‏7 بس جیہڑے لوک اُوندے کولُھوں بپتسمہ گِھننڑ کیتے آندے ہَن اوہ اُنہاں کُوں آہدھاہا ، اے ناگ دے بچو ! تُہاکُوں کئیں جتا ڈِتےجو آوݨ آلے قہر کنُوں بھجو ؟ ‏8 بس توبہ دے لائق پَھل گِھن آؤ ،تے آپنڑیں اِیں بُھل ءچ نہ رَہو جو ابرہام ساڈا پیُو ہے کیوں جو میں تُہاکُوں آہدھا ہاں جو خُدا اِنہاں پتھراں کنُوں ابرہام کیتے اولاد پیدا کر سگدے ۔ ‏9 تے ہُنڑ تاں درختاں دی جڑھ اُتے کُوہاڑا رکھ ڈِتا گئے ۔ بس جیہڑا درخت چنگا پَھل نئیں ڈیندا اوہ کَپیا تے بھاہ ءچ سَٹ ڈِتا ویندے ۔

‏10 لوکاں اُوں کنُوں پُچھیا وَل اَساں کیا کرو ں ؟

‏11 اُونیں جواب ءچ اُنہاں کُوں آکھیا جِیندے کولھ ڈو چولے ہووݨ ، اُونکُوں جِیندے کولھ ہِک وی نہ ہوے ونڈا ڈیوے تے جِیندے کولھ کھانڑا ہووے اوہ وی اِیویں ای کرے ۔

‏12 تے محصُول گِھننڑ آلے وی بپتسمہ گِھننڑ آئے تے اُوں کنُوں پُچھنڑ لگے جو اے اُستاد ، اَساں کیا کروں ؟

‏13 اُونیں اُنہاں کُوں آکھیا جیہڑا تُہاڈے کیتے مقرر ہے اُوں کنُوں زیادہ نہ گِھنو۔

‏14 سپاہیاں وی اُوں کنُوں پُچھیا جو اَساں کیا کروں ؟

اُونیں اُنہاں کُوں آکھیا کہیں اُتے ظلم نہ کرو تے نہ کہیں تُوں ناحق کُجھ گِھنو تے آپنڑیں تنخواہ اُتے گُزارہ کرو ۔

‏15 جِیں وَیلے لوک اِنتظار ءچ ہَن تے سارے آپنڑے آپنڑے دِل ءچ یُوحنّا دے بارے سوچیندے پئے ہَن جو شاید اوہ المسیح ہے یا نئیں، ‏16 تاں یُوحنّا سبھ کُوں جواب ءچ آکھیا میں تاں تُہاکُوں پانڑی نال بپتسمہ ڈیندا ہاں ،پَر جیہڑا میڈے کنُوں زور آور ہے ، اوہ آوݨ آلا ہے ۔ میں اُوند ی جُتی دا تسمہ کھولنڑ دے لائق نئیں ۔ اوہ تُہاکُوں رُوح القُدس تے بھاہ نال بپتسمہ ڈیسی ۔ ‏17 اُوندا ترینگل اُوندے ہَتھ ءچ ہے تاں جو اوہ آپنڑے کھلیان کُوں چنگی طرح صاف کرے، تے دانڑیاں کُوں آپنڑے پَلیاں ءچ جمع کرے پَر بُھوں کُوں بھاہ ءچ سڑیسی جیہڑی وسمنڑ آلی نئیں ۔

‏18 بس اوہ اُنہاں کُوں نصیحت ءچ بہُوں سارے گالھیں ڈسیندا تے خوشخبری سُنڑیندا ریہا ۔ ‏19 پَر چوتھائی مُلک دے حاکم ہیرودیس نیں آپنڑے بِھرا فلِپُس دی ذال ہیرودیاس نال شادی کرݨ دے سببّوں تے اُنہاں سبھ بُرائیاں دے سببّوں جیہڑیاں ہیرودیس کیتیاں ہَن ، یُوحنّا کنُوں ملامت چا تے ، ‏20 اِنہاں سبھ کنُوں وَدھ تے ایہہ وی کیتا جو یُوحنّا کُوں قید ءچ سَٹ ڈِتا ۔

‏21 جِیں وَیلے سبھ لوکاں بپتسمہ گِھن گِھدا تے یسُوع وی بپتسمہ گِھن تے دُعا کریندا پِیا ہا تاں اِیویں تھیّا جو اَسمان کُھل گِیا ۔ ‏22 تے رُوح القُدس جِسمانی صورت ءچ کبوتر وانگوں اُوندے اُتے نازل تھیّا تے اَسمان کنُوں آواز آئی جو تُوں میڈا پیارا پوتر ہیں ، تَیں کنُوں میں بُہوں خوش ہاں ۔

‏23 جِیں وَیلے یسُوع خود تعلیم ڈیوݨ لگا ، اوہ تقریباً تَریح سال دا ہا ۔تے جیویں سمجھیا وَیندا ہا ، یُوسف دا پوتر ہا تے اوہ عیلی دا ، ‏24 تے اوہ متّات دا تے اوہ لاوی دا تے اوہ ملکی دا تے اوہ ینّا دا تے اوہ یُوسف دا ، ‏25 تے اوہ متّتیاہ دا تے اوہ عامُوس دا تے اوہ ناحُوم دا تے اوہ اسلیاہ دا تے اوہ نوگہ دا ، ‏26 تے اوہ ماعَت دا تے اوہ متّتیاہ دا تے اوہ شمِعی دا تے اوہ یوسیخ دا تے اوہ یوداہ دا ، ‏27 تے اوہ یُوحنّا دا تے اوہ ریسا دا تے اوہ زرُبّابِل دا تے اوہ سیالتی ایل دا تے اوہ نیری دا ، ‏28 تے اوہ ملکی دا تے اوہ اَدّی دا تے اوہ قوسام دا تے اوہ اِلمودام دا تے اوہ عیر دا ، ‏29 تے اوہ یشوع دا تے اوہ الِیعزر دا تے اوہ یورِیم دا تے اوہ متّات دا تے اوہ لاوی دا ، ‏30 تے اوہ شمعون دا تے اوہ یہُوداہ دا تے اوہ یُوسف دا تے اوہ یونان دا تے اوہ الیاقِیم دا، ‏31 تے اوہ ملےآہ دا تے اوہ مِنّاہ دا تے اوہ متّتاہ دا تے اوہ ناتن دا تے اوہ داؤد دا ، ‏32 تے اوہ یسّی دا تے اوہ عوبید دا تے اوہ بوعز دا تےاوہ سلمون دا تے اوہ نحسون دا ، ‏33 تے اوہ عَمّینداب دا تے اوہ ارنی دا تے اوہ حصرون دا تے اوہ فارص دا تے اوہ یہُوداہ دا ، ‏34 تے اوہ یعقوب دا تے اوہ اِضحاق دا تے اوہ ابرہام دا تے اوہ تارہ دا تے اوہ نحُور دا ، ‏35 تے اوہ سُروج دا تے اوہ رعُو دا تے اوہ فلج دا تے اوہ عِبر دا تے اوہ سلح دا ، ‏36 تے اوہ قینان دا تے اوہ اَرفکسد دا تے اوہ سِم دا تے اوہ نُوح دا تے اوہ لَمک دا ، ‏37 تے اوہ متُوسِلح دا تے اوہ حَنوک دا تے اوہ یارِد دا تے اوہ مَہلل ایل دا تے اوہ قِینان دا ، ‏38 تے اوہ انُوس دا تے اوہ سیت دا تے اوہ آدم دا تے اوہ خُدا دا ہا ^a۔