیں دی تُہاڈے اَگوں گواہی ڈیوے۔ میں داؤد دی اصل تے نسل تے صُبح دا نورانی سِتارہ ہاں۔"
17 رُوح تے کُنوار آہدھی ہے،”آ “ تے اوہ وی جیہڑا سُنڑدا ہے، آکھے،”آ۔“ جیہڑا تَرِسا ہووے اوہ آوے تے آب ِ حیات مُفت حاصل کر گِھنے۔
اِختتامیہ
18 میں ہر ہِک آدمی دے اَگوں جیہڑا اِیں کِتاب دی نبوت دے گالھیں سُنڑدا ہے گواہی ڈیندا ہاں جو جے کوئی آدمی اُنہاں ءچ کُجھ وَدھیسی تاں خُدا اِیں کِتاب ءچ لکھیاں ہویاں آفتاں اُوندے اُتے نازل کریسی۔ 19 تے جے کوئی نبوت دی کِتاب دے اِنہاں گالھیں ءچوں کُجھ کڈھیسی تاں خُدا اُوں حیات دے درخت تے مُقدّس شہر ءچوں جِنہاں دا ذِکر اِیں کِتاب ءچ ہے ،اُوندا حصہ کڈھ ڈیسی۔
20 اِنہاں گالھیں دی گواہی ڈیوݨ آلا فرمیندے، ”بے شک میں جلدی آوݨ آلا ہاں۔“
”آمین! ہاں اے خُداوند یسوع آ۔“
21 خُداوند یسوع دا فضل مُقدساں دے نال رَہوے۔ آمین۔