بیوہ تے قاضی دی تمثیل
18
1 وَل یسوع اُنہاں کُوں سِکھاوݨ کیتے ، جو ہر وَیلے دُعا کریندے تے ہِمت نئیں ہارنی چاہیدی ایہہ تمثیل سُنڑائی جو 2 کہیں شہر ءچ ہِک قاضی ہا ۔ اوہ نہ تاں خُدا کنُوں ڈر دا ہا ، نہ ای اِنسان دی کوئی پرواہ کریندا ہا۔ 3 اُوں شہر ءچ ہِک بیوہ ہئی جیہڑی اُوں قاضی دے کولھ آ تے ایہہ آہدھی ہئی جو میڈا اِنصاف کر تے میکُوں مُدعی کنُوں بچا ۔ 4 شروع ءچ تاں اُونیں کوئی پرواہ نہ کیتی پَر آخر اُونیں آپنڑے دِل ءچ آکھیا سچ ہے جو میں نہ خُدا کنُوں ڈردا تے نہ کہیں اِنسان دی پرواہ کریندا ہاں ۔ 5 پَر کیوں جو ایہہ بیوہ میکُوں تنگ کریندی ہے ، اِیں واسطے میں اُوندا اِنصاف کریساں ، نہ تاں ایہہ ہر روز آتے میڈے نَک ءچ دَم کر ڈیسی ۔6 خُداوند آکھیا سُنڑو ! ایہہ بے اِنصاف قاضی کیا آہدھے ؟ 7 بس کیا خُدا آپنڑے چُنڑے ہوئے لوکاں دا اِنصاف نہ کریسی جیہڑے ڈینہہ رات اُوں کنُوں فریاد کریندے ہِن ؟ تے کیا اوہ اُنہاں دی مدد ءچ دیر کریسی ؟ 8 میں تُہاکُوں آہدھا ہاں جو اوہ اُنہاں دا جلد اِنصاف کریسی ۔ وَل وی جِیں وَیلے ابن ِآدم آسی تاں کیا زمین اُتے اِیمان پے سی ؟
فریسی تے محصُول گِھننڑ آلے دی تمثیل
9 وَل اُونیں کُجھ لوکاں کُوں جیہڑے آپنڑے آپ کُوں بہُوں راستباز سمجھدے ہَن تے ڈوجھیاں کُوں کَم تر جانڑدے ہَن ، ایہہ تمثیل سُنڑائی ، 10 جو ڈو آدمی دُعا کرݨ کیتے ہیکل ءچ گئے ، ہِک فریسی تے ڈوجھا محصُول گِھننڑ آلا ۔
11 فریسی کھڑا تھی تے آپنڑے دِل ءچ اِیویں دُعا کرݨ لگا جو اے خُدا ! میں تیڈا شکر کریندا ہاں جو میں ڈوجھے آدمیاں وانگوں ظالم ، بے اِنصاف ، زِنا کار یا اِیں محصُول گِھننڑ آلے وانگوں نئیں ۔ 12 میں ہفتے ءچ ڈو پھیری روزہ رکھیندا ہاں تے آپنڑیں ساری کَمائی دا ڈاہواں حصہ ڈیندا ہاں ۔
13 پَر محصُول گِھننڑ آلے نیں دُور کھڑ تے اَسمان اَل نگاہ وی نہ کیتی بلکہ چھاتی پِٹ پِٹ تے آکھیا اے خُدا ! میں گنہگار اُتے رحم کر ۔ 14 میں تُہاکُوں آہدھا ہاں جو ایہہ آدمی ڈوجھے دی نسبت زیادہ راستباز تھی تے آپنڑے گھر گِیا کیوں جو جیہڑا کوئی آپنڑے آپ کُوں وڈا بنڑیسی اوہ چھوٹا کیتا ویسی تے جیہڑا کوئی آپنڑے آپ کُوں چھوٹا بنڑیسی اوہ وڈا کیتا ویسی ۔
یسُوع چھوٹے بالاں کُوں برکت ڈیندے
15 وَل لوک آپنڑے چھوٹے بالاں کُوں وی اُوندے کولھ گِھن آوݨ لگے تاں جو اوہ بالاں اُتے آپنڑا ہَتھ رکھے تے شاگرداں نیں ایہہ ڈیکھ تے اُنہاں کُوں جھڑکیا ، 16 پَر یسُوع بالاں کُوں آپنڑے کولھ سَڈیا تے آکھیا جو بالاں کُوں میڈے کولھ آوݨ ڈیوو تے اُنہاں کُوں نہ ہٹکو کیوں جو خُدا دی بادشاہی ایجھیاں ای دی ہے ۔ 17 میں تُہاکُوں سچ آہدھا ہاں جو جیہڑا کوئی خُدا دی بادشاہی کُوں بالاں وانگوں قبول نہ کرے اوہ اُوندے ءچ ہرگز داخل نہ تھیسی ۔
ہِک دولت مند آدمی
18 وَل کہیں سردار نیں اُوں کنُوں ایہہ پُچھیا جو اے نیک اُستاد! میں کیا کراں جو ہمیشاں دی زندگی دا وارث بنڑاں ؟
19 یسُوع نیں اُونکُوں آکھیا تُوں میکُوں کیوں نیک آہدھیں ؟ نیک تاں کوئی نئیں پَر ہِکو یعنی خُدا ۔ 20 تُوں حُکماں کنُوں تاں واقف ہیں جو زِنا نہ کر،خون نہ کر، چوری نہ کر، کُوڑی گواہی نہ ڈے ، آپنڑے ماں پیُو دی عزت کر۔
21 اُونیں آکھیا اِنہاں ساریاں اُتے تاں میں چھوٹے لا کنُوں عمل کریندا پیا ہاں ۔
22 جیہڑے وَیلے یسُوع ایہہ سُنڑیا تاں اُونکُوں آکھیا ہِک گالھ دی تیڈے ءچ ہُنڑ تَئیں کمی ہے ۔ آپنڑا سبھ کُجھ ویچ تے غریباں ءچ وَنڈ ڈے ، تیکُوں اَسمان اُتے خزانہ مِلسی تے وَل آتے میڈے پِچُھوں تھی پو۔ 23 ایہہ سُنڑ تے اوہ بہُوں غمگین تھیّا کیوں جو بہُوں مالدار ہا ۔
24 یسُوع نیں اُونکُوں ڈیکھ تے آکھیا دولتمنداں دا خُدا دی بادشاہی ءچ داخل تھیوݨ کیجھا اوکھا ہے ! 25 کیوں جو اُٹھ دا سوئی دے نکے ءچوں لنگھ وَنجنڑ ، دولت مند دا خُدا دی بادشاہی ءچ داخل تھیوݨ کنُوں زیادہ سوکھا ہے ۔
26 سُننڑ آلیاں ایہہ آکھیا تاں وَل کوݨ نِجات پا سگدے ؟
27 اُونیں آکھیا جیہڑا اِنسان کیتے ناممکن ہے اوہ خُدا کیتے ممکن ہے ۔
28 پطرس آکھیا ڈیکھ اَساں تاں آپنڑا سبھ کُجھ چھوڑ تے تیڈے پچُھوں تھی پئے ہاں ۔
29 اُونیں اُنہاں کُوں آکھیا میں تُہاکُوں سچ آہدھا ہاں جو ایجھا کوئی نئیں جئیں خُدا دی بادشاہی دی خاطر گھر یا ذال یا بِھراواں یا ماں پیُو یا بالاں کُوں چھوڑ ڈِتا ہووے ۔ 30 تے اِیں زمانے ءچ اُونکُوں کئی گُنا زیادہ نہ ملے تے آوݨ آلی دُنیا ءچ ہمیشاں دی زندگی ۔
یسُوع تَریجھی پھیری آپنڑیں موت دا ذکر کریندے
31 وَل اُونیں اُنہاں بارہاں کوں آپنڑے نال گِھدا تے اُنہاں کُوں آکھیا جو ڈیکھو اَساں یروشلِیم کُوں ویندے ہاں تے نبیاں جیہڑا کُجھ ابن ِآدم دے بارے ءچ لکھیا ہے اوہ پورا تھیسی ۔ 32 کیوں جو اوہ غیرقوم آلیاں دے حوالے کیتا ویسی تے لوک اُوندا مذاق بنڑیسن تے بے عزت کریسن تے اُوندے اُتے تُھوکیسن ، 33 تے اُونکُوں کوڑے مریسن تے قتل کریسن تے اوہ تَریجھے ڈینہہ زندہ تھی ویسی ۔
34 پَر اُنہاں ، اِنہاں ءچوں کوئی گالھ نہ سمجھی تے ایہہ قول اُنہاں کنُوں لُکیا ریہا تے اِنہاں گالھیں دا مطلب اُنہاں دی سمجھ ءچ نہ آیا ۔
یسُوع ہِک اَندھے بِھکاری کُوں شِفا ڈیندے
35 جِیں وَیلے اوہ ٹُردے ٹُردے یرِیحو دے نیڑے پُجیا تاں اِیویں تھیّا جو ہِک اَندھا رستے دے کنارے بیٹھا بِھیک منگدا پیا ہا ۔ 36 اوہ بِھیڑ دے لنگھنڑ دی آواز سُنڑ تے پُچھنڑ لگا جو ایہہ کیا تھیندا پئے ؟
37 اُنہاں اُونکُوں خبر ڈِتی جو یسُوع ناصری ویندا پیا ہے ۔
38 اُونیں دھاڑ دھاڑ کیتی تے آکھیا اے یسُوع ! داؤد دے پوتر ! میڈے اُتے رحم کر ۔
39 جیہڑے اَگُوں ویندے پئے ہَن اوہ اُونکُوں دَڑکے ڈیوݨ لگے جو چُپ تھی وَنج پَر اوہ تاں مزید زور نال دھاڑ دھاڑ کرݨ لگ پیا جو اے داؤد دے پوتر ! میڈے اُتے رحم کر ۔
40 یسُوع نیں کَھڑ تے حکم ڈِتا جو اُونکُوں میڈے کولھ گِھن آؤ ۔ جِیں وَیلے اوہ کولھ آیا تاں اُونیں اُوں کنُوں ایہہ پُچھیا 41 تُوں کیا چاہندا ہیں جو میں تیڈے کیتے کراں ؟ اُونیں آکھیا اے خُداوند ! ایہہ جو میں ڈیکھنڑ لگاں ۔
42 یسُوع اُونکُوں آکھیا ڈیکھنڑ لگ وَنج ، تیڈے اِیمان نیں تیکُوں چنگا کر ڈِتا ۔
43 اوہ اُونہئی وَیلے ڈیکھنڑ لگ گِیا تے خُدا دی حمد کریندا ہویا اُوندے پچُھوں ٹُرݨ لگ پیا تے سارے لوکاں ایہہ ڈیکھ تے خُدا دی حمد کیتی ۔