یسُوع دی پیدائش
2
1 اُنہاں ڈینہاں ءچ ایویں تھیّا جو قیصر اَوگُوستُس دی طرفوں ایہہ فرمان جاری تھیّا جورُومی سلطنت دے سارے لوکاں دے ناں لکھے وَنجنڑ ۔ 2 ایہہ پہلی مردم شماری سُوریہ دے حاکم کورنِیُس دےعہد ءچ تھئی ۔ 3 تے سبھ لوک ناں لکھواوݨ کیتے آپنڑے آپنڑے شہرکُوں گئے ۔4 بس یُوسف وی گلیل دے شہر ناصرت تُوں یہُودیہ ءچ داؤد دے شہر بیت لحم کُوں گیا، کیوں جو اوہ داؤد دے گھرانے تےاولاد ءچوں ہا ۔ 5 تاں جو آپنڑیں منگیتر مریم دے نال جیہڑی حاملہ ہئی ، ناں لکھواوے ۔ 6 جِیں وَیلے او ہ اُتھاں ہَن تاں مریم دے وضع ِ حمل دا وقت آ گِیا ۔ 7 تے اُوندا پلوٹھا پوتر پیدا تھیّا تے اُونیں اُونکُوں کپڑے ءچ وَلھیٹ تے کُھرلی ءچ رکھ ڈِتا کیوں جو اُنہاں کیتے سراں ءچ جاہ نہ ہئی ۔
آجڑی تے فرشتے
8 اُوں علاقے ءچ کُجھ آجڑی ہَن جیہڑے رات کُوں میدان ءچ رہ تے آپنڑے اِجڑ دی رکھوالی کریندے پئے ہَن ۔ 9 تے خُداوند دا فرشتہ اُنہاں اُتے ظاہر تھیّا تے خُداوند دا جلال اُنہاں دے چودھارُوں چمکیا تے اوہ بہُوں ڈر گئے ۔ 10 پَر فرشتہ نیں اُنہاں کُوں آکھیا ڈرو نہ ،کیوں جو ڈیکھو میں تُہاکُوں وَڈی خوشی دی بشارت ڈیندا ہاں جیہڑی ساری اُمت کیتے ہوسی 11 جو اَج داؤد دے شہر ءچ تُہاڈے کیتے ہِک نجات ڈیوݨ آلاپیدا تھئے یعنی خُداوند المسیح ۔ 12 تے اُوندا تُہاڈے کیتے ایہہ نشان ہے جو تُساں ہِک بال کُوں کپڑے ءچ وَلھیٹیا تے کُھرلی ءچ پِیا ہویا پے سو ۔
13 تے ہِک دَم اَسمانی فرشتیاں دی ہِک گروہ اُوں فرشتہ نال خُدا دی حمد کریندی تے ایہہ آہدھی ظاہر تھئی جو
14 عرش ِ بریں اُتے خُدا دی تمجید ہووے
تے زمین اُتے اُنہاں آدمیاں نال جِنہاں تُوں اوہ خوش ہے صُلح ۔
15 جِیں وَیلے فرشتے اُنہاں دے کولُھوں اَسمان اُتے چلے گئے تاں ایویں تھیّا جو آجڑیاں آپس ءچ آکھیا جو آؤ بیت لحم تَئیں جُلوں تے ایہہ گالھ جیہڑی تھئی ہے تے جِیندی خُداوند ساکُوں خبر ڈِتی ہے، ڈیکُھوں۔
16 بس اُنہاں جلدی نال وَنج تے مریم تے یُوسف کُوں پایا تے اُوں بال کُوں کُھرلی ءچ پِیا ہویا ڈِٹھا ۔ 17 تے اُنہاں کُوں ڈیکھ تے او ہ گالھ جیہڑی اُوں بال دے بارے ءچ آکھی گئی ہئی ، مشہور کیتی ۔ 18 تے آجڑیاں دے گالھیں سُنڑ تے سارے لوک حیران تھئے تے تعجُب کرݨ لگے ۔ 19 پَر مریم اِنہاں سارے گالھیں کُوں آپنڑے دِل ءچ رکھ تے غور کریندی ریہی۔ 20 تے آجڑیاں کُوں جیویں ڈسایا گِیا ہا اُونویں ای سبھ کُجھ ڈیکھ ، تے سُنڑ تے خُدا دی حمد و ثنا کریندے ہوئے وَل گئے۔
یسُوع دا ناں رکھیا وَیندے
21 جِیں وَیلے اَٹھ ڈینہہ پورے تھئے تے اُوندے ختنہ دا وقت آیا تاں اُوندا ناں یسُوع رکھیا گیا جیہڑا فرشتہ نیں حمل تھیوݨ کنُوں پہلے رکھیا ہا ۔
یسُوع کُوں ہیکل ءچ پیش کیتا وَیندے
22 وَل جِیں وَیلے موسیٰ دی شریعت دے مطابق اُوندے پاک تھیوݨ دے ڈینہہ پورے تھی گئے تاں اوہ اُونکُوں یروشلِیم گِھن آئے تاں جو خُداوند دے حضور پیش کرݨ ۔ 23 جیویں خُداوند دی شریعت ءچ لکھیا ہے جو ہر ہِک پلوٹھا خُداوند کیتے مخصوص کیتا ویسی ۔ 24 تے خُداوند دی شریعت دے اِیں قول دے مطابق قربانی کرݨ جو قُمریاں دا ہِک جوڑا یا کبوتر دے ڈو بچے گِھن آؤ ۔
25 تے ڈیکھو یروشلیم ءچ ہِک آدمی جِیندا نا ں شمعون ہا ،اوہ راستباز تے خُدا ترس تے اِسرائیل دی تسلی دا منتظر ہا تے رُوح القُدس اُوندے اُتے ہا ۔ 26 تے رُوح القُدس اُونکُوں ڈسا ڈِتا ہا جو جئیں تَئیں تُوں خُداوند دے المسیح کُوں ڈیکھ نہ گِھنیں ، موت کُوں نہ ڈیکھسیں ۔ 27 اوہ رُوح دی ہدایت نال ہیکل ءچ آیا، تے جیہڑے وَیلے ماں پیُو اُوں چھوہر یسُوع کُوں اندر گِھن آئے تاں جو اُوندے کیتے شریعت دے فرائض ادا کرݨ 28 تاں اُونیں اُونکُوں آپنڑیں جھولی ءچ گِھن گِھدا تے خُدا دی حمد کر تے آکھنڑ لگا جو
29 اے مالک تُوں آپنڑے وعدے دے مطابق ،
ہُنڑ آپنڑے خادم کُوں سلامتی نال رخصت کر ۔
30 کیوں جو میڈے اَکھیں نیں تیڈی نجات ڈیکھ گِھدی ہے
31 جیہڑی تُوں ساری اُمتاں دے سامنڑے تیار کیتی ہے
32 تاں جو غیرقوماں کُوں روشنی ڈیوݨ آلا نُور
تے تیڈی اُمت اِسرائیل دا جلال بنڑے ۔
33 تے اُوندا پیُو تے اُوندی ماں اِنہاں گالھیں کُوں جیہڑیاں اُوندے حق ءچ آکھیاں وَیندیاں ہَن ، حیران تھیندے ہَن ۔ 34 تے شمعون نیں اُوندے کیتے دُعائے خیر کیتی تے اُوندی ماں مریم کُوں آکھیا ایہہ بال اِسرائیل ءچ بہُوں سارے لوکاں دے زوال تے عروج کیتے تے ایجھا نشان ہووݨ کیتے مقرر تھئے جِیندی مُخالفت کیتی ویسی۔ 35 تاں جو بہُوں سارے لوکاں دے دلاں دے گُمان ظاہر تھی وَنجنڑبلکہ خود تیڈی جان وی تلوار نال چِھد ویسی۔
36 آشر دے قبیلے ءچوں حنّاہ ناں دی ہِک عورت فنوایل دی دِھی ، ہِک نبیّہ ہئی ۔ اوہ بہُوں عمر رسیدہ ہئی، تے آپنڑیں شادی دے بعد سَت سال تَئیں آپنڑے پائے دے نال رہندی رہی ہئی 37 اوہ چوراسی سال کنُوں بیوہ ہئی، تے ہیکل تُوں جُدا نہ تھیندی ہئی بلکہ رات ڈینہہ روزے تے دُعاواں نال عبادت کریندی رہندی ہئی ۔ 38 تے اوہ اُوں وَیلے اُتھاں آتے خُدا دا شُکر کرݨ لگی تے اُنہاں ساریاں نال جیہڑے یروشلیم دی رہائی دے منتظر ہَن ، اُوندے متعلق گالھیں کرݨ لگی ۔
مریم تے یوسف دی ناصرت کُوں واپسی
39 جِیں وَیلے اُنہاں خُداوند دی شریعت دے مطابق سبھ کُجھ کر گِھدا تاں گلیل ءچ آپنڑے شہر ناصرت کُوں وَل گئے ۔ 40 تے اوہ چھوہر وَدھدا تے زور پکڑیندا گِیا تے حِکمت نال بھرِیندا گِیا تے خُدا دا فضل اُوندے اُتے ہا ۔
یسُوع ہیکلءِچ
41 اُوندے ماں پیُو ہر سال عید ِ فسح کیتے یروشلیم ویندے ہَن 42 تے جِیں وَیلے اوہ بارہاں سال دا تھیّا تاں او ہ عید دے دستور دے مطابق یروشلیم گئے ۔ 43 جِیں وَیلےعید دے ڈینہہ پورے تھئے تے اُوندے ماں پیُو وَل گئے پَر اوہ چھوہر یسُوع یروشلیم ءچ رہ گِیا تے اُنہاں کُوں خبر نہ تھئی ۔ 44 پَر ایہہ سوچ تے جو اوہ قافلے ءچ ہے ، اُوندے ماں پیُو ہِک ڈینہہ دا سفرکر تے اُونکُوں آپنڑے رشتہ داراں تے ساتھیاں ءچ گولھنڑ لگے ۔ 45 جِیں وَیلے نہ مِلیا تاں اُونکُوں گولھیندے ہوئے یروشلیم تَئیں واپس گئے ۔ 46 تے تَرے ڈینہہ بعد اُنہاں اُونکُوں ہیکل ءچ اُستاداں ءچ بیٹھے ، اُنہاں دی سُنڑ دے تے اُنہاں نال سوال کریندے ڈِٹھا ۔ 47 تے جتّی اُوندی سُنڑدے پئے ہَن ، اُوندی ذہانت تے اُوندے جواب سُنڑ تے حیران ہَن ۔ 48 اوہ اُونکُوں ڈیکھ تے حیران تھئے تے اُوندی ماں نیں اُونکُوں آکھیا پوتر !تَیں ساڈے نال ایویں کیوں کیتا ؟ڈیکھ تیڈا پیُو تے میں کُڑھدے ہوئے تیکُوں گولھیندے پئے ہاسے ۔
49 اُونیں اُنہاں کُوں آکھیا تُساں میکُوں کیوں گولھیندے پئے ہاوے ؟ کیا تُہاکُوں پتا نہ ہا جو میکُوں آپنڑے باپ دے گھر ہووݨ لازم ہے ؟ 50 پَر او ہ نہ سمجھ سگے جو اوہ اُنہاں کُوں کیا آہدھے ۔