‏5 اِیں تُوں رسُولاں خُداوند کُوں آکھیا ساڈے اِیمان کُوں وَدھا۔

‏6 خُداوند آکھیا جو جے تُہاڈا اِیمان رائی دے دانڑے دے برابر وی ہوندا تے تُساں اِیں تُوت دے درخت کُوں آہدھے جو جَڑ ھ کنُوں پٹیج تے سمندر ءچ وَنج لگ تاں تُہاڈی منیندا ۔

‏7 پَر تُساں ءچوں ایجھا کیہڑا ہے جِیندا نوکر زمین رَہیندا یا ڈھور ڈنگر چریندا ہووے تے جِیں وَیلے اوہ کھیت کنُوں وَلے تاں اُونکُوں آکھے جو جلدی نال آتے کھانڑا کھاوݨ بہہ وَنج ؟ ‏8 تے ایہہ نہ آکھے جو میڈا کھانڑا تیار کر، جِیں وَیلے تَئیں میں کھاواں پیواں ، کَمر بَدھ تے میڈی خدمت کر ، اُوندے بعد تُوں خود کھا پی گِھنیں ؟ ‏9 کیا اوہ اِیں واسطے نوکر دا شکر ادا کریسی جو اُوں اُوہو کیتا جیہڑا اُونکُوں کرݨ کیتے آکھیا گِیا ہا ؟ ‏10 اِیویں ای تُساں وی جِیں وَیلے اِنہاں گالھیں اُتے عمل کر گِھنو جِیندے کرݨ دا تُہاکُوں حکم ڈِتا گِیا ہا تاں آکھو جو اَساں نکمے نوکر ہاں ، اَساں صِرف اُوہو کیتا جیویں کرݨ ساکُوں فرض ہا ۔

‏11 تے اِیویں تھیّا جو یروشلیم کُوں ویندے ہوئے یسوع سامریہ تے گلیل دے ءچوں تھی تے ویندا پیا ہا ‏12 تے ہِک دیہات ءچ داخل تھیندے وَیلے اُونکُوں ڈاہ کوڑھی ملے۔ ‏13 اُنہاں دُور کنُوں کھڑے تھی تے اُچی آواز نال آکھیا اے یسُوع ! اے اُستاد ! ساڈے اُتے رحم کر ۔

‏14 اُونیں اُنہاں کُوں ڈیکھ تے آکھیا وَنجو، آپنڑے آپ کُوں کاہناں کُوں ڈِکھاؤ تے اِیویں تھیّا جو اوہ ویندے ویندے پاک صاف تھی گئے ۔ ‏15 وَل اُنہاں ءچوں ہِک ایہہ ڈیکھ تے جو اُونکُوں شِفا مل گئی ہے ، اُچی آواز ءچ خُدا دی حمد کریندا وَل آیا ، ‏16 تے مُنہ دے بھار یسوع دے پیراں ءچ گوڈے ٹیک تے اُوندا شکر ادا کرݨ لگا تے اوہ سامری ہا ۔ ‏17 یسُوع جواب ءچ آکھیا کیا ڈاہ دےڈاہ پاک صاف نہ تھئے ہَن ؟ وَل اوہ نؤُں کِتھاں ہِن ؟ ‏18 کیا اِیں پردیسی دے سِوا بِیا کوئی نہ ہا جیہڑا وَل تے خُدا دی تعریف کریندا ؟ ‏19 وَل اُونکُوں آکھیا اُٹھی تے چلیا وَنج ، تیڈے اِیمان تیکُوں چنگا کیتے ۔

‏20 فریسیاں اُونکُوں پُچھیا جو خُدا دی بادشاہی کِیں وَیلے آسی ؟ اُونیں جواب ءچ اُنہاں کُوں آکھیا جو خُدا دی بادشاہی ظاہری طور تے نہ آسی ۔ ‏21 تے لوک ایہہ نہ اَکھیسن جو ڈیکھو اِتھاں ہے یا اُتھاں ہے ! کیوں جو ڈیکھو خُدا دی بادشاہی تُہاڈے درمیان ہے ۔

‏22 اُونیں شاگرداں کُوں آکھیا اوہ ڈینہہ آسن جو تُہاکُوں ابن ِآدم دے ڈینہاں ءچوں ہِک ڈینہہ کُوں ڈیکھنڑ دی خواہش ہوسی تے نہ ڈیکھ سو ۔ ‏23 تے لوک تُہاکُوں اَکھیسن جو ڈیکھو اُتھاں ہے ! یا ڈیکھو اِتھاں ہے! پَر تُساں چلے نہ وَنجائے تے نہ ای اُنہاں دے پِچُھوں وَنجائے ، ‏24 کیوں جو جیویں بجلی اَسمان ءچ ہِک پاسے کنُوں چمک تے ڈوجھے پاسے دُرک تے چلی ویندی ہے ، اِیویں ای ابن ِآدم آپنڑے آوݨ دے ڈینہہ ءچ ظاہر تھیسی ۔ ‏25 پَر لازم ہے جو اوہ پہلے بہُوں ڈُکھ چاوے تے اِیں زمانے دے لوک اُونکُوں رَد کرݨ ۔ ‏26 تے جیویں نوح دے ڈینہاں ءچ تھیّا ہا ، اُونویں ای ابن ِآدم دے ڈینہاں ءچ وی تھیسی ۔ ‏27 لوک کھاندے پیندے ہَن تے اُنہاں ءچ شادی ویاہ ہوندی ہئی ۔ اُوں ڈینہہ تَئیں جِیں وَیلے نوح کشتی ءچ داخل تھیّا تے طوفان آتے ساریاں کُوں ہلاک کر ڈِتا ۔ ‏28 تے جیویں لُوط دے ڈینہاں ءچ تھیّا ہا ، لوک کھاندے پیندے تے خریدو فروخت کریندے تے درخت لیندے تے مکان بنڑیندے ہَن ، ‏29 پَر جیہڑے ڈینہہ لُوط سدُوم کنُوں باہر نکلیا تاں بھاہ تے گندھک نیں اَسمان کنُوں وَس تے سبھ کُوں ہلاک کر ڈِتا ۔ ‏30 ابن ِآدم دے ظاہر تھیوݨ دے ڈینہہ وی اِیویں ای تھیسی ۔

‏31 اُوں ڈینہہ جیہڑا چھت اُتے ہووے تے اُوندا مال گھر ءچ ہووے ، اوہ اُونکُوں گِھننڑ کیتے تَلے نہ لَہوے تے اِیویں ای جیہڑا کھیت ءچ ہووے اوہ وَل نہ وَنجے ۔ ‏32 لُوط دی ذال کُوں یاد رکھو ۔ ‏33 جیہڑا کوئی آپنڑیں جان بچاوݨ دی کوشش کریسی اوہ اُونکُوں وَنجیسی تے جیہڑا کوئی اُونکُوں وَنجیسی اوہ اُونکُوں زندہ رکھیسی ۔ ‏34 میں تُہاکُوں آہدھا ہاں جو اُوں رات ڈو آدمی ہِک کَھٹ اُتے سُتے پئے ہوسن ، ہِک گِھن گِھدا ویسی تے ڈوجھا چھوڑ ڈِتا ویسی ۔ ‏35 ڈو عورتاں رَل تے چَکی پیندھیاں ہوسن ، ہِک گِھن گِھدی ویسی تے ڈوجھی چھوڑ ڈِتی ویسی۔ ‏36 ( ڈو آدمی جیہڑے کھیت ءچ ہوسن ، ہِک گِھن گِھدا ویسی تے ڈوجھا چھوڑ ڈِتا ویسی )۔

‏37 اُنہاں اُونکُوں پُچھیا جو اے خُداوند ! ایہہ کِتھاں ہوسی ؟

اُونیں اُنہاں کُوں آکھیا جِتھاں مُردار ہے اُتھاں گیجھ وی جمع تھی ویسن ۔