تاکِستان دے ٹھیکیداراں دی تمثیل
12
1 وَل یسوع اُنہاں نال تمثیلاں ءچ گالھیں کرݨ لگا جو ہِک بندے نیں تاکِستان رَہایا تے اُوندے چودھارُوں واڑ ڈِتی تے حوض کھودیا تے چوکیداری کیتے ہِک بُرج بنڑایا تے اُوں تاکِستان کُوں ٹھیکیداراں کُوں کاشتکاری کیتے ڈے تے خود پردیس چلیا گِیا ۔ 2 وَل پھل دے موسم ءچ اُونیں ہِک نوکر کُوں ٹھیکیداراں دے کولھ پھل دا آپنڑا حصہ گِھننڑ کیتے بھیجیا ۔ 3 پَر اُنہاں اُونکُوں پکڑ تے کُٹیا تے خالی ہَتھ بھیج ڈِتا ۔ 4 اُونیں وَل ہِک بئے نوکر کُوں بھیجیا پَر اُنہاں اُوندا سِر پھاڑ ڈِتا تے بے عزت کیتا ۔ 5 وَل اُونیں ہِک بئے کُوں بھیجیا ، اُنہاں اُونکُوں قتل کر ڈِتا ۔ اِیویں ای بہُوں آدمی بھیجے ۔ ٹھیکیداراں اُنہاں ءچوں کُجھ کُوں کُٹیا تے کُجھ کُوں قتل کر ڈِتا ۔ 6 ہُنڑ ہِکو رَہندا ہا جیہڑا اُوند ا پیارا پوتر ہا ۔ اُونیں آخر ایہہ سوچ تے جو اوہ میڈے پوتر دا تاں لحاظ کریسن ، اُونکُوں اُنہاں دے کولھ بھیج ڈِتا ۔ 7 پَر ٹھیکیدار آپس ءچ آکھنڑ لگے جو اِیہو وارث ہے ، آؤ اَساں اِینکُوں مار سَٹوں ، جائیداد ساڈی تھی وَیسی۔ 8 بس اُنہاں اُونکُوں پکڑ تے قتل کر ڈِتا تے تاکِستان دے باہر سَٹ ڈِتا ۔9 وَل تاکِستان دا مالک کیا کریسی؟ اوہ آسی تے اُنہاں ٹھیکیداراں کُوں ہلاک کرتے تاکِستان ڈوجھیاں دے سپُرد کر ڈیسی۔ 10 کیا تُساں ایہہ نوشتہ وی نئیں پڑھیا جو
جِیں پتھر کُوں مِستریاں رَد کر ڈِتا
اُوہو کونے دے سِرے دا پتھر تھی گِیا ۔
11 ایہہ خُداوند دی طرفوں تھیّا ،تے ساڈی نظر ءچ عجیب ہے ؟
12 اِیں تُوں اوہ یسُوع کُوں پکڑن دی کوشش کرݨ لگے کیوں جو اوہ سمجھ گئے ہَن جو ایہہ تمثیل اُنہاں دے خِلاف آکھی گِئی ہے پَر لوکاں دے ڈر دی وجہ کنُوں اُونکُوں چھوڑ تے چلے گئے ۔
جزیہ ڈیوݨ دے بارے ءچ سوال
13 وَل اُنہاں کُجھ فریسیاں تے ہیرودیاں کُوں اُوندے کولھ بھیجیا تاں جو اُوندی کوئی گالھ پکڑ سگن ۔ 14 اُنہاں آتے اُونکُوں آکھیا اے اُستاد ! اَساں جانڑدے ہاں جو تُوں سچا ہیں، تے کہیں دا طرفدار نئیں ،تے ایہہ خیال کیتے بغیر جو کوݨ کیا ہے سچائی نال خُدا دی راہ ڈسیندیں ۔بس قیصر کُوں جَزیہ ڈیوݨ جائز ہے یا نئیں ؟ اَساں ڈیؤں یا نا ڈیؤں ؟
15 اُونیں اُنہاں دی مکاری کُوں معلوم کرتے اُنہاں کُوں آکھیا تُساں میکُوں کیوں اَزمیندے ہِوے ؟ میڈے کولھ ہِک دینار گِھن آؤ جو میں ڈیکھاں ۔
16 اوہ گھِن آئے ۔ اُونیں اُنہاں کُوں آکھیا ایہہ صورت تے ناں کِیندا ہے ؟
اُنہاں آکھیا قیصر دا ۔
17 یسُوع اُنہاں کُوں آکھیا جیہڑا قیصر دا ہے اوہ قیصر کُوں، تے جیہڑا خُدا دا ہے اوہ خُدا کُوں ڈِتا کرو ۔
اوہ یسوع اُتے وَڈا تعجب کرݨ لگے ۔
مُردیاں دی قیامت دے بارے ءچ سوال
18 وَل صدوقیاں جیہڑے قیامت دے منکر ہَن ،اُوندے کولھ آ تے اُونکُوں ایہہ سوال کیتا جو 19 اے اُستاد !ساڈے کیتے موسیٰ لکھیا ہے جو جے کہیں دا بِھرا مَر وَنجے تے آپنڑیں ذال بے اولاد چھوڑ وَنجے تاں اُوندا بِھرا اُوندی ذال نال شادی کر گِھنے تاں جو آپنڑے بِھرا کیتے نسل پیدا کرے ۔ 20 سَت بِھرا ہَن ۔ پہلے نیں شادی کیتی تے بے اولاد مَر گِیا ۔ 21 ڈوجھے بِھرا اُوں بیوہ نال شادی کر گھِدی پَر اوہ وی بے اولاد مَر گِیا تے اِیویں ای تَریجھے نیں کیتا ۔ 22 ایہہ تَئیں جو سَتاں اُوں عورت نال شادی کیتی پَر بے اولاد مَر گئے ،تے آخر اوہ عورت وی مَر گئی ۔ 23 قیامتءچ ایہہ کِیندی ذال ہوسی ؟ کیوں جو اوہ سَتاں دی ذال بنڑی ہئی ۔
24 یسُوع اُنہاں کُو ں آکھیا کیا تُساں اِیں سبب تُوں گمراہ نئیں جو نہ خُدا دے کلام کُوں جانڑدے ہِوے ، نہ خُدا دی قُدرت کُوں ؟ 25 کیوں جو جِیں وَیلے لوک مُردیاں ءچوں زندہ تھیسن تاں اُنہاں ءچ شادی بیاہ نہ ہوسی، بلکہ اَسمان اُتے فرشتیاں وانگوں ہوسن ۔ 26 پَر اِیں بارے ءچ جو مُردے زندہ تھیندے ہِن ، کیا تُساں موسیٰ دی کتاب ءچ جھاڑی دے بیان ءچ ایہہ نئیں پڑھیا جو خُدا موسیٰ کُوں آکھیا میں ابرہام دا خُدا تے اَضحاق دا خُدا تے یعقوب دا خُدا ہاں ؟ 27 اوہ مُردیاں دا خُدا نئیں بلکہ زندیاں دا خُدا ہے ۔ بس تُساں بالکل گمراہ ہِوے؟
سبھ کنُوں وَڈا حکم
28 تے فقیہاں ءچوں ہِک اُنہاں کُوں تکرار کریندے سُنڑ تے جاݨ گِھدا جو اُونیں اُنہاں کُوں چنگا جواب ڈتے ۔ اوہ کولھ آیا تے اُوں کنُوں پُچھیا جو سبھ حُکماں کنُوں وڈا حکم کیہڑا ہے ؟
29 یسُوع جواب ڈِتا اوّل ایہہ ہے
اے اِسرائیل سُنڑ ! خُداوند ساڈا خُدا ہِک ای خُداوند ہے ۔
30 تے تُوں خُداوند آپنڑے خُدا نال آپنڑے سارے دِل تے آپنڑیں ساری جان تے آپنڑیں ساری عقل تے آپنڑیں ساری طاقت نال محبت رکھ ۔
31 ڈوجھا ایہہ ہے جو
تُوں آپنڑے ہمسائے نال آپنڑے وانگوں محبت رکھ ۔
اِنہاں کنُوں وَڈا بِیا کوئی حکم نئیں ۔
32 فقیہہ اُونکُوں آکھیا اے اُستاد بہُوں خوب ! تُوں سچ آکھے جو اوہ ہِک ای ہے تے اُوندے سِوا بِیا کوئی نئیں ۔ 33 تے اُونکُوں سارے دِل تے ساری عقل تے ساری طاقت نال محبت رکھنڑ تے آپنڑے ہمسائے کُوں آپنڑے وانگوں پیار کرݨ ساری سوختنی قربانیاں تے نذراں کنُوں وَدھ ہے ۔
34 جِیں وَیلے یسُوع ڈِٹھا جو اُونیں عقلمندی نال جواب ڈِتے تاں اُونکُوں آکھیا تُوں خُدا دی بادشاہی کنُوں دُور نئیں ۔
تے وَل کہیں اُونکُوں سوال کرݨ دی جرأت نہ کیتی ۔
مسیح دے بارے ءچ سوال
35 وَل یسُوع ہیکل ءچ تعلیم ڈیندےہوئے آکھیا جو فقیہہ کیونکر آہدھے ہِن جو المسیح داؤد دا پوتر ہے ؟ 36 داؤد خود رُوح القُدس دی ہدایت نال آہدھے جو
خُداوند نیں میڈے خُداوند کُوں آکھیا
میڈے سجے پاسوں بہہ
جئیں تَئیں میں تیڈے دشمنڑاں کُوں تیڈے پَیراں
دے تَلے دی چوکی نہ کر ڈیواں ۔
37 داؤد تاں خود اُونکُوں خُداوند آہدھے وَل اوہ کیویں اُوندا پوتر تھی سگدے ؟
تے عام لوک خوشی نال اُوندی سُنڑدے ہَن ۔
یسُوع فقیہاں دے خِلاف خبردار کریندے
38 وَل اُونیں آپنڑیں تعلیم ءچ آکھیا جو فقیہاں کنُوں خبردار رواہے جیہڑے لمبے لمبے چولے پاتے پِھرݨ پسند کریندے ہِن تے چاہندے ہِن جو لوک بازاراں ءچ اُنہاں کُوں سلام کرݨ ، 39 تے عبادت خانیاں ءچ اُچے مقام دی کُرسیاں تے ضیافتءِچ صدارت چاہندےہِن ۔ 40 اوہ بیواواں دے گھراں کُوں ہڑپ کر گِھندے ہِن تے ڈکھاوے کیتے لمبیاں لمبیاں دُعاواں کریندے ہِن ۔ اُنہاں کُوں زیادہ سزا مِلسی ۔
ہِک بیوہ دا نذرانہ
41 وَل یسوع ہیکل دے خزانے دے سامنڑے بیٹھا ڈیدھا پِیا ہا جو لوک ہیکل دے خزانے ءچ پیسے کیویں سَٹیندے ہِن،تے بہُوں سارے دولت مند بہُوں کُجھ سَٹیندے پئے ہَن ۔ 42 اِتنی دیر ءچ ہِک غریب بیوہ اُتھاں آئی تے اُونیں ڈو دمڑیاںa یعنی ہِک دھیلا سَٹیا ۔ 43 اُونیں شاگرداں کُوں کولھ سَڈ تے آکھیا میں تُہاکُوں سچ آہدھا ہاں جو جیہڑے ہیکل دے خزانے ءچ سَٹیندے پئے ہِن، اِیں غریب بیوہ اُنہاں سبھ کنُوں زیادہ سَٹیا ہے ۔ 44 کیوں جو ساریاں آپنڑے بہوں مال ءچوں کُجھ حصہ سٹّے پَر اِیں بیوہ غریبی دے باوجود سبھ کُجھ جیہڑا اُوندے کولھ ہا ڈے ڈِتا یعنی آپنڑیں ساری روزی سَٹ ڈِتی ۔