‏3 یسُوع جواب ءچ اُنہاں کُوں آکھیا کیا تُساں اے وی نئیں پڑھیا جو جِیں وَیلے داؤد تے اُوندے دوست بُھکے ہَن تاں اُنہاں کیا کیتا؟ ‏4 اوہ کِیویں خُدا دے گھر ءچ داخل تِھیّا تے نذر دیاں روٹیاں کھادیاں تے آپنڑے ساتھیاں کُوں وی کھاوݨ کیتے ڈِتیاں، ایجھی روٹیاں کُوں کھاوݨ کاہِناں دے علاوہ کہیں کُوں جائز نہ ہا ؟

‏5 وَل اُونیں اُنہاں کُوں آکھیا جو ابن ِآدم سَبت دا مالک ہے ۔

‏6 تے اِیویں تھیّا جو کہیں بئے سَبت کُوں اوہ عبادت خانہ ءچ وَنج تے تعلیم ڈیوݨ لگا تے اُتھاں ہِک بندا ہا جِیندا سجا ہَتھ سُک گِیا ہا ۔ ‏7 تے فقیہہ تے فریسی اُوندی تاڑ ءچ ہَن ، جے اوہ سَبت دے ڈینہہ اُونکُوں شِفا ڈیوے، تاں اُنہاں کُوں اُوندے اُتے اِلزام لاوݨ دا موقع مِل ویسی ۔ ‏8 پَر اُونکُوں اُنہاں دے خیال پتا ہَن ۔ بس اُونیں سُکے ہَتھ آلے کُوں آکھیا اُٹھی تے اَدھ ءچ کھڑا تھی وَنج ۔ اوہ اُٹھی تے کھڑا تھی گِیا ۔ ‏9 یسُوع اُنہاں کُوں آکھیا میں تُہاکُوں ایہہ پُچھدا ہاں جو سَبت دے ڈینہہ نیکی کرݨ جائز ہے یا بدی کرݨ ؟ جان بچاوݨ یا قتل کرݨ ؟ ‏10 تے اُنہاں ساریاں اُتے نِگاہ کر تے اُوں آدمی کُوں آکھیا آپنڑا ہَتھ وَدھا ۔ اُونیں وَدھایا تے اُوندا ہَتھ ٹھیک تھی گِیا ۔

‏11 اوہ کاوِڑ کنُوں پاگل تھی گئے تے آپس ءچ آکھنڑ لگے جو اَساں یسُوع نال کیا کروں ؟

‏12 اُنہاں ڈینہاں ءچ اِیویں تھیّا جو یسوع دُعا کرݨ کیتے پہاڑ اُتے گِیا تے ساری رات خُدا کنُوں دُعا منگدا ریہا ۔ ‏13 جِیں وَیلے سویر تھئی تاں اُونیں آپنڑے شاگرداں کُوں سَڈیا تے اُنہاں ءچوں بارہاں کُوں چُنڑ تے اُنہاں کُوں رسُول مقرر کیتا ۔ ‏14 یعنی شمعون جِیندا ناں اُونیں پطرس وی رکھیا تے اُوندا بِھرا اندریاس تے یعقوب تے یُوحنّا تے فِلپُس تے برتلمائی ۔ ‏15 تے متّی تے توما تے حلفئی دا پوتر یعقوب تے شمعون جیہڑا زیلوتیس^a اَکھویندا ہا ۔ ‏16 تے یعقوب دا پوتر یہُوداہ تے یہُوداہ اِسکریوتی جیہڑا اُوندا پکڑواوݨ آلا تھِیا ۔

‏17 یسوع اُنہاں دے نال تَلے لہہ تے ہموار جاہ تے کھڑا تھیّا ۔تے اُوندے شاگرداں دی وَڈی جماعت تے لوکاں دی وڈی بِھیڑ اُتھاں جمع ہئی جیہڑے سارے یہُوداہ تے یروشلِیم تے صُور تے صیدا دے ساحل کنُوں اُوندی سُننڑ تے آپنڑیاں بیماریاں کنُوں شِفا پاوݨ کیتے اُوندے کولھ آئے ہَن ۔ ‏18 تے جیہڑے بدرُوحاں دی وجہ کنُوں ڈُکھ تے تکلیف ءچ مبتلا ہَن اوہ وی چنگے کر ڈتے گئے ۔ ‏19 تے سارے لوک اُونکُوں ہَتھ لاوݨ دی کوشش کریندے ہَن کیوں جو اُوندے ءچوں قوت نِکلدی ہئی تے ساریاں کُوں شِفا بخشدی ہئی ۔

‏20 وَل اُونیں آپنڑے شاگرداں اُتے نگاہ کر تے آکھیا

‏27 پَر میں تُساں سُننڑ آلیاں کُوں آہدھا ہاں جو آپنڑے دُشمنڑاں نال محبت رکھو تے جیہڑے تُہاڈے نال عداوت رکھنڑ اُنہاں دا بھلا کرو ۔ ‏28 جیہڑے تُہاڈے اُتے لعنت کرݨ اُنہاں کیتے برکت منگو ، جیہڑے تُہاڈی بےعزتی کرݨ اُنہاں کُوں دُعا ڈیوو۔ ‏29 جے کوئی تیڈی گَلھ اُتے چاٹ مارے تاں ڈوجھی وی اُوندے پاسوں پھیر ڈے تے جیہڑا تیڈا چولا گِھننڑ چاہوے ، اُونکُوں قمیض گِھننڑ کنُوں وی نہ روک۔ ‏30 جیہڑا کوئی تَیں تُوں منگے اُونکُوں ڈے تے جے کوئی تیڈا مال گِھن گِھنے تاں اُوں کنُوں وَلا نہ منگ ۔ ‏31 تے جیویں تُساں چاہندے ہِوے جو لوک تُہاڈے نال کرݨ ، تُساں وی اُنہاں دے نال اُونویں ای کرو ۔

‏32 جے تُساں صرف اُنہاں لوکاں نال ای محبت رکھو جیہڑے تُہاڈے نال محبت رکھیندے ہِن تاں تُہاڈا کیا احسان ہے ؟ کیوں جو گنہگار وی آپنڑے محبت رکھنڑ آلیاں نال محبت رکھیندے ہِن ۔ ‏33 تے جے تُساں بھلا کرݨ آلیاں نال ای بھلا کریندے ہِوے تاں تُہاڈا کیا احسان ؟ کیوں جو گنہگار وی اِیویں کریندے ہِن ۔ ‏34 تے جے تُساں قرضہ اُنہاں لوکاں کُوں ڈیندے ہِوے جِیں کنُوں قرضہ وصول تھیوݨ دی اُمید ہووے تاں تُہاڈا کیا احسان ہے ؟ گنہگار وی گنہگاراں کُوں قرضہ ڈیندے ہِن تاں جو سارا وصول کر گِھننڑ۔ ‏35 پَر تُساں آپنڑے دُشمنڑاں نال محبت رکھو تے بھلا کرو ،تے واپس مِلنڑ دی اُمید دے بغیر قرضہ ڈیوو تاں تُہاڈا اَجر وَڈا ہوسی تے تُساں خُدا تعالیٰ دے فرزند بنڑسو، کیوں جو اوہ ناشکریاں تے بُریاں اُتے وی مہربان ہے ۔ ‏36 جِیویں تُہاڈا باپ رحیم ہے ، تُساں وی رحم دل بنڑو ۔

‏37 عیب جوئی نہ کرو، تُہاڈی وی عیب جوئی نہ کیتی ویسی ۔مُجرم نہ بنڑاؤ، تُساں وی مُجرم نہ بنڑائے ویسو ۔ معاف کرو ، تُہاکُوں وی معاف کیتا ویسی ۔ ‏38 ڈِتا کرو، تُہاکُوں وی ڈِتا ویسی ۔ ٹھیک پیمانہ چنگی طرح دبا تے ، ہِلا ہِلا تے، تے مُنہ تئیں بھر تے تُہاڈے برتن ءچ سَٹ ڈِتا ویسی، کیوں جو جیہڑے پیمانے نال تُساں نپیندے ہِوے اُوندے نال ای تُہاڈے واسطے ناپیا ویسی۔

‏39 اُونیں اُنہاں کُوں ہِک تمثیل وی آکھی جو کیا ہِک اَندھا ڈوجھے اَندھے کُوں رستہ ڈِکھا سگدے؟ کیا ڈوہائیں کھڈے ءچ نہ ڈھا سن ؟ ‏40 کوئی شاگرد آپنڑے اُستاد کنُوں وڈا نئیں ہوندا پَر جیہڑے وَیلے چنگی طرح سِکھ گِھندے تاں آپنڑے اُستاد وانگوں تھی ویسی ۔

‏41 تُوں آپنڑے بِھرا دی اَکھ ءچ ککھ کیوں ڈیدھیں تے آپنڑیں اَکھ دے شَتیر اُتے غور نئیں کریندا ؟ ‏42 تُوں کیویں آپنڑے بِھرا کُوں آکھ سگدیں جو بِھرا آ میں تیڈی اکھ دا ککھ کڈھ ڈیواں جِیں وَیلے تُوں آپنڑیں اَکھ دے شتیر کُوں نئیں ڈیدھا ؟ اے منافق ! پہلے آپنڑیں اکھ دا شتیر تاں کڈھ، وَلا آپنڑے بِھرا دی اکھ دے ککھ کُوں چنگی طرحاں ڈیکھ تے کڈھ سگسیں ۔

‏43 کیوں جو جیہڑا درخت چنگا ہوندے اوہ بُرا پَھل نئیں ڈیندا ،تے نہ ای بُرا درخت چنگا پَھل ڈیندے ۔ ‏44 ہر درخت آپنڑے پَھل کنُوں سُنجانڑیا ویندے۔ کیوں جو کنڈے آلی جھاڑیاں کنُوں لوک ہنجیر نئیں توڑیندے تے نہ جھڑ بیری کنُوں انگور ۔ ‏45 چنگا آدمی آپنڑے دل دے چنگے خزانے کنُوں چنگیاں چیزاں کڈھیندے ،تے بُرا آدمی بُرے خزانے کنُوں بُریاں چیزاں کڈھیندے، کیوں جو جیہڑا دل ءچ بھریا ہوندے اُوہو اُوندے مُنہ اُتے آندے ۔

‏46 جیہڑے وَیلے تُساں میڈے آکھنڑ اُتے عمل نئیں کریندے تاں میکُوں خُداوند خُداوند کیوں آہدھے ہِوے؟ ‏47 میں تُہاکُوں جتیندا ہاں جیہڑا میڈے کولھ آندے تے میڈے گالھیں سُنڑ دے تے اُنہاں اُتے عمل کریندے اوہ کئیں وانگوں ہے ۔ ‏48 اوہ اُوں آدمی وانگوں ہے جئیں گھر بنڑیندے وَیلے زمین کُوں بہُوں جِھکا کھٹیا تے گھر دی بنیاد چٹان اُتے رکھی ، جِیں وَیلے سیلاب آیا تے پانڑی دیاں چھلاں اُوں گھر کُوں ٹکراں ماریاں تاں اُونکُوں ہِلا نہ سگیاں کیوں جو اوہ مضبوط بنڑیا ہا ۔ ‏49 پَر جیہڑے میڈے گالھیں سُنڑ تے اُنہاں اُتے عمل نئیں کریندے اوہ اُوں آدمی وانگوں ہے جئیں گھر کُوں زمین اُتے بنیاد دے بغیر بنڑایا ۔ جِیں وَیلے پانڑی دِیاں چھلاں اُونکُوں ٹکراں ماریاں تاں اوہ فوراً ڈھے پیا تے اوہ گھر بالکل برباد تھی گِیا۔