‏3 وَل شیطان یہُوداہ ءچ سما گِیا جیہڑا اِسکریوتی اَکھویندا تے اُنہاں بارہاں ءچ شمار کیتا ویندا ہا ۔ ‏4 اُونیں وَنج تے سردار کاہناں تے سپاہیاں دے سرداراں نال مشورہ کیتا جو اُونکُوں کیویں اُنہاں دے حوالے کرے ۔ ‏5 اوہ خوش تھئے تے اُونکُوں پیسے ڈیوݨ دا وعدہ کیتا ۔ ‏6 اوہ راضی تھی گِیا تے موقع دی تلاش کرݨ لگا جو اُونکُوں بغیر ہنگامے دے اُنہاں دے حوالے کرے ۔

‏7 تے عید ِ فطیر دا ڈینہہ آیا جِیندے ءچ فسح دی قربانی کرݨ فرض ہا ، ‏8 تے یسُوع پطرس تے یُوحنّا کُوں ایہہ آکھ تے بھیجیا جو ساڈے کیتے فسح کھاوݨ دی تیاری کرو ۔

‏9 اُنہاں اُونکُوں آکھیا تُوں کِتھاں چاہندیں جو اَساں تیار کروں ؟

‏10 اُونیں آکھیا شہر ءچ داخل تھیندے ای تُہاکُوں ہِک آدمی مِلسی جیہڑا پانڑی دا گھڑا گِھدی ویندا ہوسی ۔ جِیں گھر ءچ اوہ داخل تھیوے ، اُوندے پچُھوں چلے وَنجائے ‏11 تے گھر دے مالک کُوں اَکھائے اُستاد تیکُوں آہدھے جو اوہ مہمان خانہ کِتھاں ہے جِتھاں میں آپنڑے شاگرداں دے نال فسح دی عید دا کھانڑا کھاواں ؟ ‏12 اوہ تُہاکُوں اُتے گِھن ویسی تے ہِک وَڈا کمراہ سجیا ہویا ڈِکھیسی ، اُتھائیں تیاری کرائے ۔

‏13 اُنہاں وَنج تے سبھ کُجھ اُونویں ای ڈِٹھا جیویں اُونیں ڈسایا ہا تے فسح تیار کیتا ۔

‏14 جِیں وَیلے وقت تھی گِیا تاں اوہ تے اُوندے رسُول کھانڑا کھاوݨ بیٹھے ۔ ‏15 اُونیں اُنہاں کُوں آکھیا میڈی وَڈی خواہش ہئی جو ڈُکھ چاوݨ کنُوں پہلے فسح دا ایہہ کھانڑا تُہاڈے نال کھاواں ، ‏16 کیوں جو میں تُہاکُوں آہدھا ہاں جو اُونکُوں وَلا کڈھائیں نہ کھاساں جئیں تَئیں اوہ خُدا دی بادشاہی ءچ پورا نہ تھیوے ۔

‏17 وَل اُونیں پیالہ گِھن تے شکر کیتا تے آکھیا اِینکُوں گِھن تے آپس ءچ وَنڈ گِھنو۔ ‏18 کیوں جو میں تُہاکُوں آہدھا ہاں جو اَنگور دا شیرہ اُوں وَیلے تَئیں نہ پِیساں جئیں تَئیں خُدا دی بادشاہی آ نہ وَنجے ۔

‏19 وَل اُونیں روٹی گِھدی تے شکر کر تے تروڑی تے شاگرداں کُوں ایہہ آکھ تے ڈِتی جو ایہہ میڈا بدن ہے جیہڑا تُہاڈے کیتے ڈِتا ویندے، میڈی یاد گاری کیتے ایہو کیتا کرو ۔ ‏20 تے اِیویں ای کھانڑے دے بعد اُونیں پیالہ ایہہ آکھ تے ڈِتا جو ایہہ پیالہ^a میڈے اُوں خون ءچ نواں عہد ہے، جیہڑا تُہاڈے کیتے وہایا ویندے ۔^b

‏21 پَر ڈیکھو میکُوں پکڑواوݨ آلے دا ہَتھ میڈے نال دسترخوان اُتے ہے ۔ ‏22 ابن ِآدم تاں جیویں اُوندے حق ءچ پہلے کنُوں مقرر ہے ویندے ، پَر اُوں آدمی اُتے افسوس جِیندے ہَتھوں پکڑوایا ویندے !

‏23 ایہہ سُنڑ تے اوہ آپس ءچ پُچھنڑ لگے جو ساڈے ءچوں کوݨ ہے جیہڑا ایہہ کَم کریسی ؟

‏24 تے اُنہاں ءچ اِیں گالھ اُتے جو اُنہاں ءچوں وَڈا کوݨ سمجھیا ویندے ، تکرار تھیوݨ لگی ۔ ‏25 اُونیں اُنہاں کُوں آکھیا جو غیرقوماں اُتے اُنہاں دے بادشاہ حکومت چلیندے ہِن تے جیہڑے اِختیار آلے ہِن اوہ ہمدرد سَڈویندن ، ‏26 پَر تُساں اِیویں نہ کرائے بلکہ تُہاڈے ءچوں جیہڑا وَڈا ہے اوہ چھوٹے وانگوں تے جیہڑا سردار ہے اوہ خادم وانگوں بنڑے ۔ ‏27 وَڈا کوݨ ہے ؟ اوہ جیہڑا دستر خوان اُتے بیٹھا یا اوہ جیہڑا اُوندا خادم ہے؟ کیا اوہ نئیں جیہڑا دستر خوان اُتے بیٹھے ؟ پَر میں تُہاڈے ءچ خادم وانگوں ہاں ۔

‏28 پَر تُساں اوہ ہِوے جیہڑے میڈی اَزمایشاں ءچ برابر میڈے نال ریہے ، ‏29 تے جیویں میڈے باپ میکُوں ہِک بادشاہی عطا کیتی ہے ، میں وی تُہاکُوں عطا کریندا ہاں ۔ ‏30 تاں جو تُساں میڈی بادشاہی ءچ میڈے دستر خوان ءچوں کھاؤ پیؤ بلکہ تُساں تختاں اُتے بہہ تے اِسرائیل دے بارہاں قبیلیاں دا اِنصاف کریسو۔

‏31 شمعون! شمعون !ڈیکھ شیطان اِجازت منگی ہے جو تُہاکُوں دانڑیاں وانگوں پھٹکے ، ‏32 پَر میں تیڈے کیتے دُعا کیتی جو تیڈا اِیمان ویندا نہ رہوے، تے جِیں وَیلے تُوں رجوع کریں تاں آپنڑے بِھراواں کُوں مضبوط کریں ۔

‏33 اُونیں اُونکُوں آکھیا اے خُداوند! میں تاں تیڈے نال قید تھیوݨ بلکہ مَرݨ کیتے وی تیار ہاں ۔

‏34 اُونیں آکھیا اے پطرس ! میں تیکُوں آہدھا ہاں جو اَج کُکڑ دے بانگ ڈیوݨ کنُوں پہلے تُوں تَرے پھیری میڈا اِنکار کریسیں جو میکُوں نئیں جانڑدا ۔

‏35 وَل اُونیں اُنہاں کُوں آکھیا جو جِیں وَیلے میں تُہاکُوں بٹوے ، رقم تے جُتیاں دے بغیر بھیجیا ہا تاں کیا تُساں کہیں چیز دے مُتھاج تھئے ہاوے ؟ اُنہاں آکھیا کہیں چیز دے نئیں ۔

‏36 اُونیں اُنہاں کُوں آکھیا پَر ہُنڑ جِیندے کولھ بٹوا ہووے اوہ اُونکُوں گِھنے تے اِیویں ای جھولی وی ،تے جِیندے کولھ تلوار نہ ہووے اوہ آپنڑے کپڑے ویچ تے تلوار مُل گِھن گِھنے ، ‏37 کیوں جو میں تُہاکُوں آہدھا ہاں جو ایہہ نوشتہ جو اوہ بدکاراں ءچ شمار کیتا گِیا ، اُوندا میڈے حق ءچ پورا تھیوݨ ضرور ہے ۔ اِیں واسطے ہر اوہ گالھ جیہڑی میڈے کیتے ہے پوری تھیوݨ آلی ہے ۔

‏38 اُنہاں آکھیا اے خُداوند !ڈیکھ اِتھاں ڈو تلواراں ہِن ، اُونیں آکھیا بہُوں ہِن ۔

‏39 وَل اوہ باہر نِکل تے جیویں اُوندا دستور ہا ، زیتون دے پہاڑ اُتے گِیا تے شاگرد اُوندے پچُھوں تھی پئے ، ‏40 تے اُوں جاہ پُج تے اُونیں اُنہاں کُوں آکھیا دُعا کرو جو اَزمائش ءچ نہ پوو۔

‏41 تے اوہ اُنہاں کنُوں بمشکل اَنج تھی تے ذرا اَگُوں وَدھیا تے گوڈے ٹیک تے اِیویں دُعا کرݨ لگا جو ‏42 اے باپ ! جے تیڈی منشا ہووے تاں ایہہ پیالہ میڈے تُوں ہٹا ڈے وَل وی میڈی منشا نئیں بلکہ تیڈی ای منشا پوری تھیوے ۔ ‏43 تے اَسمان کنُوں ہِک فرشتہ اُوندے اُتے ظاہر تھیّا جیہڑا اُونکُوں حوصلہ ڈیندا ہا ۔ ‏44 وَل اوہ بہُوں پریشانی ءچ مبتلا تھی تے بِیا وی دِل سوزی نال دُعا کرݨ لگا تے اُوندا پسینہ خون دے قطریاں وانگوں زمین اُتے ڈھاندا ہا ۔

‏45 جِیں وَیلے دُعا دے بعد شاگرداں دے کولھ آیا تاں اُنہاں کُوں غم دی وجہ کنُوں سُتا ڈِٹھا ، ‏46 تے اُنہاں کُوں آکھیا تُساں کیوں سُتے پئے ہِوے؟ اُٹھی تے دُعا کرو تاں جو اَزمائش ءچ نہ پوو۔

‏47 اوہ ایہہ گالھیں کریندا ای پیا ہا جو ڈیکھو ہِک بِھیڑ آئی تے اُنہاں بارہاں ءچوں اوہ جِیندا ناں یہُوداہ ہا ، اُنہاں دے اَگُوں اَگُوں ہا ۔ اوہ یسُوع دا بوسہ گِھننڑ کیتے اَگُوں وَدھیا ۔ ‏48 یسُوع اُونکُوں آکھیا اے یہُوداہ ! کیا تُوں بوسہ گِھن تے ابن ِآدم کُوں پکڑویندیں؟

‏49 جِیں وَیلے اُوندے ساتھیاں کُوں پتا چلیا جو کیا تھیوݨ آلا ہے تاں آکھیا اے خُداوند کیا اَساں تلوار چلاؤں ؟ ‏50 تے اُنہاں ءچوں ہِک نیں سردار کاہن دے نوکر اُتے تلوار چلا تے اُوندا سَجا کَن اُڈا ڈِتا ۔

‏51 یسُوع جواب ءچ آکھیا بس بہُوں تھی گِیا، تے اُوندے کَن کُوں ہَتھ لا تے ٹھیک کر ڈِتا ۔

‏52 وَل یسُوع نیں سردار کاہناں تے ہیکل دے سرداراں تے بزُرگاں کُوں جیہڑے اُونکُوں گرفتار کرݨ آئے ہَن آکھیا کیا تُساں تلواراں تے سوٹے چا تے میکُوں ڈاکو سمجھ تے پکڑن کیتے نکلے ہِوے ؟ ‏53 جِیں وَیلے میں ہر روز ہیکل ءچ تُہاڈے نال ہم تاں تُساں میڈے اُتے ہَتھ نہ پایا ، پَر ایہہ تُہاڈی گھڑی تے تاریکی دا اِختیار ہے ۔

‏54 وَل اوہ اُونکُوں گرفتار کر تے سردار کاہن دے گھر ءچ گِھن گئے تے پطرس کُجھ فاصلے کنُوں اُوندے پچُھوں پچُھوں ٹُردا ریہا ۔ ‏55 تے جِیں وَیلے اُنہاں صحن دے اَدھ ءچ بھاہ بالی تے سبھ مِل تے بہہ گئے تاں پطرس اُنہاں دے اَدھ ءچ بہہ گِیا ۔ ‏56 ہِک کنیز نیں اُونکُوں بھاہ دے کولھ بیٹھا ڈیکھ تے اُونکُوں غور نال ڈِٹھا تے آکھیا جو ایہہ آدمی وی اُوند ے نال ہا ۔

‏57 پَر اُونیں ایہہ آکھ تے اِنکار کیتا جو اے عورت ! میں اُونکُوں نئیں جانڑدا ۔

‏58 تھوڑی دیر بعد کہیں بئے اُونکُوں ڈیکھ تے آکھیا جو تُوں وی اُنہاں ءچوں ہیں۔

پطرس آکھیا میاں ! میں نئیں ۔

‏59 تقریباً ہِک گھنٹے بعد کہیں بئے نیں بہُوں یقین نال آکھیا جو ایہہ آدمی بے شک اُ وندے نال ہا کیوں جو ایہہ وی گلیلی ہے ۔

‏60 پطرس آکھیا میاں ! میں نئیں جانڑدا جو تُوں کیا آہدھیں۔ اوہ اَجنڑ آہدھا ای پیا ہا جو فوراً کُکڑ بانگ ڈِتی ۔ ‏61 خُداوند مُڑ تے پطرس دو ڈِٹھا ، تے پطرس کُوں خُداوند دی اوہ گالھ یاد آئی جیہڑی اُونیں پطرس کُوں آکھی ہئی جو اَج کُکڑ دے بانگ ڈیوݨ کنُوں پہلے تُوں تَرے پھیری میڈا اِنکار کریسیں ، ‏62 تے اوہ باہر وَنج تے بُٹ بُٹ رویا۔

‏63 جیہڑے آدمی یسُوع کُوں پکڑی بیٹھے ہَن ، اُوندا مذاق بنڑیندے تے اُونکُوں مریندے ہَن ، ‏64 تے اُوندے اَکھیں اُتے پٹی بَدھ تے پُچھدے ہَن جو نبُوت کر تے ڈسا جو تیکُوں کئیں مارے ؟ ‏65 تے اُنہاں بِیا وی بہُوں سارے گُستاخ گالھیں اُوندے خِلاف کیتیاں ۔

‏66 سویر تھیندے ای سردار کاہن تے فقیہہ یعنی قوم دے بزُرگ جمع تھئے تے اُنہاں اُونکُوں آپنڑیں صدر ِ عدالت ءچ گِھن تے آکھیا ‏67 جے تُوں المسیح ہیں تاں ساکُوں ڈسا ڈے ۔

اُونیں اُنہاں کُوں آکھیا جے میں تُہاکُوں آکھاں تاں تُساں یقین نہ کریسو ، ‏68 تے جے میں پُچھاں تاں جواب نہ ڈیسو ، ‏69 پَر ہُنڑ کنُوں ابن ِآدم قادر ِ مطلق خُدا دے سَجے پاسوں بیٹھا رَہسی ۔

‏70 اِیں تُوں اوہ سارے آکھنڑ پئے گئے کیا تُوں خُدا دا پوتر ہیں ؟

اُونیں اُنہاں کُوں آکھیا تُساں خود آہدھے ہِوے جو میں ہاں ۔

‏71 اُنہاں آکھیا ہُنڑ ساکُوں کہیں گواہی دی کیا ضرورت ہے ؟ کیوں جو اَساں خود اُوندے مُنہ کنُوں سُنڑ گِھدے ۔